ރަށްރަށުގައި ތިބެ ގުރުއާން ދަސްކޮށްގެން އިމްތިހާން ހަދަން އެކަނި، މާލެ އަންނަގޮތަށް އިސްލާހަށް ބަދަލު ގެނެސްފިއެވެ.
މިއަދު އާންމުކުރި އިސްލާހާއިއެކު ހާފިޒުންނަށް ދާއިމީ ގޮތެއްގައި ކޮންމެ މަހަކު އިނާޔަތް ލިބޭ ގޮތަށް، ހާފިޒުން ތަމްރީނު ކުރުމުގެ އުސޫލަށް ވަނީ ބަދަލުގެނެސްފައެވެ.
ކީރިތި ގުރުއާނާއިބެހޭ ގައުމީ މަރުކަޒުން އާންމުކުރި ހާފިޒުން ތަމްރީނު ކުރުމުގެ އާންމު އުސޫލުގައި ބުނެފައިވަނީ ހާފިޒު ކަމުގެ ސަނަދު ދިނުމާ، ހާފިޒުންނަށް ދައުލަތުން އިނާޔަތް ދިނުމާއި ހާފިޒުންގެ ދަފްތަރު ބެލެހެއްޓުމުގެ އިތުރުން އެ މަސައްކަތް ކުރިއަށް ގެންދާނެ ގޮތް ބަލަހައްޓަން ޖެހޭ ކަމުގައެވެ.
އެގޮތުން ކީރިތި ގުރުއާނާ ބެހޭ ގައުމީ މަރުކަޒުގައި ރަޖިސްޓްރީ ކޮށްގެން ހިންގާ ގުރުއާން ހިތުދަސްކޮށްދޭ ކުލާހެއްގެ ދަރިވަރަކު ހާފިޒު ކަމުގެ އިމްތިހާން ކޮށްދިނުމަށް އެދި، ކީރިތި ގުރުއާނާ ބެހޭ ގައުމީ މަރުކަޒަށް ނުވަތަ ގުރުއާނާ ބެހޭ ގައުމީ މަރުކަޒުން ކަނޑައަޅާފައިވާ ކޮމިޓީއަށް ހުށަހެޅުމުން އެ ދަރިވަރަކު އިމްތިހާނު ކޮށްދެވޭނެ ކަމަށް ވެސް ބުނެފައި ވެއެވެ.
މީގެ އިތުރުން ކީރިތު ގުރުއާނާބެހޭ މަރުކަޒުގައި ރަޖިސްޓްރީނުކޮށް ހިންގާ ކުލާސްތަކުގެ ދަރިވަރުންނާއި އަމިއްލަގޮތުން ގުރުއާން ހިތުދަސްކޮށްފައިވާ ފަރާތަކަށް ހާފިޒުކަމުގެ އިމްތިހާނުގައި ބައިވެރވެވޭނީ ކީރިތި ގުރުއާނާ ބެހޭ މަރުކަޒުން އެ ދަރިވަރަކީ އިމްތިހާނުގައި ބައިވެރި ވެވޭ ފެންވަރު ހުރިކަން ކަނޑައަޅާ ފަރާތަކަށް ކިޔައިދީ ހާފިޒު ކަމުގެ ފެންވަރު ހުރިކަން އަންގައިދޭ ދަފްތަރު ކޮށްފައިވާ ލިޔުމާއި އެކުގައި ކަމަށްވެސް ބުނެފައި ވެއެވެ.
މި އުސޫލުގައި ފާހަގަކޮށްފައިވަނީ ހާފިޒް ކަމުގެ ސަނަދު ހާސިލްކުރާ ދަރިވަރުންނަށް ސަރުކާރުން ދޭ ހާއްސަ އިނާޔަތް ކަނޑައަޅާނީ ރައީސް އޮފީހުގެ ލަފާގެ މަތިން ކީރިތި ގުރުއާނާ ބެހޭ ގައުމީ މަރުކަޒުން ކަމަށާއި، މި އިނާޔަތް ދާއިމީ ގޮތެއްގައި ކޮންމެ މަހަކު ހާފިޒުންނަށް ލިބޭނެ ކަމަށެވެ.
މިއަދު އާންމުކުރި މި އުސޫލާއި އެކު ގެނެވުނު ބަދަލުތަކުގެ ތެރޭގައި:
1. އައިޔޫއެމް ގެ ގުރުއާން ދަސްކޮށް އެތަނުން އިމްތިހާން ހަދާ އިތުރު އިމްތިހާނަކާ ނުލާ ހާފިޒުކަށް ވުން
2. ރަށްރަށުގައި ތިބެ ދަސްކޮށްގެން ރަށުގައި ތިބެ މުރާޖައާ ކޮށް އިމްތިހާން ހަދަން އެކަނި މާލެ އަންނަގޮތަށް ބަދަލު ގެނައުން
ރަށްރަށުގައި ތިބެ ގުރުއާން ދަސްކޮށްގެން ރަށުގައި ތިބެ މުރާޖާ ކުރެވޭ ގޮތަށް މީގެ ކުރިން ނޯވެއެވެ. މިހާރު މި ގެނެވުނު ބަދަލާއެކު ފަސޭހަ ތަކެއް ލިބިގެންދާނެ ކަމަށްވެސް ގުރުއާނާ ބެހޭ މަރުކަޒުން ވަނީ ބުނެފައެވެ.