ކ. ގުރައިދޫގައި ކުޑަކުއްޖަކަށް ގަނާކޮށް އަނިޔާކުރާ މަންޒަރު ފެންނަ ވީޑިއޯއަކީ މީގެ މަހެއްހާ ދުވަސް ކުރީގެ ހާދިސާއެއް ކަމަށާއި އެކަމާ ގުޅޭގޮތުން ފިޔަވަޅު އަޅާފައިވާ ކަމަށް ފުލުހުން ބުނެފި އެވެ.
ސޯޝަލް މީޑިއާގައި ދައުރުވާ ވީޑިއޯއިން ފެންނަ ގޮތުގައި، ކުޑަކުއްޖާއަށް އަނިޔާކޮށްފައިވަނީ ކުޑަ ދެކުދިންނެވެ. އޭގެ ތެރެއިން އެއް ކުއްޖަކު ވީޑިއޯ ރިކޯޑު ކުރާއިރު އަނެއް ކުއްޖާ، އަނިޔާ ލިބުނު ކުއްޖާގެ ބޮލަށް އަތުން ހަމަލާދޭތަން ފެނެ އެވެ. އަނިޔާ ލިބުނު ކުއްޖާ ހަޅޭއްލަވައި، ރޯ އަޑު ވެސް ވީޑިއޯއިން އިވެއެވެ.
ގުރައިދޫ ކައުންސިލާ ހަވާލާދީ ސަން ނޫހުގައި ބުނެފައިވަނީ މިކަމުގައި ބައިވެރިވީ 18 އަހަރު ނުވާ ދެ ކުޑަކުދިން ކަމަށެވެ.
މިކަމާ ގުޅިގެން ފުލުހުންގެ ތަރުޖަމާނު އަހުމަދު ޝިފާން ވިދާޅުުވީ، މި ހާދިސާ ހިނގާފައިވަނީ މީގެ މަހެއްހާ ދުވަސް ކުރިން ކުޑަކުދިންތަކެއްގެ މެދުގައި ކަމަށެވެ. އަދި އެ މައްސަލާގައި ފުލުހުން ފިޔަވަޅު އަޅާފައިވާ ކަމަށްވެސް ވިދާޅުވި އެވެ. ނަމަވެސް، ޝާމިލުވާ ކުދިންނާ މެދު އެޅި ފިޔަވަޅުގެ ތަފުސީލެއް ނުދެއްވަ އެވެ.
ގުރައިދޫގައި ފުލުހުންނާ ކުޑަކުއްޖަކާ ދެމެދު ހަމަނުޖެހުމެއް ހިނގާ މަންޒަރު ފެންނަ ވީޑިއޯއެއްވެސް ވަނީ އާންމުވެފައިވެ އެވެ. އެ މައްސަލާގައި ކުޑަކުއްޖާ ޕޮލިސް ސްޓޭޝަނަށް ގެންގޮސް ބެލެނިވެރިންގެ ހާޒިރުގައި ނަސޭހަތްދިނުމަށްފަހު ދޫކޮށްލާފައިވާ ކަމަށް ތަރުޖަމާނު ޝިފާން ވިދާޅުވި އެެވެ.
މި އަހަރުގެ އެޕްރީލް މަހުގެ ތެރޭގައި އއ. ރަސްދޫގައިވެސް ކުޑަކުއްޖަކަށް ގަނާކޮށް އަނިޔާކުރި މައްސަލައެއް ފެންމަތިވި އެވެ. އެކަމާ ގުޅިގެން ސަރުކާރުގެ ކަމާ ގުޅުން ހުރި މުއައްސަސާތަކުގެ ޓީމެއް އެ ރަށަށް ގޮސް ހަރަކާތްތެރިވި އެވެ.