ތިނަދޫ ސިޓީ ޑަބްލިއުޑީސީ ވޮލީ މުބާރާތް 2024 ގައި އޯލް ސްޓަރ އަދި ކުއީންބީސް ކުޅުނު މެޗު ވަރުގަދަ ކުރިމަތިލުމަކަށްފަހު އޯލް ސްޓަރ އިން މެޗު ކާމިޔާބު ކޮށްފިއެވެ.
މުބާރާތުގައި މިރޭ ކުޅުނީ 5 ވަނަ މެޗެވެ.
އަންހެން ފިރިހެން ވަކިން ދެ ޑިވިޝަނަށް ބަހާލައިގެން ތިނަދޫ ސިޓީ ސްޓޭޑިއަމްގެ ވޮލީ ކޯޓުގައި ކުރިއަށްދާ މުބާރާތުގައި މިރޭވެސް 2 މެޗެއް ކުޅުމަށްވަނީ ހަމަޖެހިފައެވެ.
މިރޭ ފުރަތަމަ ކުޅުނީ އަންހެން ޑިވިޝަނުގެ މެޗެކެވެ. އޯލް ސްޓަރ އަދި ކުއީންބީސް ބައްދަލުކުރި މެޗު 5 ސެޓުން ކާމިޔާބުކުރީ އޯލްޑް ސްޓަރ އެވެ. ސެޓުތައް ގެންގޮސްފައިވަނީ 22-25، 25-15، 25-21، 18-25، އަދި 15-13، އިންނެވެ. މި މެޗުގެ މޮޅު ކުޅުންތެރިޔަކަށް ހޮވިފައިވަނީ އޯލް ސްޓަރގެ ޖޯޒީ ނަންބަރު 7 ޝްރިދާ ސައީދުއެވެ.
ތިނަދޫ ސިޓީ ޑަބްލިއުޑީސީ ވޮލީބޯޅަ މުބާރާތު ތެރެއިން/ ފޮޓޯ: ރާޅު އާޓްސް
މިރޭކުޅުުނު ދެވަނަ މެޗުގައި ވާދަކުރީ ތިނަދޫ ޕޮލިސް އަދި ސޭމް ސޭމްއެވެ.
ތިނަދޫ ސިޓީ އަންހެނުންގެ ތަރައްޤީ އަށް މަސައްކަތްކުރާ ކޮމެޓީ އާއި މިނިސްޓްރީ އޮފް ސްޕޯޓްސްގެ ތިނަދޫ ސިޓީ ސްޓޭޑިއަމް ގުޅިގެން ކުރިޔަށް ގެންދާ މި މުބާރާތުގައި މުޅިއެކު 11 ޓީމް ވަނީ ބައިވެރިވެފައެވެ. އަންހެން ޑިވިޝަނުގައި 5 ޓީމު ވާދަކުރާއިރު ފިރިހެން ޑިވިޝަނުގައި 6 ޓީމު ވާދަކުރެއެވެ. ފިރިހެން ޑިވިޝަނުގައި ބައިވެރިވެފައިވާ ޓީމުތަކަކީ ޝޫޓިންގް ސްޓަރ، މޯލްޑިވްސް ސްޓަރ، ސްކޯޕިއަންސް، ޑީސީ މެންސް، ސޭމް ސޭމް އަދި ތިނަދޫ ޕޮލިހެވެ.
އަންހެން ޑިވިޝަނުުގަައި ވާދަކުރާ ޓީމުތަކަކީ ފިޓް ފެމިނައިން، އޯލް ސްޓަރ، ޑީއާރުސީ ވިމެންސް، އިންފިނިޓީ އަދި ކުއީން ބީސް އެވެ.
މުބާރާތުގެ ކުޅުން މާދަމާ ވެސް ކުރިއަށްދާނެއެވެ. މާދަމާ ހަވީރު ކުޅޭ ފިރިހެން ޑިވިޝަނުގެ މެޗުގައި ޝޫޓިންގ ސްޓާސް ނުކުންނާނީ މޯލްޑިވްސް ސްޓާސްއާ ދެކޮޅަށެވެ. މާދަމާ ރޭ ދެ މެޗެއް ކުޅޭއިރު އަންހެން ބައިގެ މެޗުގައި ކުއީން ބީސް އިން އޯލް ސްޓާސްއާ ވާދަކުރާއިރު ފިރިހެން ބައިގައި ތިނަދޫ ޕޮލިސް ނުކުންނާނީ ސޭމް ސޭމްއާ ދެކޮޅަށެވެ.
މި މުބާރާތުގެ އެސޯސިއޭޓެޑް ޕާޓްނަރަކީ ތިނަދޫ ސިޓީ ސްޓޭޑިއަމެވެ. މީޑިއާ ޕާޓްނަރަކީ ހުވަދޫ މީޑިއާއެވެ. ފޮޓޯގްރަފީ ޕާޓްނަރަކީ ރާޅުއެވެ. ގްރެޕިކްސް ޕާޓްނަރަކީ ޗައްޕަލާ ސްޓޫޑިއޯއެވެ.
ޖޫން މަހުގެ 5ގެ ނިޔަލަށް ކުރިއަށްދާ މި މުބާރާތުގެ ހުރިހާ މެޗެއް ވެސް ކުޅުމަށް ހަމަޖެހިފައިވަނީ ތިނަދޫ ސިޓީ ސްޓޭޑިއަމްގެ ވޮލީ ކޯޓުގައެވެ.