މިއަހަރުގެ ތެރޭގައި ރާއްޖެ ޓްރާންސްޕޯޓް ލިންކް (އާރުޓީއެލް) ފެރީގެ ހިދުމަތް ނ. އަތޮޅާއި، ރ. އަތޮޅު އަދި ބ. އަތޮޅުގައި ފަށާނެ ކަމަށް ޓްރާންސްޕޯޓް މިނިސްޓްރީން ބުނެފި އެވެ.
އެ މިނިސްޓްރީން އިއްޔެ ބޭއްވި ނޫސްވެރިންގެ ބައްދަލުވުމެއްގައި މައުލޫމާތު ދެއްވަމުން ޓްރާންސްޕޯޓު މިނިސްޓަރު މުހައްމަދު އަމީން ވިދާޅުވީ، މިއަހަރު ތެރޭގައި ތިން އަތޮޅެއްގައި އާރްޓީއެލް ފެރީގެ ހިދުމަތް ފަށަން ސަރުކާރުން ނިންމާފައިވާ ކަމަށެވެ.
އެގޮތުން އަންނަ ޖޫން މަހު ނ. އަތޮޅުގައި އާރްޓީއެލް ފެރީގެ ހިދުމަތް ފަށާނެ ކަމަށާއި، ސެޕްޓެމްބަރު މަހުގައި ރ. އަތޮޅުގައި އަދި މިއަހަރުގެ ނޮވެމްބަރު މަހުގައި ބ. އަތޮޅުގެ ތެރޭގައި އެ ހިދުމަތް ފަށާނެ ކަމަށް މިނިސްޓަރު ވިދާޅުވި އެވެ.
އޭގެ އިތުރުން އާރްޓީއެލް ފެރީގެ ރޫޓުތަކަށް ބަދަލު ގެނެސްގެން އެ ހިދުމަތަށް ސަރުކާރުން ދޫކުރާ ސަބްސިޑީގެ އަދަދު މަދުކުރެވޭނެ ކަމަށް މިނިސްޓަރު އަމީން ވިދާޅުވި އެވެ. އަދި 2022 ވަނަ އަހަރު އާރްޓީއެލް ފެރީގެ ހިދުމަތަށް ސަބްސިޑީގެ ގޮތުގައި 40 މިލިއަން ރުފިޔާ ހަރަދުކޮށްފައިވާއިރު، 2023 ވަނަ އަހަރު އަށް އަތޮޅަކަށް ޖުމުލަ 102 މިލިއަން ރުފިޔާ ހަރަދުކޮށްފައިވާ ކަން މިނިސްޓަރު ފާހަކުރެއްވި އެވެ.
އެމްޓީސީސީއިން ފޯރުކޮށްދޭ އާރްޓިއެލް ފެރީގެ ހިދުމަތް މިހާރު ފަށާފައި ވަނީ އެންމެ ރާއްޖޭގެ އެންމެ އުތުރުން ހއ. އަދި ހދ. އަތޮޅާއި ށ. އަތޮޅާއި ޅ. އަތޮޅުގެ އިތުރުން ދެކުނުން ގއ. އަތޮޅާއި، ގދ. އަތޮޅުގެ އިތުރުން ފުވައްމުލައް އަދި އައްޑު ސިޓީގަ އެވެ.