އުރުދުންގެ (ޖޯޑަންގެ) މިނިވަން ދުވަހުގެ މުނާސަބަތުގައި އެ ގައުމުގެ ރަސްގެފާނު އަބުދުالله ބިން އަލް-ހުސައިން ދެވަނަ އަދި ބޮޑުވަޒީރު ބިޝަރް އަލް ހަސަވްނީއަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ތަހުނިޔާ ފޮނުއްވައިފިއެވެ.
އުރުދުންގެ ރަސްގެފާނާއި ބޮޑުވަޒީރަށް ތަހުނިޔާގެ މެސެޖް ރައީސް ޑރ މުއިއްޒު ފޮނުއްވާފައި ވަނީ ވަކިވަކިންނެވެ. އެ މެސެޖުތަކުގައި ރައީސް ޑރ މުއިއްޒު ވިދާޅުވީ އެ ގައުމުގެ މިނިވަން ދުވަހުގެ ތަހުނިޔާ އެ މަނިކުފާނުގެ ފަރާތްޕުޅުންނާއި އަދި ދިވެހި ސަރުކާރާއި ރައްޔިތުންގެ ނަމުގައި އިހުލާސްތެރިކަމާއެކު އެ ގައުމުގެ ރަސްގެފާނާއި ބޮޑުވަޒީރާއި އަދި ހަމައެހެންމެ އެގައުމުގެ ސަރުކާރާއި ރައްޔިތުންނަށް ފޮނުއްވާ ކަމަށެވެ.
ހަމަމިއާއެކު ރާއްޖެއާއި އުރުދުންއާ ދެމެދުގެ އަހުވަންތަކަމުގެ ގުޅުން ފާހަގަކުރައްވައި ރައީސް ޑރ މުއިއްޒު ވިދާޅުވީ ކުރިޔަށް އޮތް އަހަރުތަކުގައިވެސް ދެގައުމުގެ ރައްޔިތުންނަށް އެންމެ ފައިދާ ކުރަނިވި ގޮތެއްގައި އެ ގުޅުން އިތުރަށް ބަދަހިވެގެން ދިއުމަށް އެދިވަޑައިގަންނަވާ ކަމަށެވެ.
އަދި ހަމައެހެެންމެ އުރުދުންގެ ރަސްގެފާނާއި ބޮޑުވަޒީރަށް ފުރިހަމަ ސިއްހަތަކާއި ދުޅަހެޔޮކަން ދެއްވުމަށް އެދިވަޑައިގަންނަވާކަމަށްވެސް ރައީސް ވަނީ ވިދާޅުވެފައެވެ. ހަމަމިއާއެކު އެ ގައުމަށާއި އެ ގައުމުގެ ރައްޔިތުންނަށް ކުރިއެރުމާއި ފާގަތިކަން އެދިވަޑައިގަންނަވާ ކަމަށް ރައީސް ވިދާޅުވިއެވެ.