އިނގިރޭސި ވިލާތުގެ ސަރުކާރުން ތަޣައްޔަރުވެފައިވާ ލޭ އެޅި މައްސަލަ ފޮރުވާފައިވާ ކަން ފެންމަތިވުމުން ބޮޑު ވަޒީރު ސުނާކް މައާފަށް އެދިއްޖެ
އިނގިރޭސި ވިލާތުގެ ކަމާބެހޭ ފަރާތްތަކާއި ޕަބްލިކް ހެލްތް ސަރވިސް އިން އެނގިހުރެ އެތައް ހާސް ބަލިމީހުންގެ ގަޔަށް ތަޣައްޔަރުވެފައިވާ ލޭއެޅުމުގެ ސަބަބުން ނުރައްކާތެރި އިންފެކްޝަން ފެތުރުނު މައްސަލަ އެތައް އަހަރެއް ވަންދެން ހަގީގަތް ފޮރުވާފައިވާކަން ތަހުގީގުން ވަނީ އެނގިފައެވެ.
އިނގިރޭސިވިލާތުގައި 1970 ގެ އަހަރުތަކުން ފެށިގެން 1990 ގެ އަހަރުތަކުގެ ކުރީކޮޅު ތަޣައްޔަރުވެފައިވާ ލޭ އެޅުމުގެ ސަބަބުން 30،000 އަށް ވުރެ ގިނަ މީހުންނަށް އެޗްއައިވީ އަދި ހެޕަޓައިޓިސް ފަދަ ވައިރަސް ޖެހިފައިވާ ކަމަށް އިންފެކްޓެޑް ބްލަޑް އިންކުއަރީއިން ވަނީ ބުނެފަ އެވެ.
އިނގިރޭސިވިލާތުގެ ސަރުކާރު ހިންގާ ނޭޝަނަލް ހެލްތު ސަރވިސް (އެންއެޗްއެސް) 1948 ވަނަ އަހަރު އުފެދުނު ފަހުން އެ ކުންފުނީގެ ތާރީހުގައި ކުރިމަތިވި އެންމެ ނުރައްކާތެރި ހާދިސާގެ ގޮތުގައި ގިނަ ބަޔަކު ދެކެމުން އަންނަ މި ހާދިސާގައި 3،000 މީހުން މަރުވެ، އެތައް ބަޔަކު އުމުރު ދުވަހު ނުރައްކާތެރި ބަލިތައް ތަހައްމަލް ކުރަން ޖެހުނެވެ.
ވަޒީރުންނާއި މުއައްސަސާތައް ފެއިލްވެފައިވާތީ ވަރަށް ބޮޑަށް ހިތާމަކުރާކަމަށް ބޮޑުވަޒީރު ރިޝީ ސުނަކް ވަނީ ބުނެފައެވެ.
"މި ހާދިސާގައި ގެއްލުންވި އެންމެނަށް ވަރަށް ބޮޑަށް މައާފަށް އެދެން." މަޖިލީހުގައި ވާހަކަ ދައްކަމުން އޭނާ ވަނީ ހާލުގައި ޖެހުނު މީހުންނަށް އޭގެ ބަދަލު ދޭނެ ކަމަށް ވައުދުވެފަ އެވެ.
މިދިޔަ ހޯމަ ދުވަހު ޝާއިއުކުރި އަދި 2،500 އަށް ވުރެ ގިނަ ސަފުހާގެ މައްޗަށް އެކުލެވޭ ރިޕޯޓުގައި ގެއްލުން ލިބުނު މީހުންނަށާއި އެމީހުންގެ އާއިލާ މީހުންނަށް އަލިއަޅުވާލާފައެވެ.
ފަނޑިޔާރު ބްރަޔަން ލެންގްސްޓާފް ލިޔެފައިވާ މި ލިޔުމުގައި ވަނީ 1993 ވަނަ އަހަރު ސަރުކާރުގެ އޮފިޝަލުން ލިޔުންތައް ނައްތާލި ކަމުގެ ހެއްކާއި ހިޔާނާތް ސިއްރުކުރަން މަސައްކަތްކޮށްފައިވާކަން ފާހަގަކޮށްފައެވެ.
އޮޅުވާލުމުގެ މަކަރުވެރި ރޭވުމެއްގެ ސަބަބުން އެތަކެއް ރައްޔިތުންނެއްގެ ފުރާނަ ނުރައްކަލަކަށް ވެއްޓި ދިރިއުޅުން ހަލާކުވެގެން ދިޔައެވެ. އެއާއެކު މިހާދިސާއާއި ގުޅުންހުރި ގިނަ ޙަޤީޤަތްތަކެއް ފޮރުވިފައި އެބަހުރިކަމަށް ރިޕޯތްގައި ބުނެފައި ވެއެވެ .
އޭގެ ތެރޭގައި އެކްސިޑެންޓްތަކާއި ސާޖަރީތަކުގައި ލޭ އަޅަން ޖެހޭ މީހުންނާއި ހިމޯފީލިއާ ފަދަ ލޭގެ ބަލިތައް ހުންނަ މީހުން ވެސް ހިމެނެ އެވެ. މަރުވި 3،000 މީހުންގެ އިތުރުން އެތައް ބަޔަކު މުޅި އުމުރަށް ސިއްހީ ބަލިމަޑުކަމެއްގެ ޝިކާރައަކަށް ވެފައިވެއެވެ.
މި ހާދިސާގައި މަރުވި މީހުންގެ އިތުރުން، ގެއްލުން ލިބުނު މީހުންނާއި އެމީހުންގެ އާއިލާތަކަށް އެތައް ބިލިއަން ޕައުންޑުގެ ބަދަލު ދިނުމަށް އަންނަ އަންގާރަ ދުވަހު ސަރުކާރުން އިއުލާނު ކުރުމަށް ވަނީ ނިންމާފައެވެ.
ކުރީގެ ބޮޑުވަޒީރު ތެރީސާ މޭ ވަނީ 2017 ވަނަ އަހަރު އެ ގައުމުގެ އެންމެ ބޮޑު އެއް އިންކުއަރީ ފައްޓަވާފަ އެވެ.
ސުރޭޝް ވަގެލާ (މިހާރު 61 އަހަރު )، ބުނީ މިއީ 40 އަހަރުވީ ހަނގުރާމައެއް ފަދަ ކަމެއް ކަމަށާއި އެކަން ނިމުމަކަށް އައިސްފައިވާ މިވަގުތު ވަރަށް ތަފާތު އިހުސާސްތަކެއް ކުރެވޭ ކަމަށެވެ.
އުމުރުން ގާތްގަނޑަކަށް 13 އަހަރުގައި ހީމޯފީލިއާ އަށް ފަރުވާ ދެމުން ދަނިކޮށް ތަޣައްޔަރުވެފައިވާ ލޭ އެޅުމުގެ ސަބަބުން އޭނާއަށް ވަނީ އެޗްއައިވީ އާއި ހެޕަޓައިޓިސް ސީ ޖެހިފަ އެވެ.