ތިނަދޫސިޓީގައި ސާފު ނުކޮށް އިންފާރު ނުރާނާތާ ގިނަ ދުވަސްވީ ފަޅު ގޯތިތަކެއްގެ ލިސްޓު އާންމުކޮށް ވެރިފަރާތުން އެގޯތިތައް ވަކިކުރުމުގެ ނޯޓިސް ނެރެފިއެވެ.
މިގޮތުން މިއަދުން ފެށިގެން ގޯތިތައް ސާފް ނުކޮށްފިނަމަ ގޯތި ވެރިފަރާތުގެ އަތުން ވަކި ކުރުމުގެ އަމަލީ މަސައްކަތްވެސް 7 ދުވަހުގެ ތެރޭގައި ކުރާނެ ކަމަށްވެސް އެ ނޯޓިހާއިއެކު ފާހަގަކޮށްފައި ވެއެވެ.
ތިނަދޫ ސިޓީ ކައުންސިލުން މިފަދަ ނޯޓިހެއް ނެރެފައިވަނީ މިއަދު މެންދުފަހުގެ ވަގުތެއްގައެވެ. ނަމަވެސް އޭގެ ބައިގަޑި އިރުފަހުން ނޯޓިސް ކައުންސިލް ޕޭޖުން ވަނީ ނަނގާލާފައެވެ. ނޯޓިސް ރިމޫވް ކޮށްލާފައިވާއިރު، އެފަދަ ނިންމުމެއް ނިންމާފައިވަނީ ކީއްވެ ކަމެއް އެކައުންސިލުން ހާމަކޮށްފައެއް ނުވެއެވެ. ނަމަވެސް ކައުންސިލް މޭޔަރު ސައުދު އަލީ ވިދާޅުވީ އިސްލާހު ކުރަންޖެހޭ ބައެއް ކަންކަން ހުރުމާއި އެކު އެކަންކަން އިސްލާހު ކުރުމަށް ކަމަށެވެ.
ގޯތިތައް ނެނގުމަށް ފުރަތަމަ އިއުލާންކުރި އެ ނޯޓީސްގައި ބުނެފައިވަނީ އިންފާރު ނުރާނާ ވާވެފައިވާ ގޯތިތަކުގެ ސަބަބުން ގޯތި ދޫކޮށްފައިވާ ސަރައްދުގައި ދިރިއުޅޭ މީހުންނަށް އުނދަގޫތަކެއް ވަމުންދާ ކަަމަށެވެ. އެހެންކަމުން އެ ކައުންސިލަށް އެކަމުގެ ޝަކުވާތައް ހުށައެޅިފައިވާ ކަމަށެވެ. ނަމަވެސް އެ މައްސަލަ ހައްލުކުރުމާއި ގުޅޭގޮތުން ވަކިއެއްޗެއް އެކައުންސިލުން އަދި ބުނެފައި ނުވެއެވެ.