ހަފުތާ ބަންދުގައި ތިނަދޫ އުތުރު ދާއިރާގެ މަޖިލިސް މެމްބަރު ސަޢުދުﷲ ހިލްމީ ތިނަދޫ ސިޓީ އަށް ކުރެވި ދަތުރުފުޅުގައި ރޭ ވަނީ ތިނަދޫގެ ރައްޔިތުންނާ ބައްދަލު ކުރައްވާފައެވެ.
ތިނަދޫ ޔުނިކް ސޯޝަލް ސެންޓަރުގައި ބޭއްވި މި ބައްދަލުވުމުގައި ގިނަ އަދަދެއްގެ ރައްޔިތުން ބައިވެރިވެފައި ވާއިރު މެމްބަރު ސަޢުދުﷲ ވަނީ ރައްޔިތުންގެ އުއްމީދު ތަކާއި ގުޅިފައިވާ ގިނަ ވާހަކަތަކެއް ޙިއްސާ ކުރައްވާފައެވެ. އަދި މެމްބަރަކަށް ވުމުން ރައްޔިތުންނާ އިތުރަށް ގުޅުން ބަދަހި ކުރުން މުހިންމު މިންވަރާއި ދާއިރާގެ އެކި ގިންތި ތަކުގެ ރައްޔިތުންނަށް ދިމާވާ އެކި އެކި ތަކުލީފުތަކާ ސަރުކާރުގެ ޚިދުމަތް ހޯދުމުގައި ބޭނުންވާނެ ކަންކަމުގައި އެއްބާރުލުން ދިނުމަކީ ވަރަށް ބޮޑަށް ޝައުގުވެރިވާ ކަމެއް ކަމަށް ސަޢުދުﷲވަނީ ވިދާޅުވެފައެވެ.
އެގޮތުން ކެމްޕެއިން ވަޢުދުވި ގޮތަށް ދާއިރާގެ އޮފީސް ހުޅުވުމުގެ މަސައްކަތް މިހާރު ފަށައިފައިވާ ކަމަށް ސަޢުދުﷲ ވިދާޅުވިއެވެ.
މެމްބަރު ސައުދުﷲ ގދ ތިނަދޫ ސުކޫލަށް ކުރެއްވި ޒިޔާރަތުގެ ތެރެއިން….
މެމްބަރު ސައުދުގެ ކެމްޕެއިން މެނޭޖަރ އާރިފް ހުސައިން ހުވަދު މީޑިއާ އަށް މައުލޫމާތު ދެއްވަމުން ވިދާޅުވީ ކުރިޔަށް އޮތް 2 ހަފުތާގެ ތެރޭގައި އެމްޕީ ސައުދުﷲ ގެ ދާއިރާ އޮފީސް ތިނަދޫ ސިޓީގެ އުތުރު ދާއިރާގައި ހުޅުވޭނެ ކަމަށާއި އެތަނުގައި ރައްޔިތުންގެ ޚިދުމަތުގައި މުވައްޒަފުން ތިބޭނެ ކަމަށެވެ.
އެމްޕީ ސަޢުދުﷲގެ މި ދަތުރުފުޅުގައި ވަނީ ތިނަދޫ ސިޓީގެ ބޮޑެތި ސްކޫލް ތަކަށް ޒިޔާރަތް ކުރައްވާ އިސްވެރިންނާ ވެސް ވަނީ ބައްދަލު ކުރައްވާފައެވެ.
މެމްބަރު ސައުދުﷲ ގދ އަތޮޅު ތަޢުލީމީ މަރުކަޒަށް ކުރެއްވި ޒިޔާރަތުގެ ތެރެއިން….
އެގޮތުން ތިނަދޫގެ އުތުރު ދާއިރާގެ ޕްރައިމަރީ ސްކޫލް ކަމުގައިވާ ތިނަދޫ ސްކޫލް އަދި ގދ އަތޮޅު ތަޢުލީމީ މަރުކަޒުގެ އެސްއެސްޓީ އާއި ވަނީ މިއަދު ބައްދަލުކުރައްވާފައެވެ.
މި ބައްދަލުކުރެއްވުމަށްފަހު ތިނަދޫ ސްކޫލުން ބުނެފައިވަނީ ތިނަދޫ އުތުރު ދާއިރާގެ މެމްބަރ ޞަޢުދުالله ޙިލްމީ މިއަދު ފެއްޓެވީ ރަނގަޅު ފެށުމެއް ކަމަށާއި އުންމީދަކީ އެމަނިކުފާނުގެ ދައުރުގައި ތިނަދޫގެ ޢިލްމީ ދަންމަރަށް އުޖާލާ އަލިކަމެއް ލިބިގެން ދިއުން ކަމަށާއި ޚާއްޞަކޮށް ތިނަދޫ ސްކޫލުގެ ޢިލްމީ ހިޔަލަށް އިތުރު ކުރި އެރުމާއި ތަރައްގީ ލިބިގެން ދިޔުން ކަމަށެވެ.
މެމްބަރު ސައުދުﷲ ގދ އަތޮޅު ތަޢުލީމީ މަރުކަޒަށް ކުރެއްވި ޒިޔާރަތުގެ ތެރެއިން….
ތިނަދޫ އުތުރު ދާއިރާގެ މަޖިލިސް މެމްބަރ ޞަޢުދުﷲ ހިލްމީ ގދ އަތޮޅު ތަޢުލީމީ މަރުކަޒަށް ޒިޔާރަތް ކުރައްވައި، އެމަރުކަޒުގެ ސީނިއަރ މެނޭޖްމަންޓާ ބައްދަލުކުރެއްވުމަށްފަހު ސްކޫލްގެ ހާލަތާއި، ވަޞީލަތްތަކުގައި ހުރި ދަތިތައް ބައްލަވައި އަދި މިކަންކަމުގެ ހައްލު ހޯދުމަށް ސަރުކާރާއި ގުޅިގެން މަސައްކަތް ކުރެއްވުމުގެ އުއްމީދު ވަނީ ދެއްވާފައެވެ.