ބ. ހިތާދޫ އަބްދުއްރަހުމާން އިބްރާހީމް އާއި. ކ. މާލެ ދަފްތަރު ބުންޔާމީން ޖަމީލް ދެމެފިރިންގެ ކައިވެންޏަކީ ވެސް އެހެންމީހުންނެކޭ އެއްފަދައިން އުފާވެރި ދިރިއުޅުމެކެވެ. ނަމަވެސް މިއަދު އެދެމެފިރިން ގުނަން ޖެހިފައިވާ ދުވަސްތަކަކީ ބަޔާންކުރަން ދަތި ހިތްދަތި ދުވަސްތަކެކެވެ.
އެ ދެމެފިރިންނަށް ލިބުނު ތިންކުދިންގެ ތެރެއިން ހަނގު ދަރިފުޅު މިޝާއަށް ދިމާވި ކުއްލި ބަލި ހާލަތަކީ އެފަދަ ދުވަހަކަށް ތައްޔާރުވެގެން ތިއްބާ ދިމާވި ކަމެއްނޫނެނެވެ. ދޮޅު އަހަރު ނުފުރޭ އައިޝަތު މީޝާ ބިންތި އަބްދުއްރަހުމާން ވަނީ އެ ތުއްތު އުމުރުގައި ކެންސަރާ ކުރިމަތިލާން ޖެހިފައެވެ.
ބުންޔާމީން "ހުވަދޫ މީޑިއާ" އަށް ކުއްޖާގެ ބަލީގެ ހާލަތު ކިޔައިދެމުން ބުނީ މީޝާއަކީ ސްކިން މައްސަލައެއް ހުރި ކުއްޖެއްކަމުން ފަރުވާ ކުރަމުންއައީ އެ ބައްޔަށް ކަމަށެވެ.
" އެއްދުވަހު މީޝާ ފެންވަރުވާ ނެޕީ ބަދަލުކުރަން އުޅެނިކޮށް ފެނުނީ ދަށް ބަނޑު ކޮޅު ހަރުވެފައި ހުރިތަނެއް. ދެން ވަގުތުން އައިޖީއެމްއެޗްއަށް ދެއްކީ . ޑޮކްޓަރުން ވިދާޅުވީ މީޝާގެ "ލިވާ" އިނީ ދުޅަވެފައޭ." ބުންޔާމީން ބުންޏެވެ.
ބުންޔާމީން ބުނީ އައިޖީއެމްއެޗުން ލަފާދެއްވީ އިންޑިއާ އަށް ދިއުމަށްކަމަށާއި، މިހާރު ކުއްޖާ ގޮވައިގެން އައިސްތިބީ އިންޑިޔާގައި ކަމަށެވެ. އާސަންދަ ވެސް ލިބިފައިވާ ކަމަށާއި، ނަމަވެސް އާސަންދަ ލިބުނީ ފުލްކޮށް ނޫން ކަމަށެވެ. އެހެންކަމުން ބައެއް ބޭސްތައް ގަންނަން ޖެހުމާ ފަރުވާއަށް ބޮޑު ހަރަދެއް މިހާރުވެސް ހިނގަމުންދާ ކަމަށެވެ.
މީޝާގެ ބަލީގެ ހާލަތު އަންގައިދޭ ލިއުމެް
ކުއްޖާއަށް މިހާރު ފަރުވާ ހޯދަމުންދަނީ އިންޑިއާގެ ބެންގަލޫރުގެ އެޗް.ސީ.ޖީ ހޮސްޕިޓަލުން ކަމަށް ބުންޔާމީން ބުންޏެވެ. އެއީ އެ ހޮސްޕިޓަލުން ރަނގަޅު ފަރުވާލިބޭނެތީ ކަމަށާއި، ހާއްސަކޮށް ކުޑަކުދިންނަށް މިފަދަ ބަލިތަކުގައި އެންމެ ރަނގަޅު ހޮސްޕިޓަލަކީ އެއީ ކަމުގައިވާތީ ކަމަށެވެ. އާސަންދައަށް އެދުނުއިރުވެސް އެޗް.ސީ.ޖީ ހޮސްޕިޓަލްް އިޙްތިޔާރުކުރީ އަމިއްލައަށް އެދިގެން ކަމަށެވެ.
"ހޮސްޕިޓަލުން ފަރުވާ ހޯދަމުންދާ އެހެންފަރާތަކަށް ފުލްކޮށް އާސަންދަ ލިބޭ . ނަމަވެސް މީޝާގެ ފަރުވާއަށް އާސަންދަ ފުލް ކޮށް ނުލިބޭ. ސަބަބެއް ނޭނގޭ. މިހާރުވެސް ބިލްތަކަށް ވަރަށް ބޮޑެތި އަދަދުން ވަނީ ދައްކަން ޖެހިފަ. އަޅުގަނޑުމެން ދެމެފިރިން މިތިބީ ވަޒީފާ ދޫކޮށްފަ އައިސް އިންޑިއާގަ އަތުގަ އެއްވެސް އެޗެއް ނެތް. ގޮތްހުސްވަމުން މިދަނީ. ބޭނުންވަނީ ތިބޭފުޅުންގެ ދީލަތު އެހީތެރި ކަމެއް. މިހާރު މި ހޮސްޕިޓަލުން ބުނަނީ ކުއްޖާގެ ބަނޑުގައިނީ ޓިއުމަރެކޭ. ސްޓޭޖް 4އެއްގައޭ އިނީ. މިތިބީ ކަންބޮޑުވުމެއްގަ." ބުންޔާމީން ބުންޏެވެ.
ބުންޔާމީން ފާހަގަ ކުރީ އާސަންދަ ފުލްކޮށް ނުލިބުމުގެ ސަބަބުން ގިނަ ބޭސްތައްވަނީ ގަންނަން ޖެހިފައި ކަމަށެވެ. އިންޑިޔާއަށް ކުއްޖާ ގޮވައިގެން ދެމެފިރިން އެއްކޮށް ފުރީ ކުއްޖާގެ ހާލަތުދަށްވުމުގެ ސަބަބުން ކަމަށެވެ. ދެމެފިރިންތިބީ ކުއްޖާގެ ފަރުވާގައި ތާށިވެފައި ކަމަށާއި، މީޝާގެ ބަލިހާލަތަށް ވާނެ ގޮތެއްނޭނގޭތީ މާލެ އާދެވޭނެ ދުވަހެއް ނޭނގޭ ކަމަށެވެ.
5 މަސް ވަންދެން ކޮންމެ މަހަކު ކީމޯ ދޭން ޖެހޭ ކަމަށްވެސް ބުންޔާމީން ބުންޏެވެ. މިހާރު 2 ކީމޯ ދެވިފައިވާއިރު، ޖުމްލަ 12 ކީމޯއެއް ދޭން ޖެހޭ ކަމަށެވެ. އެހެންކަމުން މި މުއްދަތުގައި އިންޑިޔާގައި މަޑުކުރަން ޖެހޭ ކަމަށެވެ. އެ ދެމެފިރިންގެ ދެންތިބި ދަރިންތިބީ ރާއްޖޭގައި ކަމަށާއި، ނަމަވެސް މީޝާގެ ބައްޔަށްވާ ގޮތެއްނޭނގޭތީ ރާއްޖެ އާދެވެން ނެތް ކަމަށެވެ.
ވަޒީފާ ދޫކޮށްފަ މިގޮތަށް ތިބެންޖެހުމުން ފައިސާގެ ދަތިތަކެއް ހުރި ކަމަށެވެ. އަދި އިންޑީއާގައި ތިބުމާއި ހުރުމުގައިވެސް ކޮންމެ ދުވަހަކު ވަރަށް ބޮޑަށް ހޭދަވާ ކަމަށެވެ. އެހެންކަމުން ބޭނުންވަނީ އާންމުންގެ ދީލަތި އެހީތެރިކަމެއް ކަމަށްވެސް ބުންޔާމީން ބުންޏެވެ. ބުންޔާމީންގެ ދެމެފިރިން އެދެނީ ކިތަންމެ ކުޑަމިންވަރެއްގެ އެހީތެރިކަމެއްވެސް މީޝާ ބަލިން ސަލާމަތް ވުމަށް އިންޑިއާގައި ހޭދަވާ ދުވަސްތަކަށް ފޯރު ކޮށްދިނުމަށެވެ.
މިކަމުގައި އެފެމެފިރިންނަނަށް ދީލަތި އެހީތެރިކަމެއްވެދިނުމަކީ އެދެމެފިރިންގެ ވަރަށް ބޮޑު އުއްމީދެކެވެ.
ގުޅޭނެ ނަމްބަރު: (ކުއްޖާގެ މަންމަ) ބުންޔާމީން ޖަމީލް 7934342 (މިވަގުތު އިންޑިއާގައި، ގުޅޭނީ ވައިބާ ވަޓްސްއަޕް އިން)
އެކައުންޓް ނަމްބަރު: ބީއެމްއެލް ދިވެހި: 7701121178101 (އަބްދުއްރަހުމާން އިބްރާހީމް)
އެކައުންޓް ނަމްބަރު: ބީއެމްއެލް ޑޮލަރު: 7704121178101 (އަބްދުއްރަހުމާން އިބްރާހީމް)
ނޯޓް: "ހުވަދޫ މީޑިއާގެ" އެހީ މި ސެގްމަންޓްގެ ދަށުން ގެނެސްދެވޭ ފަރާތްތަކަށް އެހީތެރިވުމަށް އެދޭ ފަރާތްތަކުން އެ އާއިލާއާ ގުޅުއްވައިގެން އެހީގެ ކަންކަން ކުރިއަށް ގެންދެވުން އެދެމެވެ.