ހުސްވެފައިވާ އާންމު މެމްބަރުކަމުގެ މަގާމަށް ކުރިމަތިލުމަށް މޯލްޑިވްސް މީޑިއާ ކައުންސިލުން ހުޅުވާލައިފިއެވެ.
މޯލްޑިވްސް މީޑިއާ ކައުންސިލުގެ ޤާނޫނު ގެ ދަށުން އެކުލަވާލާފައިވާ މީޑިއާ ކައުންސިލުގެ މެމްބަރުކަމަށް މިއަދު ހުޅުވާލީ އާންމު މެންބަރުންގެ ތެރެއިން އިތުރު މެންބަރެއްގެ މަގާމް ހުސްވެފައިވާތީ ކަމަށް އެކައުންސިލުން ވަނީ ބުނެފައެވެ.
މީޑިއާ ކައުންސިލުން ބުނީ އާންމު މެންބަރުންގެ ގޮތުގައި ބަލާނީ މީޑިއާއާ ގުޅުންހުރި އެއްވެސް ދާއިރާއެއްގައި މަސައްކަތް ނުކުރާ ފަރާތްތަކަށް ކަމަށެވެ.
މީޑިއާ ކައުންސިލުގެ ގަވައިދު އޮންނަގޮތުން މެމްބަރެއްގެ މުއްދަތަކީ 2 އަހަރު ދުވަހެވެ. އެހެންކަމުން އެ ގަވައިދުގައި އޮޮންނަ ގޮތުން އެއްވެސް ފަރާތަކަށް ކައުންސިލުގެ މެންބަރުކަމުގައި ވިދިވިދިގެން 2 ދައުރު އަދާ ނުކުރެވެއެެވެ.
އާންމު މެންބަރުކަމަށް ކުރިމަތިލައްވާ ފަރާތްތައް ސެލެކްޓް ކުރުމުގައި ބަލާ މިންގަނޑުތަކަކީ:
- ޤާނޫނީ ދާއިރާއިން ނުވަތަ ދިވެހި ބަހުގެ ދާއިރާއަކުން ނުވަތަ އިންސާނީ ޙައްޤުތަކުގެ ދާއިރާއިން ނުވަތަ ދީނީ ޢިލްމުގެ ދާއިރާއިން ނުވަތަ އިޖްތިމާޢީ ސައިންސަސް ގެ ދާއިރާއަކުން މަތީ ތަޢްލީމު ޙާޞިލްކޮށްފައިވުން.
- އިޖްތިމާޢީ ތަރައްޤީއާއި ދުޅަހެޔޮ ކަންް (ޚާއްޞަ ގޮތެއްގައި ކުޑަކުދިންނާއި، އަންހެނުންނާއި، ނުކުޅެދުންތެރިކަމަށް މަސައްކަތްކުރުން ނުވަތަ އެކަށީގެންވާ ގޮތެއްގައި މަސައްކަތްކޮށްފައިވުން).
އެ ކައުންސިލްގެ މެމްބަރުކަަމަށް ޝަރުރުތު ފުރިހަމަވާ ފަރާތްތަކުން މި މަހު 23 ވާ ބުރާސްފަތި ދުވަހުގެ 14:00 ގެ ކުރިން، މީޑިއާ ކައުންސިލް އިންތިޚާބުގައި މެންބަރުކަމަށް ކުރިމަތިލުމަށް އެދޭ ފޯމު ފުރިހަމަ ކުރުމަށްފަހު ހުށަހަޅަންޖެހޭ ކަމަށްވެސް ވަނީ ބުނެފައެވެ.