ޑިޖިޓަލް ޓްރާންސްފޮމޭޝަން، ނުވަތަ ރާއްޖެ ޑިޖިޓަލް އިގުތިސާދެއް އޮތް ގައުމަކަށް ބަދަލުކުރުމުގެ މަސައްކަތުގައި ބައިނަލްއަޤްވާމީ މުޖްތަމައުގެ އެހީތެރިކަމާއި ޕްރައިވެޓް ސެކްޓަރުގެ އިންވެސްޓްމަންޓްތައް މުހިއްމުކަމަށް ރައީސް ޑރ މުހައްމަދު މުއިއްޒު ވިދާޅުވެއްޖެއެވެ.
ރައީސް ޑރ މުއިއްޒު މިފަދައިން ވިދާޅުވެފައި ވަނީ ހަތަރުވަނަ “އިންޓަނޭޝަނަލް ކޮންފަރެންސް އޮން ސްމޯލް އައިލެންޑް ޑިވެލޮޕިން ސްޓޭޓްސް” ހަވާސާގައި ކުރިއަށް ގެންދިޔަ “ސްމާޓް މޯލްޑިވްސް ޖާނީ ޓުވާޑްސް އަ ޑިޖިޓަލް އިންކްލޫސިވް ކޮމިއުނިޓީ” ގައި ވާހަކަފުޅު ދައްކަވަމުންނެވެ.
ރައީސް ވިދާޅުވީ ރާއްޖެއަކީ އަކީ ޑިޖިޓަލް ބަދަލުތައް ގެނައުމުގައި ކާމިޔާބުގައުމެއް ކަމަށާއި ޑިޖިޓަލް ޓްރާންސްފޮމޭޝަނެއްގެ ތެރެއިން ކުރަންޖެހޭ ވަރަށް ގިނަ މަސައްކަތްތައް އަދިވެސް އެބަހުރިކަމަަށެވެ. އެހެން ނަމަވެސް މިއީ އެއްވެސް ބަޔަކަށް އެކަނި ކުރެވޭނެ މަސައްކަތެއް ނޫންކަން ފާހަގަކުރައްވައި ރައީސް ވިދާޅުވީ އެހެންކަމުން މި މަސައްކަތުގައި ބައިނަލްއަޤްވާމީ މުޖްތަމައުގެ އެހީތެރިކަމާއި ޕްރައިވެޓް ސެކްޓަރުގެ އިންވެސްޓްމަންޓްތައް މުހިއްމުކަމަށެވެ.
ރައީސް ވިދާޅުވީ ޑްރޯން ބޭނުންކޮށްގެން ބޭހާއި ގުޅޭ ސާމާނު އެކި ސަރަހައްދުތަކަށް ފޯރުކޮށްދިނުމަށް ތައްޔާރުވަމުންދާއިރު، އާޓިފިޝަލް އިންޓެލިޖެންސް ބޭނުންކޮށްގެން ތިމާވެށި މޮނިޓަރކުރެވޭނެ ގޮތްތައް ހޯދަމުންދާކަމަށެވެ..
އަދިވެސް އިތުރުކަންކަމަށް އަލިއަޅުވައިލައްވަމުން ރައީސް ޑރ މުއިއްޒު ވަނީ ޑިޖިޓަލް ޓްރާންސްފޮމޭޝަނަކަށް އޮތް ސައިބަރ ސެކިއުރިޓީއާ ގުޅޭ މައްސަލަތަކުގެ ކަންތައްވެސް ފާހަގަކުރައްވާފައެވެ. އިންޓަނެޓް ބޭނުންކޮށްގެން ޤާނޫނާއި ގަވާއިދާއި ހިލާފަށް ހިންގާ ހަރަކާތްތަކަކީ މުޅި ދުނިޔެއަށްވެސް ކުރިމަތިވެފައި އޮތް ނުރައްކަލެއްކަން ފާހަގަކުރަައްވައި ރައީސް ވިދާޅުވީ ހަރުދަނާ ސައިބަރ ސެކިއުރިޓީ އިންފްރާސްޓްރަކްޗަރތައް ޤާއިމްކުރުމަކީ ކޮންމެހެންވެސް ކުރަންޖެހޭ ކަމެއްކަމަށެވެ.
މި ސަރުކާރުން ނެޝަނަލް ސެންޓަރ ފޮރ އިިންފޮރމޭޝަން ޓެކްނޮލޮޖީގެ ދައުރު ފުޅާކޮށް، ނެޝަނަލް ޓެކްނޮލޮޖީ ގަވަރނަންސް ހަރުދަނާކުރަންޖެހޭ ވަށާޖެހޭ ހައްލުތަކެއް ހޯއްދަވާނޭކަމަށްވެސް ރައީސް ވަނީ ވިދާޅުވެފައެވެ. މީގެއިތުރުން ނެޝަނަލް ސައިބަރ ސެކިއުރިޓީ އެޖެންސީއެއް ޤާއިމްކޮށް، ސައިބަރ ސެކިއުރިޓީއާ ގުޅޭ ޤާނޫނުތައް އެކުލަވާލުމަށް މަސައްކަތްކުރަމުންދާކަމަށްވެސް ރައީސުލްޖުމްހޫެރިއްޔާ ވިދާޅުވިއެވެ.
ރައީސުލްޖުމްހޫރިއްޔާގެ ވާހަކަފުޅުގައި ވަނީ މި ދާއިރާއިން ރާއްޖެއިން އެހީތެރިކަން ހޯދަން ބޭނުންވާ ކަންކަމުގެ މައްޗަށްވެސް އަލިއަޅުއްވާލައްވާފައެވެ. އެގޮތުން އައު އީޖާދުތަކާއި ޓެކްނޮލޮޖީއަށް އިންވެސްޓްކުރުން އިތުރުކުރުމާއި، ޤާނޫނުތަކާއި ގަވާއިދުތައް އެކުލަވާލުމުގައި ފަންނީ މާހިރުންގެ އެހީތެރިކަމާއި، ސަރަޙައްދީ އަދި ބައިނަލްއަޤްވާމީ މިންގަނޑުތައް ކަނޑައެޅުމުގެ ހުރިހާ ފަރާތްތަކެއްގެ ބައިވެރިވުން ހިމެނުމަށް އެމަނިކުފާނުގެ ވާހަކަފުޅުގައި ގޮވާލެއްވިއެވެ.