ގެއްލިފައިވާ އިރާނުގެ ރައީސް އިބްރާހީމް ރައިސީއާއި އެ ގައުމުގެ ހާރިޖީ ވަޒީރު ދަތުރު ކުރައްވަމުން ދިޔަ ހެލިކޮޕްޓަރު، މޫސުން ގޯސްވުމުގެ ސަބަބުން، ވައިގެމަގުން ކުރަމުންދިޔަ މަސައްކަތްތައް މެދުކަނޑާލައިފިއެވެ.
މިކަން ހާމަކޮށްފައިވަނީ އެމަޖެންސީ ސާވިސަސް އޯގަނައިޒޭޝަންގެ ތަރުޖަމާނު ބާބަކް ޔެކްޓަޕަރަސްޓްއެވެ. އޭނާ ވިދާޅުވި ގޮތުގައި، ހެލިކޮޕްޓަރު ހޯދުމަށް ކުރަމުން ދިޔަ މަސައްކަތަށް މޫސުމް ގޯސްވުމުގެ ސަބަބުން އިރު އޮއްސުމާއެކު، އަނދިރިކަން ބޮޑުވެ، ވަރަށް ބޮޑަށް ހުރަސްއެޅިފައިވާ ކަމަށެވެ. ކަންތައް މިހެން ދިމާވެ އިތުރަށް މަސައްކަތް ކުރިއަށް ނުގެންދެވނެ ކަން އެނގޭތީ ހެލިކޮޕްޓަރު ހޯދުން މެދުކަނޑާލާފައިވާކަމަށްވެސް އޭނާ ވަނީ ހާމަކުރައްވާފައެވެ.
އެހެން ނަމަވެސް، ތަބްރީޒާއި ތެހެރާނުގައި، އެއަރ އެމްބިއުލާންސްތައް އޮޕެރޭޓު ކުރެވޭނެ ދަނޑިވަޅަކަށް ތައްޔާރަށް ތިބިކަން އޮފިޝަލް ވަނީ ފާހަގަކުރައްވާފައެވެ.
އަދި ހަމައެހެންމެ ހެލިކޮޕްޓަރު ވެއްޓުނު ކަމަށް ބެލެވޭ ސަރަހައްދަށް އިތުރު އެމްބިއުލާންސްތައް ފޮނުވާފައިވާކަމަށްވެސް ބާބަކް ޔެކްޓަޕަރަސްޓް ވަނީ ވިދާޅުވެފައެވެ.
ގެއްލިފައިވާ އިރާނުގެ ރައީސް އިބްރާހީމް ރައިސީއާއި އެ ޤައުމުގެ ޚާރިޖީ ވަޒީރު ދަތުރު ކުރައްވަމުން ދިޔަ ހެލިކޮޕްޓަރު ހޯދުމަށް ދަނީ ގިނަ މަސައްކަތްތަކެއް ކުރަމުންނެވެ. މިމަސައްކަތުގެ ތެރޭގައި އީރާނުގެ ރެޑް ކްރެސެންޓުން 40 ޓީމެއް ފޮނުވައިފައިވާއިރު، ހެލިކޮޕްޓަރު ހޯދުމަށް އިރާނުގެ ސަލާމަތީ ބާރުތަކުގެ ހުރިހާ ވަސީލަތްތައް ބޭނުން ކުރުމަށްވެސް ވަނީ އަންގަވާފައެވެ.
މި ހާދިސާއަށް ގާތްގަނޑަކަށް ހަ ވަރަކަށް ގަޑިއިރު ވެފައިވާއިރު، އަދިވެސް ހެލިކޮޕްޓަރު ވެއްޓުނު ތަނެއް ހޯދިފައި ނުވާކަމަށް ނިއުޔޯކް ޓައިމްސް އިން ވަނީ ރިޕޯޓް ކޮށްފައެވެ.
އެގައުމުގެ ދައުލަތުގެ މީޑިއާތަކުން މިހާތަނަށް ލިބުނު ގެއްލުންތަކުގެ ރިޕޯޓެއް ހިއްސާކޮށްފައިނުވާއިރު، އަދިވެސް ރައީސް ހުންނެވި ތަނެއް ނުވަތަ ޙާލު ކަށަވަރުކޮށްނުދެވެއެވެ.