ރާއްޖޭގައި އުޅެމުންދާ ބިދޭސީންގެ މައުލޫމާތުތައް ޖަމައަ ކުރުމަށްޓަކައި ފެށި އޮޕަރޭޝަން “ކުރަނގި” މެދުވެރިކޮށް މިހާތަނަށް 705 ބިދޭސީންގެ މައުލޫމާތު ނަގާފައިވާ ކަމަށް ހޯމްލޭންޑް ސެކިއުރިޓީ އެންޑް ޓެކްނޮލޮޖީ މިނިސްޓްރީ އިން ހާމަކޮށްފި އެވެ.
މިކަން ހާމަކޮށް، އެކްސް.ކޮމްގައި މިނިސްޓްރީ އޮފް ހޯމްލޭންޑް ސެކިއުރިޓީ އެންޑް ޓެކްނޮލޮޖީ އިންް ކޮށްފައިވާ ޕޯސްޓެއްގައި، އޮަޕަރޭޝަން ކުރަނގިގެ ދަށުން މިހާތަނަށް 705 ބިދޭސީންގެ މައުލޫމާތު ނަގާފައިވާ ކަމަށް ވަނީ ބުނެފައެވެ. އެ މިނިސްޓްރީ އިން ކުރިން ހާމަކޮށްފައިވާ ގޮތުގައި ހަމައެކަނި ކ ހިންމަފުށިން 532 ބިދޭސީންގެ މައުލޫމާތު ނަގާފައިވެއެވެ.
މީގެ ކުރިން މިނިސްޓްރީން ބުނެފައި ވަނީ، އޮޕަރޭޝަން ފެށި ކ. ހިންމަފުށިން އެކަނި 532 ބިދޭސީންގެ މައުލޫމާތު ނެގި ކަމަށެވެ.
މޯލްޑިވްސް ޕޮލިސް ސާވިސް އާއި އިމިގްރޭޝަނާއި ގުޅިގެން ހޯމްލޭންޑް ސެކިއުރިޓީ މިނިސްޓްރީން ކުރިއަށްގެންދާ “އޮޕަރޭޝަން ކުރަނގި” ގެ މަގުސަދަކީ، ގަވާއިދާ ހިލާފަށް ރާއްޖޭގައި އުޅޭ ބިދޭސީންގެ މައްސަލަ ހައްލުކުރުމެވެ. އެގޮތުން އެ މިނިސްޓްރީއިން ނިންމާފައި ވަނީ މި އޮޕަރޭޝަން ރާއްޖޭގެ އާބާދީ ބޮޑު 5 ސަރަހައްދެއްގައި ކުރިއަށް ގެންދިޔުމަށެވެެ.
ހޯމްލޭންޑް ސެކިއުރިޓީ އެންޑް ޓެކްނޮލޮޖީ މިނިސްޓަރު އަލީ އިހުސާން ހާމަކޮށްފައިވާ ގޮތުގައި ކުރިއަށް އޮތް ތިން އަހަރު ދުވަހުގެ ތެރޭގައި ގަވައިދާ ހިލާފަށް އުޅޭ ބިދޭސީންގެ މައްސަލައަށް ހައްލު ލިބިގެންދާނެއެވެ. އެގޮތުން، ފުރަތަމަ މަސައްކަތެއްގެ ގޮތުން ރާއްޖޭގައި އުޅޭ ހުރިހާ ބިދޭސީންގެ ފިންގާ ޕްރިންޓާއި ފޮޓޯ އަދި މައުލޫމާތު އެއް އަހަރު ދުވަހުގެ ތެރޭގައި އެއްކުރެވިގެންދާނެ ކަމަށް ވެސް އިހުސާން ވަނީ ވިދާޅުވެފައެވެ.