ރ. އުނގޫފާރުގައި ފެންގަނޑަކަށް އެރުނު ވަގުތު ކަރަންޓުގައި ޖެހުނު ކުއްޖާ ސަލާމަތް ކުރަން މަސައްކަތް ކުރި ޒުވާނާގެ ހާލު ވަރަށް ސީރިއަސް ކަމަށާއި އެ ޒުވާނާއަށް އައިސީޔޫގައި ފަރުވާދެމުންދާއިރު އަނެއް ދެކުދިންނަށް ފަރުވާ ދެމުން ދަނީ އިމަރޖެންސީގައި ކަމަށް އުނގޫފާރު ހޮސްޕިޓަލުން ހާމަކޮށްފިއެވެ.
އުނގޫފާރު ހޮސްޕިޓަލުގެ މެނޭޖަރ ހުސެން އާސިފް، ހުވަދޫ ނޫހަށް ވިދާޅުވީ ފެންގަނޑުން ކަރަންޓު ޖެހިގެން ހޮސްޕިޓަލަށް ގެންދިޔަ ތިން ކުދިންގެ ތެރެއިން ކުޑަ ދެކުދިންގެ ހާލު މިހާރު އަންނަނީ ރަނގަޅު ވަމުން ކަމަށާއި އެހެންނަމަވެސް އެކުދިން އަދި ތިބީ އިމަރޖެންސީ އޮބްޒަރވޭޝަނުގައި ކަމަށެވެ. އަދި އޭގެ ތެރެއިން 18 އަހަރުގެ ކުއްޖާގެ ހާލު މާބޮޑަށް ސީރިއަސް ކަމަށްވާތީ ކުއްޖާއަށް ފަރުވާދެމުން އަންނަނީ އައިސީޔޫގައި ކަމަށާއި ކުއްޖާގެ ހާލު ސީރިއަސް ވުމުން ކަމާ ގުޅޭ ހާއްސަ ޑޮކްޓަރުންނާއި ސިއްހީމާހިރުން އެކުއްޖާއާ ގާތުން ފަރުވާދެމުން އަންނަ ކަމަށެވެ.
މިހާދިސާ ދިމާވީ ސީދާ ކިހިނެއް ކޮން ސަބަބަކާ ހުރެ ކަމެއް އެނގިފައި ނުވި ނަމަވެސް އެރަށުން މައުލޫމާތު ލިބުނު ގޮތުގައި އެކުދިން ކަރަންޓުގައި ޖެހެން ދިމާވީ އެ ފެންގަނޑު ކައިރީގައި ހުރި މަގު ބައްތިއެއްގެ ވަޔަރިން މައްސަލައެއް ދިމާވެފައިވުމުން އޭގެއިން އެކުދިން ފައިބާފައި ތިބި ފެންގަނޑަށް ކަރަންޓު ދޫވެފައި ހުރުމުން ކަމަށް ވެއެވެ. އަދި މިހާރު ހާލު ދެރަވެ އައިސީޔޫގައި ފަރުވާދެމުންދާ 18 އަހަރުގެ ކުއްޖާއަކީ، ވާރޭވެހިގެން ހެދިފައި އޮޮތް މިފެންގަނޑަށް އެންމެ ފުރަތަމަ ކުޅެން ފޭބި އަށްއަހަރުގެ ފިރިހެންކުއްޖާ ސަލާމަތް ކުރަން ފޭބު ކުއްޖާ ކަމަށްވެސް މައުލޫމާތު ވަނީ ލިބިފައެވެ. އަދި އިމަރޖެންސީގައި ފަރުވާދެމުންދާ އަނެއްކުއްޖަކީވެސް ފެންގަނޑަށް ފޭބި ކުއްޖާ ސަލާމަތް ކުރުމަށް އެތަނާ ކައިރިވި ކުއްޖެއް ކަމަށްވެއެވެ.
“12 އަހަރުގެ އަންހެން ކުއްޖާއަށް ފުރަތަމަ ފެންގަނޑުގައި ކަރަންޓު ހުރި ކަމުގެ އިހުސާސް ވެގެން ކުއްޖާގެ ގެ ވަރަށް ކައިރީގައި ހުރުމުން އެވާހަކަ ބުނަން ދިޔައީ، އެވަގުތު މި އިވުނީ 8 އަހަރުގެ ކުޑަ ކުއްޖާ ހަޅޭއްލަވާ ރޯ ކަހަލަ އަޑެއް، ދެން އެކުއްޖާ ސަލާމަތް ކުރަން އެ 18 އަހަރުގެ ކުއްޖާ ކުރި މަސައްކަތުގައި މިހާދިސާ މިދިމާވީ،” ރަށު ހޮސްޕިޓަލުން ވާހަކަ ދެއްކި ފަރާތުން ކަން ހިނގި ގޮތް ހިއްސާކުރައްވަމުން ބުނެފައިވަނީ ކަރަންޓުގައި ޖެހުނު އަށް އަހަރުގެ ފިރިހެން ކުއްޖާއާއި 18 އަހަރުގެ ފިރިހެން ކުއްޖާއަކީ އެއް ގެއެއްގެ ދެ ކުދިން ކަމަށެވެ.
ކުޑަކުދިންގެ ޕާކު ކައިރީގައި ހުރި މަގުބައްތި އެއް ކައިރީ އޮތް ފެންކޯރުގައި ކުޅެން ތިބި ކުޑަކުދިންތަކެއް ކަރަންޓުގައި ޖެހިގެން އުޅޭ ކަމަށް މިއަދު 13:30 ހާ އިރު ފުލުހުންނަށް ރިޕޯޓް ލިބިފައިވާ ކަމަށެވެ. މި ހާދިސާ ގައި އަނިޔާވެފައި ވަނީ 18 އަހަރުގެ ފިރިހެންކުއްޖަކާއި 12 އަހަރުގެ އަންހެން ކުއްޖަކަށް ކަމަށްވެސް ފުލުހުން ވަނީ ބުނެފައެވެ. ދެކުދިންނަށްވެސް މިވަގުތު އުނގޫފާރު ހޮސްޕިޓަލުން ފަރުވާދެމުން ދާ ކަމަށާއި އެ މަންޒަރު ފެނުނު އެހެން ކުއްޖަކު އަނބުރައިގެން ވެއްޓިފައިވާތީ އެކުއްޖާއަށްވެސް ފަރުވާ ދެމުންދާ ކަމަށް ފުލުހުން ބުނެފައިވެއެވެ.
ފުލުހުން ބުނީ މިކަމާ ގުޅޭ ގޮތުން ބަލަން ޖެހޭ ކަންކަން ބަލަމުންދާކަމަށާއި އިތުރަށް މައްސަލަ ތަހުގީގު ކުރަމުންދާ ކަމަށެވެ.
އެ ކުދިން ކަރަންޓުގައި ޖެހުނު ފެންގަނޑު ވަށައިގެންވާ ސަރަހައްދު ފުލުހުން މިހާރު ވަނީ ޓޭޕު ދަމައި ބަންދުކޮށްފައެވެ.