ރާއްޖެއިން މިއަހަރު ޙައްޖަށްދާ 1000 ހައްޖާޖީންގެ ތެރެއިން ފުރަތަމަ ސަޢުދީއަށްދާ 296 ޙައްޖާޖީން ފުރައިފިއެވެ.
މި އަހަރު ރާއްޖެއިން ހައްޖަށް މީހުން ގެންދަނީ ހަމައެކަނި ހައްޖު ކޯޕަރޭޝަނުންނެވެ. އިސްލާމިކް މިނިސްޓްރީ ބުނެފައިވާ ގޮތުގައި އެހީތެރިން ފިޔަވާ މި އަހަރު ރާއްޖެއިން 980 މީހަކު ހައްޖަށް ދާނެ އެވެ. ސައުދީއިން ރާއްޖެއަށް ދޫކުރާ ހައްޖު ކޯޓާގެ އަދަދަކީ 1000 އެވެ.
ހައްޖަށްދާ މީހުން ފުރުމަށް ހަމަޖެހިފައިވަނީ ތިން ގްރޫޕަކަށް ބަހާލައިގެންނެވެ. މިއަދު ފުރީ 272 ހައްޖުވެރިންނާއި 26 އެހީތެރިންނެވެ. އޭގެ އިތުރަށް ޖޫން ތިނެއްގައި 330 ހައްޖުވެރިންނާއި 23 އެހީތެރިން އަދި ޖޫން ހަތެއްގައި 316 ހައްޖުވެރިންނާއި 23 އެހީތެރިން ފުރާނެ އެވެ.
މި އަހަރު ރާއްޖެއިން ދާ 980 މީހުންގެ ތެރެއިން 50 މީހުންނަކީ ވެރިކަމުގެ ދައުރުގެ ތެރޭގައި 1000 ފަގީރުން ހައްޖަށް ފޮނުވުމަށް ރައީސް ޑރ. މުހައްމަދު މުއިއްޒު ވެވަޑައިގެންނެވި ވައުދުގެ ތެރޭގައި ހިމެނޭ މީހުންނެވެ. މިނިސްޓްރީން މި އަހަރު 60 ފަގީރުން ފޮނުވަން ނިންނި ނަމަވެސް އޭގެ ތެރެއިން 10 މީހުން ވަނީ އެ ފުރުސަތު ދޫކޮށްލާފަ އެވެ.
ޙައްޖުގެ އިންތިޒާމްތަކާ ގުޅޭގޮތުން ޕީއެސްއެމާ ހަވާލާދީ ޙައްޖު ކޯޕަރޭޝަންގެ ހެޑް އޮފް އޮޕަރޭޝަންސް އައިޝަތު ޤާހިރް ވިދާޅުވީ، ރާއްޖެއާއި ސަޢުދީގައިވެސް އިންތިޒާމްތައްވެސް އެންމެ ފުރިހަމައަށް ހަމަޖައްސާފައިވާ ކަމަށެވެ. އެގޮތުން ރާއްޖެއިން ފުރުމާއި، ސަޢުދީ އެއަރޕޯޓުން ފެށިގެން ދެން ކުރަންޖެހޭ ދަތުރުތަކާއި އަދި ތިބުމާ ކެއުމުގެ ހުރިހާ އިންތިޒާމްތައް ވެސް ހަމަޖައްސާފައިވާ ކަމަށެވެ.
“ކޮންމެ ޙައްޖާޖީއަކަށް ބޯޑިންއާއެކު ޓްރެކިން ޑިވައިސްގެ ގޮތުގައި، އެމީހެއްގެ ކާޑުގައި އަޅުވަން ޓެގެއް ދޭނެ. އޭގެން ވަގުތުން ބަލާލެވޭނެ އެމީހަކު ހުރި ތަނެއް،” އައިޝަތު ޤާހިރް ވިދާޅުވިއެވެ.
މިކަމުގައި އެހީތެރިކަން ދިނުމުގައި ސަޢުދީގައި މިހާރުވެސް ޙައްޖު ކޯޕަރޭޝަނާ އިސްލާމިކް މިނިސްޓްރީގެ ޓީމްތަކުން ދަނީ ހަރަކާތްތެރިވަމުންނެވެ.
ހައްޖުގެ މަތިވެރި އަޅުކަން އަދާކުރުމަށް ފުރާ ހައްޖުވެރިންނާއި ގުޅޭ ހުރިހާ ކަންކަން ފުރިހަމައަށް އިންތިޒާމްކޮށް، އެކަންކަން ގާތުން ބެއްލެވުމަށް ރައީސް ޑރ. މުހައްމަދު މުއިއްޒު އިރުޝާދު ދެއްވާފައިވާ ކަމަށް އިސްލާމީ ކަންތައްތަކާބެހޭ ވަޒީރު ޑރ. މުހައްމަދު ޝަހީމް އަލީ ސަޢީދު ވަނީ ވިދާޅުވެފައެވެ.
ވަޒީރު ވިދާޅުވީ ހައްޖުވެރިންނާއި ގުޅުންހުރި ކަންކަން ރައީސް ޑރ. މުއިއްޒު ވަރަށް ގާތުން ބައްލަވަމުން ގެންދަވާ ކަމަށެވެ. އަދި އެމަނިކުފާނުގެ ބެއްލެވުމުގެ ދަށުން ހައްޖާޖީން ފުރުމުގެ ކަންކަން ހައްޖު ކޯޕަރޭޝަނާއި ސަރުކާރުގެ އެކި މުވައްސަސާތަކުން ގުޅިގެން ވަރަށް ފުރިހަމައަށް އިންތިޒާމްކޮށްފައިވާ ކަމަށްވެސް ޑރ. ޝަހީމް ވިދާޅުވިއެވެ.