ގއ.ވިލިނގިލީގައި ކުރިއަށްދާ ޖަމްޢިއްޔާތަކުގެ މަހާސިންތާގެ ފުރަތަމަ ދުވަސް ކާމިޔާބުކަމާއެކު ނިންމާލައިފިއެވެ.
4 ދުވަހަށް ކުރިއަށްދާ މި މަހާސިންތާއަކީ ޖަމިއްޔާތައް ބާރުވެރިކުރުމާއި ޖަމިއްޔާތައް ހަރުދަނާ ކުރުމަށް ޔޫތު މިނިސްޓްރީން ފަށާފައިވާ މަސައްކަތުގެ ދަށުން ހުވަދު އަތޮޅުގައި ކުރިއަށްގެންދާ ފުރަތަމަ މަހާސިންތާއެވެ.
މި މާހާސިންތާގައި ގއ. އަތޮޅުގެ ހުރިހާ ރަށަކުންވެސް ބައިވެރިވެރިވެފައި ވެއެވެ. އެގޮތުން މަހާސިންތާގައި ގާތްގަޑަކަށް 20 ޖަމިއްޔާއިން ވަނީ ބައިވެރިވެފައެވެ. އޭގެ އިތުރުން ކޮންމެރަށެއްގެވެސް ކައުންސިލް މެމްބަރަކާއި އަންހެނުންގެ ތަރައްގީއަށް މަސައްކަތްކުރާ ކޮމެޓީގެ މެމްބަރަކުވެސް ބައިވެރިވެފައިވެއެވެ. އަދި ކޮންމެ ރަށެއްގެ ޔޫތު އެސޯސިއޭޓް ވެސް ވަނީ ބައިވެރިވެފައި ވެއެވެ.
ވިލިނގިލީގައި ކުރިއަށްދާ ޖަމްޢިއްޔާތަކުގެ މަހާސިންތާ/ފޮޓޯ: ޔޫތު މިނިސްޓްރީ
މި މަހާސިންތާގައި ޖަމިއްޔާތައް ހަރުދަނާ ކުރުމަށް އެހީތައް ހޯދާނެ ގޮތާއި، ކަންކަމުގައި ކުރިއަށްދާނެ ގޮތާއި ގުޅޭ ގޮތުން ވަނީ ބައިވެރިން ހޭލުންތެރި ކުރުމުގެ ސެޝަންތައްވެސް ބާއްވާފައެވެ.
މޯލްޑިވްސް ރެޑް ކްރެސެންޓްފަދަ ޖަމިއްޔާތަކުގެ ތަޖުރިބާވެސް ވަނީ ބައިވެރިންނާ ހިއްސާ ކުރައްވާފައެވެ.
މި މަހާސިންތާ ކުރިއަށްދާނީ މި މަހުގެ 25 ފެށިގެން 28 ވަނަ ދުވަހުގެ ނިޔަލަށެވެ.
ވިލިނގިލީގައި ކުރިއަށްދާ ޖަމްޢިއްޔާތަކުގެ މަހާސިންތާ/ ފޮޓޯ: ޔޫތު މިނިސްޓްރީ
ސެޝަންތައް ކުރިއަށް ގެންގޮސްފައިވާއިރު، މޯލްޑިވްސް ޕޮލިސް ސަރވިސް، މިނިސްޓްރީ އޮފް ޔޫތު އެމްޕަވަރމަންޓް އިންފޮމޭޝަން އެންޑް އާޓްސް، މޯލްޑިވްސް ރެޑް ކްރެސެންޓް، ލޯކަލް ގަވަރމަންޓް އޮތޯރިޓީ، މިނިސްޓްރީ އޮފް ސޯޝަލް އެންޑް ފެމިލީ ޑިވެލޮޕްމަންޓް،އަދި އޭޝިއާ ފައުންޑޭޝަން އިންވެސް ބައިވެރިވެފައި ވެއެވެ.