ރަސްމީ ދަތުރުފުޅެއްގައި ފޮރިން މިނިސްޓަރު މޫސާ ޒަމީރު ކުރިއަށް އޮތް ޖޫން މަހުގެ ތިނެއްގައި އަވަށްޓެރި ލަންކާއަށް ވަޑައިގަންވަން ހަމަޖެހިފައިވާ ކަމަށް ފޮރިން މިނިސްޓްރީން ބުނެފި އެވެ.
ހާރިޖީ ވުޒާރާއިން މިއަދު ބުނި ގޮތުގައި ޒަމީރު، ލަންކާގެ ވެރިރަށް ކޮލަމްބޯއަށް ކުރައްވާ މި ދަތުރު ނިންމަވާލައްވާނީ ޖޫން ހައެއްގަ އެވެ. މިއީ ލަންކާގެ ފޮރިން މިނިސްޓަރު އަލީ ސަބްރީގެ ދައުވަތަކަށް ކުރައްވާ ދަތުރެއް ކަމަށްވެސް މިނިސްޓްރީން ބުންޏެވެ.
ފާހަގަކޮށްލެވޭ ގޮތުގައި މިއީ ސަރުކާރު ބަދަލުވީފަހުން، ފޮރިން މިނިސްޓަރު އަވައްޓެރި ސްރީލަންކާއަށް ކުރައްވާ ފުރަތަމަ ދަތުރުފުޅެވެ. މީގެ ކުރިން ޓްރާންސްޕޯޓް މިނިސްޓަރު މުހައްމަދު އަމީން ލަންކާއަށް ވަޑައިގެންނެވި އެވެ.
މި ދަތުރުގައި އެ ގައުމުގެ ސަރުކާރުގެ އިސް ބޭފުޅުންނާއި ބައްދަލުކުރެއްވުމަށްވަނީ ހަމަޖެހިފައެވެ. އޭގެ ތެރޭގައި އެ ގައުމުގެ ރައީސް ރަނިލް ވިކްރަމަސިންހެއާއި ބޮޑު ވަޒީރު ޑިނޭޝް ގުނަވަދެނާ ހިމެނެއެވެ. އަދި، އެ ގައުމުގެ ފޮރިން މިނިސްޓަރާ ބައްދަލު ކުރައްވާ ރަސްމީ ވާހަކަތައް ދެއްކުމަށް ހަމަޖެހިފައިވެއެވެ.
ރަސްމީ ވާހަކަތަކުގެ ތެރޭގައި ރާއްޖެއާއި ސްރީލަންކާއާ ދެމެދު އޮތް ޒަމާންވީ ގުޅުން ހަރުދަނާކުރުމުގެ މަޝްވަރާތައް ކުރިއަށްދާނެއެވެ. އަދި، މީގެ އިތުރުން ސްރީލަންކާގައި ދިރިއުޅޭ ދިވެހި ރައްޔިތުންނަށް ލުއިފަސޭހަ ގޮތްތައް ހޯދާ ދިނުމާ ގުޅޭގޮތުން މަޝްވަރާކުރުމަށް ވަނީ ހަމަޖެހިފައެވެ.