އެންމެ ފަހުން ބޭއްވި ބޮޑު ދެ އިންތިޚާބު، މޯލްޑިވިއަން ޑިމޮކްރެޓިކް ޕާޓީ، (އެމްޑީޕީ) އަށް ނާކާމިޔާބުވި ސަބަބުތައް ހޯދުމަށް ކުރަމުންދާ ދިރާސާ މަސައްކަތުގެ ބައްދަލުވުންތައް އެ ޕާޓީން ފަށައިފިއެވެ.
ރިޔާސީ އިންތިޚާބާއި މަޖިލިސް އިންތިޚާބުގައި އެމްޑީޕީއަށް ނާކާމިޔާބީއާ ކުރިމަތިލާން ޖެހުނު ސަބަބުތައް ދިރާސާކޮށް، ޕާޓީއާ މެދު ރައްޔިތުން ދެކޭގޮތް ހޯދައި ޕާޓީގެ ކުރިމަގު ބައްޓަން ކުރާނެ ގޮތުގެ މަގުޗާޓެއް އެކުލަވާލަން އެޕާޓީގެ ޤައުމީ މަޖިލީހުން ވަނީ މިދިޔަ މަހު ފާސްކޮށްފައެވެ.
ޕީއެސްއެމާ ހަވާލާދީ އެމްޑީޕީގެ ތަރުޖަމާނު އަނަސް ޢަބްދުއްސައްތާރު ވިދާޅުވީ 2023 ވަނަ އަހަރުގެ ރިޔާސީ އިންތިޚާބާއި މިއަހަރު ބޭއްވި ރައްޔިތުންގެ މަޖިލިސް އިންތިޚާބު އެ ޕާޓީ އަށް ގެއްލުނު ގޮތާ ބެހޭ ދިރާސާތައް ކުރާ ކޮމިޓީން މިހާރު ބައްދަލުވުންތައް ފަށާފައިވާ ކަމަށެވެ. އެގޮތުން، އެންމެ ފުރަތަމަ ބައްދަލުކޮށްފައިވަނީ 19 ވަނަ މަޖިލީހުގައި މާލޭގެ ދާއިރާތައް ތަމްސީލް ކުރެއްވި މެންބަރުންނާއި، ޕާޓީގެ ޤައުމީ މަޖިލީހުގެ މާލެ ދާއިރާގެ މެންބަރުންނާ ކަމަށް އަނަސް ވިދާޅުވިއެވެ. މިއީ އިންތިޚާބުތަކުގައި ކެމްޕޭނުގެ ކަންކަމުގައި އުޅުއްވި ޕާޓީގެ އިސްފަރާތްތައްކަން އަނަސް ފާހަގަކުރެއްވިއެވެ.
އަނަސް ވިދާޅުވީ މި ބައްދަލުވުންތައް ކުރިއަށް ގެންދިއުމަށް ހަމަޖެހިފައިވަނީ ސިލްސިލާކޮށް ކަމަށެވެ. އެގޮތުން، ކުރިއަށް އޮތްތަނުގައި އެކި އަތޮޅުތަކުގައިވެސް މި ދިރާސާގެ ބައްދަލުވުންތައް ކުރިއަށް ގެންދާނެ ކަމަށް އޭނާ ވިދާޅުވިއެވެ.
އިންތިޚާބުތައް ނާކާމިޔާބި ސަބަބުތައް ދެނެގަތުމަށް ހަދާ ދިރާސާއިން، ޕާޓީގެ ކުރިމަގު ބައްޓަން ކުރަން އެނގޭނެ ކަމަށް އެ ޕާޓީގެ ޗެއަރޕާސަން ފައްޔާޒް އިސްމާޢީލް ވަނީ ވިދާޅުވެފައެވެ. އަދި މިވަގުތު މަޖިލީހުގެ ކަންކަން ނިންމުމުގެ ބާރު އެ ޕާޓީއަށް ނެތް ނަމަވެސް ސަރުކާރު ޖަވާބުދާރީ ކުރުވުމަށް މަޖިލީހުގެ ތެރެއިން މަސައްކަތް ކުރަމުންދާނެ ކަމަށް ފައްޔާޒް ވިދާޅުވެފައިވެއެވެ.
ނިމިދިޔަ އަހަރު ބޭއްވި ރިޔާސީ އިންތިޚާބު އެމްޑީޕީއަށް ނާކާމިޔާބުވުމަށްފަހު މިއަހަރު ބޭއްވި މަޖިލިސް އިންތިޚާބުގައި އެ ޕާޓީއަށް ވަނީ ބޮޑު ނާކާމިޔާބީއަކާ ކުރިމަތިލާން ޖެހިފައެވެ. އެގޮތުން 19 ވަނަ މަޖިލީހުގެ ސުޕަ މެޖޯރިޓީ ތަމްސީލްކުރި އެމްޑީޕީއަށް މިއަހަރު ބޭއްވި މަޖިލިސް އިންތިޚާބުގައި ކާމިޔާބު ކުރެވުނީ 93 ގޮނޑީގެ ތެރެއިން އެންމެ 12 ގޮނޑިއެވެ. ސަރުކާރު ހިންގާ މައި ޕާޓީ ޕީއެންސީން ވަނީ 75 ގޮނޑިއާއެކު މަޖިލީހުގެ ސާފު އަޣްލަބިއްޔަތު ހޯދާފައެވެ.