މިއަދަކީ ގައުމީ ފެންވަރުގައި، އަދި ބައިނަލްއަގުވާމީ ފެންވަރުގައި ވެސް ފާހަގަ ކުރާ ބޭބީ ސިޓަރސް ނުވަތަ ކުޑަކުދިން ބަލާ އާޔާއިންގެ ދުވަހެވެ. އެހެން ގޮތަކަށް ބުނާނަމަ ހިތްތަކުގެ މާމެލާމެލި ކަމުގައިވާ ލޮބުވެތި ދަރިންގެ ދެވަނަ މަންމައިންގެ ދުވަހެވެ.
މީގެ އަހަރުތަކެއް ކުރިން އަޅުގަނޑުމެންގެ މިކުޑަކުޑަ ދިވެހިރާއްޖޭގެ ގޭގޭގަައި އާއިލާތައް އުޅުނީ "ޖޮއިންޓް ފެމިލީ" ނުވަތަ އެކުއެކީގައި މުނިމާމައިން ފެށިގެން މުނިމާމަ ކުދިންނަށް ދާނދެން އެއް ފުރާޅެއްގެ ދަށުގައި އެކުއެކީގައެވެ. ޒަމާނާއި ވަގުތާއި ހާލަތަަށް އަންނަ ބަދަލުތަކާއެކު މި އާދަވެސް މަޑުމަޑުން ދޫވަމުން ދުރުވަމުން އަައިސް މިއަދު ވަރަށްވެސް މަދު އާއިލާއެއް ފިޔަވައި ދިރިއުޅެނީ ވަކިވަކި އާއިލާތަކެއްގެ ގޮތުގައެވެ. މީގެ އެތައް ބައިވަރު ސަބަބުތައް އެބަހުއްޓެވެ. އަދި މި ގޮތަށް ވަކިން ދިރިއުޅޭ އާއިލާތަކުގައި ވަޒީފާ އަދާ ކުރާ ދެމަފިރިން އުޅޭކަމަށް ވާނަމަ ދަރިން ބަލައި އެކުދިންގެ ރައްކާތެރިކަމަށްޓަކައި އާޔާއިން، ނުވަތަ ބޭބީ ސިޓަރސް އެބަ ހޯދަން ޖެހެއެވެ. ވަކިން ދިރިއުޅޭ އާއިލާތައް ކަމުގައި ނުވިޔަސް އެެންމެން އެކުގައި އުޅޭ އާއިލާތަކުގައިވެސް މިއަދު އެކަކުގެ ދަރިފުޅު ބަލަން އަނެއްމީހާއަށް ވަގުތު ދެވޭ ވަރަށް ވުުރެ ދިރިއުޅުމުގެ ހާލަތު އޮތީ ބަދަލުވެފައެވެ. އަދުގެ ދިރިއުޅުމުގައި ދެމަފިރިން ވިޔަސް އެކަނި އުޅޭ މައިން، ބަފައިން ވިޔަސް ފައިސާ ހޯދުމަށް މަސައްކަތް ކުރުން މުހިންމެވެ. އެހެނީ ޒަމާނާއި ވަގުތާއެކު ބަދަލުވަމުން އައި ހާލަތަށް ބަލާއިރު ދިރިއުޅުމުގެ ކަންކަމުގެ އަގުތައް ބޮޑުވުމާއި ބޭނުންތައް އިތުރުވުމެވެ.
ކޮންމެއަކަސް ކޮންމެފަދަ ސަބަބުތަކަކަށްޓަކައި ވިޔަސް މިހާރު ބޭބީސިޓަަރސް އަކީ ދިވެހިރާއްޖޭގައިވެސް އެދެވޭ މުސާރައެއް ލިބޭ ވަޒީފާއެކެވެ. ބައެއް ބޭބީ ސިޓަރސް ގޭގޭގައި ދިރިއުޅޭ ގޮތަށް ތިބޭ އިރު އަނެއްބައި ސިޓާސް އަންނަނީ ކަނޑައެޅޭ ވަކި ގަޑިތަކަކަށެވެ. މީގެ ތެރޭގައި މައިންބަފައިން، ބެލެނިވެރިން ވަޒީފާތަކަށް ދިއުމުން އަންނަ ސިޓާސްތަކާއި ދެމަފިރިން އެކުގައި ދާންޖެހޭ ބައެއްތަންތަނަށް ދިއުމުން ހަމައެކަނި އެގަޑިއަކަށް ގެންނަ ސިޓާސް ވެސް ތިބެއެވެ.
މިއަދަކީ ބޭބީ ސިޓަރސް ދުވަހެވެ…ދުވަހުގެ މުނާސަބާގައި ބޭބީސިޓާސް އަށް ތަހުނިޔާ….ފޮޓޯ:ބޭބީސިޓާސް
މާލެއެކޭ އެއްފަދައިން ރާއްޖޭގެ އެހެނިހެން ހިސާބުތަކުގައި ވެސް މިއީ މިހާރު އާންމުކަމެކެވެ. ބައެއް ދާއިމީ ވަޒީފާތަކުގައި އުޅޭ ފަރާތްތައް އިތުރުގަޑީގައި އިތުރު އާމްދަނީ ހޯދުމަށްވެސް މިމަސައްކަތް ކުރެއެވެ. އެއްވެސް މަސައްކަތަކީ ދަށް މަސައްކަތެއް ނޫނެވެ. ހަލާލު އާމްދަނީ ލިބޭ ކޮންމެ މަސައްކަތަކީ ރީތި، ގަދަރު ލިބިގެންވާ އަދި ﷲ ތައާލާގެ ބަރަކާތާއި ރުހިވޮޑިގަތުން ލިބިގެންވާ މަސައްކަތެކެވެ. ކުރީގައި މިއީ ދަށް ކަމަކަށް ދުށް ފަރާތްތައްވެސް މިއަދު އެއީ ގޯސް ފިކުރެއްކަން ގަބޫލު ކުރެއެވެ. އެހެނަސް އެއްވެސް މުޖުތަމައަކުން ހުރިހާ ގޯސް ފިކުރެއް ނައްތާނުލެވޭނެހެން މިއަދުވެސް އެފަދަ މީހުންތައް މަދުން ނަމަވެސް އުޅެއެވެ، އެހެންކަމަށްވިޔަސް އުފާ ކުރަންވީ ކަމަކީ މިއަދު މޮޅަށް ކިޔަވައިގެން ތިބޭ ފަރާތްތައްވެސް ފަހުރުވެރިކަމާއެކު ކުދިން ބެލުމުގެ ވަޒީފާ އަދާކުރާކަމެވެ.
"ފުރަތަމަ ފްރެންޑްސް ވަރަށް އެއްޗެހި ކިއި، ފިއޯންސޭވެސް ވަރަށް ނުރުހުނު، އެންމެންވެސް ބުނީ އޭލެވެލް ހަދައިގެން ކާކުހޭ ކުދިން ބަލަން ދާނީ، އެކަމަކު މިއަދު އެ އެންމެންވެސް ގަބޫލު ކުރޭ އެދުވަހު އަޅުގަނޑު ބޭބީސިޓިންގ އަށް ނުނިކުތް ނަމަ މިއަދު އަޅުގަނޑު އަތުގައި މި އޮތް ޑިޕްލޮމާގެ ސެޓްފިކެޓް ނޯންނާނެކަން، އަޅުގަނޑުގެ ފުރަތަމަ ވަޒީފާއަކީ ބޭބީސިޓިން، ދެވަނަ ވަޒީފާއަށް ދަމުންވެސް އަޅުގަނޑު ޕާޓްޓައިމްކޮށް ސިޓް ކުރަން ދިޔައިން، ސަބަބަކީ މާލޭގައި ކުއްޔަށް އުޅެމުން އެހެނިހެން އަމިއްލަ ހަރަދުތައްވެސް ކުރަމުން ކޯސްހަދަން މަންމައާއި ބައްޕަ އަތުން ފައިސާ ހޯދަން އަޅުގަނޑު ބޭނުން ނުވީ، އަޅުގަނޑަށްވުރެ ހަގަށް ތިބި ކުދިންނަށް މަަންމަމެންގެ އެހީ މުހިންމުވާނެތީ އަޅުގަނޑުު ނެގި ޑިޒިޝަނެއް އެއީ. މިއަދު އަޅުގަނޑަކީ ބޭބީސިޓަރ އެކޭ ބުނާކަށް އެންމެނަށް އުނދަގުލެއް ލަދެއް ނެތް. އަދިވެސް އަޅުގަނޑު ބައެއް ދުވަސްދުުވަހު ބައެއް ކުދިންގެ ސިޓަރ އެއްގެ ގޮތުގައި ދަން، މިހާރު ވަގުތު ނުވާތީ ގިނަދުވަހު ނުވިޔަސް…." މިއީ މިއަދު ރަނގަޅު މަގާމެއްގައި ވަޒީފާ އަދާ ކުރަމުންދާ ޒުވާން އަންހެން ކުއްޖެއްގެ ވާހަކައެވެ.
މިއީ މުސާރަދިނަސް މުސާރައިން އަގުކުރެވޭ ވަރަށްވުރެ ބޮޑު އަދި ބުރަ ޒިންމާއެކެވެ…..ފޮޓޯ:ބޭބީސިޓިން
މިފަދަ ކިތަންމެ ފަރާތްތައް މި މާލޭގައި ވެސް ނުހަނު ގިނައެވެ. މިއަދަކީ ރާއްޖޭގެ އެކިހިސާބުތަކުގައި ތިބިމިފަދަ ބޭބީސިޓާސްގެ ދުވަހެވެ. އަދި މިއީ މައިންބަފައިން، ބެލެނިވެރިންނަށްވެސް ޙާއްސަވާން ޖެހޭނެ ދުވަހެކެވެ. އެހެނީ މިދަނޑިވަޅަކީ ދަރިން ޙަވާލުކުރާ ފަރާތްތަކުގެ އަގުވަޒަންކޮށް ތަޢުރީފު ކުރަންވީ ވަގުތު ކަމަށްވާތީއެވެ. ތިޔަ މައިންބަފައިންނަށް ބްރޭކެއް ބޭނުން ވެއްޖެ ހިނދެއްގައި، ނުވަތަ ދާންޖެހޭ ތަނެއް އޮތުމުން، ކުދިން ނުގެންދެވޭނެ ހިނދެއްގައި ބައެއް ފަހަރު ޑޭޓް ނައިޓާއި ޝޯއަކަށް ދިއުމަށް މައިންބަފައިން ބޭބީސިޓަރުންގެ އެހީ ބޭނުންވާކަން ހަނދާން ނައްތާނުލާށެވެ. ކޮންމެ ބެލެނިވެރިޔަކު ވެސް، މަންމައަކު ވިޔަސް އަދި ބައްޕައަކު ވިޔަސް މިއަދު އެމީހެއްގެ ހަޔާތުގައި އެންމެ މުހިންމު ކަމަކީ ކޮބައިތޯ އަހާށެވެ. އެ ފަރާތްތައް ނަގާފައި ވަނީ ތިޔަބައިމީހުންގެ ޒިންމާއެވެ. އަމާނާތްތެރިވެ އޯގާތެރިކަމާއެކު ތަރުބިއްޔަތު ކުރީ ތިޔަބައިމީހުންނާ ހަވާލުކުރެވިފައިވާ އަމާނާތަކަށެވެ. އެމީހުން ޒިންމާދާރުކަމާއެކު ފާރަވެރިވެ ވަގުތު ދިނީ ތިޔަބައިމީހުންގެ އެންމެ އަގުހުރި މުދަލަށެވެ. އެ މަސައްކަތަށް މުސާރަ ދިންކަމުގައި ވިޔަސް އެމީހުންގެ މަސަައްކަތަށް ތައުރީފާއި ޝުކުރުވެސް ހައްގުކަން ހަނދާން ނައްތާނުލާށެވެ. މަންމައެއްގެ ވަޒީފާ އަކީ ބުރަ މަސައްކަތެއްކަން ކޮންމެ މަންމައަކަށްވެސް އެނގޭނެއެވެ. އެހެންކަމުން އެ ވަޒީފާ ފުރިހަމައަށް އަދާ ކުރާ މީހާއަށް ޝުކުރާއި ހަދިޔާ މިއަދު ކޮންމެހެންވެސް ދޭން ވާނެކަން ގަބޫލުކުރަން ވާނެއެވެ.
"އަޅުގަނޑުގެ ތިން ކުދިން ތިބިއިރު ތިންކުދިންވެސް ބޮޑުވީ އެކުދިންގެ ޝަޒީއްތައާއެކުގައި، ތިމާގެ މީހެއް، އާއިލާ މީހެއް ނޫނީ އަތޮޅުމީހެއްވެސް ނޫން، ހަ އަހަަރު ކުރިން ޝަޒީ މިގެއަށް އައީ އެންމެ ފަނަރަ އަހަރުގައި، އޭރުއްސުރެ އެ ހުންނަނީ މިގޭގައި، އަޅުގަނޑަށް ކުދިން ލިބުނީ ވަރަށް ގާތްގާތުގައި، ފުރަތަމަ ކުއްޖާ ވިހަންވެގެން އެޑް ޖެހީމަ އައި ފަސް ކުދިންގެ ތެރެއިން ކަމުދިޔައީ ޝަޒީ، ކިޔަވަންވެގެން އައީ، ގޮތަށް މިއަދުވެސް އެ އުޅެނީ މިގޭގައި، މިހާރު އެއީ މިގޭގެ ހިއްސާއަކަށް ވެއްޖެ، ކުދިންގެ މަންމައަކީ އަޅުގަނޑުކަމަށްވިޔަސް ކުދިންނާއެކު ގިނަ ވަގުތު ހޭދަކުރެވިފައި ހުންނާނީ ޝަޒީއަށް، ކުދިންނަށް އަޅުގަނޑަށްވުރެ އެ ދައްތަގެ އާދަ ހިފިފަައި ހުރީ، މިހާރު ދެން އަޅުގަނޑުމެން ދެމަފިރިން އޮތީ ނިންމާފައި ޝަޒީ މިގެއިން ދުވަަހަކުވެސް ނުދާނެކަމަށް، މިއަދު އޭނާއަށް މި ހަބަރު ދޭން މިގަސްދުކުރަނީ، މިހާރުދެން އެއީ ބޭބީސިޓަރ އެއް ނޫން، އަޅުގަނޑުގެ ކޮއްކޮ، ތެދަށް ބުނާނަމަ ކުދިންގެ ކަންތައް ކުރަމުން ދިޔައިރު އެކުއްޖާ ދިޔައީ އަޅުގަނޑުގެ އެކަނިވެރިކަން ފިލުވައިދެމުން،" މިއީ ތިންކުދިންގެ މަންމައެއްގެ ވާހަކައެވެ. ރަފީގާގެ އަޑުގައި ހުރި އުފާވެރިކަން ބުނެދެނީ އޭނާގެ ކުދިން ބަލައިބޮޑު ކުރަން އުޅޭ އަންހެންމީހާއަށްޓަކައި އޭނާގެ ހިތުގައި އޮތް ލޯތްބެވެ.
މިއީ ޝުކުރު އަދާކުރުން ހައްގު މަސައްކަތެކެވެ…..ފޮޓޯ:ބޭބީސިޓިން
"މިހާރު ބޭބީސިޓް ކުރާތާ ދިހަ އަހަރުވެއްޖެ. ކުރިން އުޅުނިން ދެ ގެއެއްގައި، ތިން އަހަރު ކުރިން ވަކިން ތަނަކަށް ބަދަލުވީ އެންމެ ފަހުން އުޅުނު ގޭ މީހުން މެލޭޝިޔާއަށް ބަދަލުވާން ޖެހުުމުން، މިހާރު އޮފީސް ގަޑިއަށް ދަނީ، އޮފީހުން އައުމުން އަންނަނީ ގެއަށް، ދެން ރޭގަނޑު ގަޑިއަކުން ގަޑިއަކުން ދާގޮތަށް އެކިގޭގެއަށް ދަނީ، ހުކުރު ހޮނިހިރު ޗުއްޓީވާނެ ދައްތައާއި ބޭބެ ތަނަކަށް ދާން ނުޖެހެންޏާ، އަޅުގަނޑާއެކު އުޅޭ އެހެން ކުއްޖެއްވެސް، އެވެސް ބޭބީސިޓްކުރާ ކުއްޖެއް. މިއީ އާމްދަނީ ހޯދަން ރަނގަޅު އަދި ވަރަށް ހިތްހަމަޖެހޭ ކަމެއް،" ބޭބީސިޓަރއަކަށް ގުޅަައިގެން ސުވާލުކުރުމުން ކިޔައިދިނެވެ.
"ވަރަށް އުފާވޭ ކުދިން ގެންގުޅުނީމަ ވަރަށް ހިތްހަމަޖެހޭ، ބުރަ ކަމަކަށް ވިޔަސް ފޫހި ފިލާ ވަރަށް. އެކަށީގެންވާ އެންމެ ބޮޑު އެއްޗެއް ނުލިބުނަސް ރަނގަޅު މުސާރައެއް ލިބޭ، ފިހާރަައެއްގެ ކޭޝިއަރަކަށްވެސް ލިބޭނީ ގިނަތަންތަނުން 5ހާސްވަރު 6ހާސްވަރު، ހަމަ އެވަރު މިކަމުންވެސް ލިބޭ،" މިއީވެސް ބޭބީސިޓްކުރާ ފަރާތަކުން ދިން ޖަވާބެކެެވެ.
ދިހަ ވަރަކަށް ފަރާތާ ކުރި ސުވާލުތަކުން އެއް ސުވާލަށް ލިބުނީ ތަފާތެއް ނެތް އެއް ޖަވާބެވެ.
"ވަރަށް ހިތްހަމަޖެހޭ، އުފާވާ މަސައްކަތެއް، ކުޑަކުދިންނާއެކު އުޅުމަށް ނޭދޭނީ ކާކު، އަމުދުން އަންހެނުން…."
ބޭބީސިޓާސް ހޯދުމުގައި ވަރަށް ބޮޑަށް ބަލަން ވާނެއެވެ. އެމީހުނާ ހަވާލު ކުރާ ޒިންމާ އަދާކުރެވޭނެ ބައެއްތޯ ދެނެގަންނަން ޖެހޭނެއެވެ. އަދި މިފަދަ ދުވަސްތަކުގައި އެމީހުންގެ އަަގު ވަޒަން ކުރުމަކީވެސް ވަރަށް މުހިންމު ކަމެއްމެއެވެ.. އެހެންކަމުން، ތިބާގެ ދަރިފުޅުގެ "ދައްތަ" ނުވަތަ އާޔާއަށް ހާއްސަ ވަގުތުކޮޅެއް ހުސްކޮށް އެ ވަގުތުކޮޅު ހާއްސަަކުރުމަށް އަވަހަށް ތައްޔާރު ވާށެވެ. މިއީ މުސާރަދިނަސް މުސާރައިން އަގުކުރެވޭ ވަރަށްވުރެ ބޮޑު އަދި ބުރަ ޒިންމާއެކެވެ.
‘އިންޓަރނޭޝަނަލް ބޭބީސިޓާސް ޑޭ’ 2003 ވަނަ އަހަރު ބޭބީ ސިޓާ ޓްރެއިނިން ޕްރޮގްރާމްތައް ހިންގާ ކުންފުންޏެއް ކަމަށްވާ Safetywhys.com އިން އުފެއްދި ދުވަހެކެވެ.
މިދުވަހަށް ކިޔަނީ ބައިނަލްއަގުވާމީ ވިޔަސް "ގައުމީ" ދުވަހެކެވެ. "ޤައުމީ" ދުވަސްތަކުގެ މާނަ އަދި ޙަޤީޤީ ޤައުމީ ދުވަސްތައް ވަކިކޮށް ދެނެގަތުމަކީ ވަރަށްވެސް މުހިންމު ކަމެކެވެ. އެެއްވެސް ގައުމެއްގެ ކޮންގްރެސްގެ އެއްވެސް ރެކޯޑެއް ނުވަތަ ރިޔާސީ އިއުލާނެއް މިއަދާ ގުޅިގެން އެއްވެސް ގައުމެއްގައި ފެންނަން ނެތީ މިއީ ހަގީގީ "ގައުމީ" ދުވަހަކަށް ހަދާފައި ވަނީ ފެންވަރު ރަނގަޅު ގޮތެއްގައި ކުޑަކުދިންގެ އަޅާލުމުގެ އަގު ވަޒަންކޮށް ބަލައިގަތުން ކުރިއެރުވުމުގެ ގޮތުންނެވެ.
ލޮލުގެކޮއެފަދަ ދަރިންނަށް އަމާނާތްތެރިވެ، ތަރުބިއްޔަތުކުރުމުގެ ޒިންމާ އަދާކުރާ މި ދެވަނަމަންމައިންގެ އަގުވަޒަން ކޮށްލަން މިއަދަކީ ނުހަނު މުނާސަބު ދުވަހެއްކަން ޔަގީނެވެ. މިއަދު ހާއްސަކަމެއް ކޮށްލުން ކީއްތޯއެވެ. ހަމައެންމެ ކާޑެއް ދިނަސް އެންމެ ރަނގަޅުތާއެވެ. ސަރޕްރައިޒް ކޭކެއް ފަޅަން ގެނެސް ޝުކުރު އަދާކޮށްލުމުންް އެމީހުންގެ ހިތަށް ލިބޭނެ އުފާ ބުނެދޭކަށް ނޭނގޭނެއެވެ. ކޮންމެ މީހަކުވެސް އެމީހާ ކުރާ މަސައްކަތަށް ތައުރީފުގެ ބަސް އަޑުއަހާހިތްވުމަކީ އިންސާނުންގެ ގައިގައި ހުންނަ ފިތުރީ ކަމެކެވެ. އެހެންކަމުން މިއަދުގެ މުނާސަބާގައި، ވަގުތުކޮޅަކަށް ވަކިގަޑިއަކަށް ވިޔަސް، ތިޔަ މައިންބަފައިންގެ ލޯބިލޯބި ދަރިންކޮޅު ބަލައި އެކުދިންނަށް އޯގާތެރިވެ މަންމައެއްގެ ލޯބިދޭ ފަރާތްތަކުގެ އަގުވަޒަންކޮށްލަން ވަގުތުކޮޅެއް ހުސްކޮށްލާށެވެ. އަދި މިކަމުން އަމިއްލަ ހިތަށާއި ނަފުސަށް ލިބޭ އުފާ އިހުސާސްކޮށްލަމާތޯއެވެ.
މިއަދުގެ މުނާސަބާގައި ރާއްޖޭގެ ހުރިހާ ބޭބީސިޓާސް އަށް ހުވަދޫޓީމްގެ ފަރާތުން އައްސަރިބަހާއި ސާބަސް ދެމެވެ. ތިޔައީ ޝުކުރު ހައްގުވާ ލޯބިލޯބި ބައެކެވެ.