ރ. އުނގޫފާރުގައި މިދިޔަ މަހުގެ 23 ވަނަ ދުވަހު މަގުމަތީގައި ކުޅެން ތިިބި ދެ ކުއްޖެއްގެ ގައިގައި ކަރަންޓް ޖެހުނު މައްސަލާގައި މުޅި ރާއްޖޭގެ ފެނަކައިން ހިދުމަތް ދޭ ހުރިހާ ރަށެއްގެ މަގު ބައްތިތައް ހައްލު ކުރުމަށް ކައުންސިލްތަކަށް ވަކި މުއްދަތެއް ދިނުމަށް ނިންމާފައިވާ ކަމަށް ފެނަކަ ކޯޕަރޭޝަންގެ މެނޭޖިން ޑިރެކްޓަރ މުއާޒް މުހައްމަދު ރަޝީދު ވިދާޅުވެއްޖެއެވެ.
މުއާޒް މިހެން ވިދާޅުވީ ފެނަކައިގެ އިހުމާލުން ޒުވާނަކު ވެންޓިލޭޓަރުގައި ފަރުވާ ދޭކަމަށް ބުނެ އޮންލައިން މީޑިއާއަކުން ޖެހިހަބަރަކާއި ގުޅިގެން ކުރެއްވި ފޭސްބުކް ޕޯސްޓެއްގައެވެ.
މުއާޒް ވިދާޅުވީ ފެނަކައިން ކަރަންޓު ފޯރުކޮށްދޭ ރަަށްރަށުގެ އިޖުތިމާއީ ދިއްލުންތަކަށް ބޭނުންކުރާ ހޮޅިދަނޑިތަކަކީ ލޯކަލް ކައުންސިލްތަކުން މަރާމާތުކޮށް ބަލަހައްޓާ ޕޯސްޓުތަކެއް ކަމަށެވެ. މިހާދިސާއާއި ގުޅިގެން ފެނަކައިން ޚިދުމަތް ދެމުންގެންދާ ހުރިހާ ރަށެއްގެ ސްޓްރީޓް ޕޯސްޓް ތައް ޔޫއާރުއޭގެ މިންގަޑަށް ހުރިތޯ ބެލުމުގެ ގޮތުން ކުރި އިންސްޕެކްޝަން ވަނީ ނިމިފައި ކަމަށާއި ގަވާއިދަށް ނުފެތޭ ގޮތަށް ހުރި ތަންތަން ރަނގަޅުކުރަން ކައުންސިލްތަކަަށް މުއްދަތެއް ދިނުމަށް ވަނީ ނިންމާފައިކަމަށެވެ.
ފެނަކައިން ކަރަންޓު ފޯރުކޮށްދޭ ރަަށްރަށުގެ އިޖުތިމާއީ ދިއްލުންތަކަށް ބޭނުންކުރާ ހޮޅިދަނޑިތަކަކީ ލޯކަލް ކައުންސިލްތަކުން މަރާމާތުކޮށް ބަލަހައްޓާ ޕޯސްޓުތަކެއް. މިހާދިސާއާއި ގުޅިގެން ފެނަކައިން ޚިދުމަތް ދެމުންގެންދާ ހުރިހާ ރަށެއްގެ ސްޓްރީޓް ޕޯސްޓް ތައް ޔޫއާރުއޭގެ މިންގަޑަށް ހުރިތޯ ބެލުމުގެ ގޮތުން ކުރި އިންސްޕެކްޝަން ވަނީ ނިމިފައި. ގަވާއިދަށް ނުފެތޭ ގޮތަށް ހުރި ތަންތަން ރަނގަޅުކުރަން ކައުންސިލްތަކަަށް މުއްދަތެއް ދިނުމަށް ވަނީ ނިންމާފައި- މުއާޒް
ފެނަކައިން ވަނީ ރާއްޖެތެރޭގެ ހުރިހާ ރަށެއްގެ މަގުމަތީ ބައްތިތަކާއި، ބަނދަރު ބައްތިތަކުގެ ހާލަތުދެނެގެންފައެވެ. އަދި ހުރި ހުރިހާ މައްސަލަތައް ހައްލު ކުރުމަށް ކައުންސިލްތަކަށް ވަކި މުއްދަތެއްދީ އިސްލާހު ނުކޮށްފި ނަމަ އިތުރު ފިޔަވަޅު އެޅުމަށް ތައްޔާރަށެވެ.
މުއާޒް މީގެ ކުރިން ވިދާޅުވީ އަބަދުވެސް އިސްކަންދެއްވާާނީ ރައްޔިތުންގެ ސަލާމަތާއި ރައްކާތެރިކަމަށް ކަމަށާއި، ފެނަކައިން ދޭހިދުމަތްތަކަކީ ރައްޔިތުންގެ އިތުބާރު އޮންނަ ހިދުމަތެއްކަން ސާބިތުކޮށްދެއްވަން ބޭނުންފުޅުވާ ކަމަށެވެ. އަދި ލުއި ފަސޭހަ ގޮތްތަކެއް ރާވަވައި ވީހާވެސް ގާތުން ރައްޔިތުންނަށް ހިދުމަތްކުރުމަކީ އެކުންފުނީގެ އެންމެ ބޮޑު އަމާޒު ކަމުގައެވެ.