ތިމާގެ ދަރިފުޅަކީ ހިތުގެ ވިންދެވެ. ދިރިހުރުމުގެ އުންމީދެވެ. ކޮންމެ ބެލެނިވެރިޔަކުވެސް ތިމާގެ ދަރިފުޅާއި މެދު ފޮނި ހުވަފެންތަކެއް ދެކޭނެއެވެ. ކާމިޔާބު ދަރިއަކަށް ހެދުމަށް އެމީހަކަށް ވީ ވަރަކުން ބޮޑެތި ހޭދަތަކެއް ކުރާނެއެވެ.
މީހުންގެ ލޯބި ލިބި ކާމިޔާބު ދަރިންނަށް އެކުދީން ހެދުމަށް އެންމެ ފުރަތަމަވެސް ރީތި އާދަތަށް ދަސްކޮށްދިނުން މުހިއްމެވެ.
އެންމެ ފުރަތަމަ ދަރިފުޅަށް ނަމޫނާ ދައްކާށެވެ. ކަމެއް ކުރާށޭ ނުބުނެ ގޭގެ މާހައުލުން ގޭތެރެއިން މައިންބަފައިންނާއި އާއިލާގެ އެންމެން އެގޮތަށް އާދަތައް ބަހައްޓާށެވެ.
ދަރިފުޅު ގާތުގައި އެކަމެއް ކުރުމަށް ބުނާކަށް ނުޖެހޭނެއެވެ. ކުޑައިރުއްސުރެ އެކުއްޖާއަށް ފެންނަ ކަންތައްތަކަކީ އެކަންތައްތައް ނަކަލުކުރާނެ ކަންތައްތަކެވެ.
ތިބާގެ ދަރިފުޅު ކުރިމަތީގައި މައިންބަފައިންނާއި ބޮޑެތި މީހުންނަށް އިހްތިރާމްކޮށް އެމީހުންގެ އަގުވަޒަން ކުރާށެވެ. އެކުދިންވެސް މައިންބަފައިންނަށް އިހްތިރާމް ކުރާނެއެވެ.
އުފާވެރިކަމެއް އަދި ހިތާމަވެރިކަމެއް ވުމުން މާތްﷲ ގިނަގިނައިން ހަދުމަކުރާށެވެ. ހިތްތަކަށް ހަމަޖެހުން ލިބިގެން ވަނީ މާތްﷲ ހަދުމަކުރުމުންކަން އެކުދީންނަށް ހަދާންކޮށްދޭށެވެ.
އަމިއްލަ ގެއަށް ވަންނަމުން ވެސް އިސްލާމީ ރީތި ސަލާމުން ސަލާންގޮވުމަށް ދަރިފުޅަށް ބުނެދޭށެވެ.
ހުއްދަ ލިބިގެން ނޫނީ މީހެއްގެ ގެއަށް ވަނުމަކީ ގޯސްކަމެއް ކަން ބުނެދޭށެވެ.
އަމިއްލައަށް ހެދޭ ގޯސްތަށް ގަބޫލުކޮށް މާފަށް އެދެން އާދަކުރާށެވެ. މީހަކު ކަމެއް ކޮށްދީފި ނަމަ ޝުކުރުވެރިވާންޖެހޭނެކަން ބުނެދޭށެވެ.
ކަމެއް ކުރުމުގެ ކުރީން ހުއްދައަށް އެދެން ޖެހޭނެކަން ދަރިފުޅަށް ހަދާން ކޮށްދޭށެވެ.
ކާގަނޑީގައި ކާމޭޒު ދޮށުގައި ގެންގުޅެންޖެހޭ ރީތި އާދަތަށް ދަސްކޮށްދޭށެވެ.
ދިރިއުޅޭ ކޮޓަރިއާއި ގެންގުޅޭ ތަކެތި ތަރުތީބުން ސާފުތާހިރުކޮށް ބެހެއްޓުމަށް ބުނެދޭށެވެ.
ދަރިފުޅުގެ އުމުރާއި ގުޅޭގޮތުން ގޭތެރޭގެ ކަންތައްތަކުގައި މައިންބަފައިންނާއި ބޮޑެތި މީހުންނަށް އެހީއްތެރި ވުމަށް ދަސްކޮށްދޭށެވެ.
ތިބާ ހެއްދެވިފަރާތާއި މެދު ބަހައްޓަންވީ އަދަބުތަކުން ފެށިގެން ފޯނުކުރުމުގެ އަދަބު މިހެންގޮސް ކުއްޖާއަށް ދަސްކުރުން މުހިއްމު އެތައް އަދަބެއް އިސްލާމް ދީނުގައި އަންގަވާފައިވެއެވެ.
އެފަދަ ރީތި އަދަބުތަކަށް އަށަގަނެފައިވާ ކުއްޖާގެ ފަރާތުން ރަގަނޅު ހެޔޮލަފާ ސިފަތަށް ފެންނާނެއެވެ. އެންމެ ފުރަތަމަ ކުދީން އަދަބުވެރިކުރުވާށެވެ. ކާމިޔާބު ދަރިއަކަށް ތިބާގެ ތިޔަ ލޯބިވާ ދަރިފުޅު ވާނެ ކަމާއި މެދު ޝައްކެއް ނެތެވެ.