ފުވައްމުލަކު ހޮސްޕިޓަލުގައި ފަރުވާދެމުން ދަނިކޮށް ނިޔާވި ސަދާ ސައުދުﷲ ގެ އާއިލާއިން ފުވައްމުލަކު ހޮސްޕިޓަލުގެ މައްޗަށް ކުރާ ދައުވާ ގެ ފުރަތަމަ އަޑުއެހުން ސިވިލް ކޯޓުން މާދަމާ އަށް ތާވަލުކޮށްފިއެވެ.
2021 ވަނަ އަހަރު ފުވައްމުލަކު ހޮސްޕިޓަލުގައި ފަރުވާދެމުން ދަނިކޮށް ފަސް އަހަރުގެ ސަދާ ސައުދުﷲ ކުއްލިގޮތަކަށް ނިޔާވުމުން ސޯޝަަލްމީޑިޔާގައިވެސް ގިިނަބަޔަކު ކަންބޮޑޫވުން ފާޅުކޮށް އަޑުއުފުލިއެވެ. ހޮސްޕިޓަލުން ބަލިމީހުންނާމެދު ކަންތައް ކުރާ ފަރުވާކުޑަ ގޮތާމެދު އެކިމީހުން ތަފާތު ހިޔާލުތައް ފާޅުކުރިއެވެ. ސަދާ ނިޔާވި ހާދިސާއަށް މާގިނަ ދުވަސްތަކެއް ނުވަނީސް އެހެން އަންހެން ކުއްޖަކު ނިިޔާވި މައްސަލައެއްވެސް އެދުވަސްތަކުތެރޭގައި ފެންމަތިވިއެވެ. .
ސަދާގެ ބަނޑުގައި ރިއްސައި، ވަރަށް ގަދައަށް ހޮޑުލާތީ އެ އަހަރުގެ އޮކްޓޯބަރު މަހުގެ ކުރީކޮޅު އެންމެ ފުރަތަމަ ގެންދިޔައީ ފުވައްމުލަކުގެ ފްލޫ ކްލިނިކަށެވެ. އެއީ ކޮވިޑްގެ އަލާމާތެއް ކަމަށް ބަލައި، ސަދާގެ ހާލަތު އިތުރަށް ގޯސްވާތީ ފްލޫ ކްލިނިކުން ސަދާ ފޮނުވާލީ ފުވައްމުލަކު ހޮސްޕިޓަލަށެވެ.
އާއިލާއިން ތުހުމަތު ކުރާ ގޮތުގައި ސަދާ ނިޔާވީ 2021 އޮކްޓޯބަރު ތިން ވަނަ ދުވަހު ޑޮކްޓަރަށް ދެއްކުމުން ޖެހި، އިންޖެކްޝަނެއްގެ ސަބަބުންނެވެ. އިންޖެކްޝަން ޖެހިތާ ފަސްވަރަކަށް މިނެޓް ތެރޭގައި ކަމަށް ބުނެ އާއިލާއިން ވަނީ އެމައްސަލަ ބަލައިދިނުމަށް އެދި ހެލްތުމިނިސްޓްރީއަށް ހުށަހަޅާފައެވެ. އަދި އެ މައްސަލައާއި ގުޅިގެން މިނިސްޓްރީން ނެރުނު ރިޕޯޓުގައިވެސް ސަދާ އަށް ފަރުވާ ދިނުމުގައި ޑޮކްޓަރުންނާއި ނަރުހުން އިހުމާލުވެފައިވާ ކަމަށް ބުނެފައިވެއެވެ.
ހަމަމިއާއެކު މޯލްޑިވްސް މެޑިކަލް އެންޑް ޑެންޓަލް ކައުންސިލުން މި މައްސަލަ ބެލުމަށްފަހު ސަދާ އަށް ފަރުވާދިން ދެ ޑޮކްޓަރެއްގެ ލައިސަންސް ވެސް ސަސްޕެންޑު ކުރިއެވެ.
އެ ހާދިސާ ހިނގިތާ ތިން އަހަރުފަހުން މިއަދު ސަދާގެ ބައްޕަ، ސަދާގެ ބައްޕަ އަދި ނެޝަނަލް ހޮޓެލްސް އަދި ގެސްޓްހައުސް އެސޯސިއޭޝަންގެ އެސްކޯ މެމްބަރު ސައުދުﷲ އަހުމަދު ހަސަން ފޭސްބުކްގައި ކުރި ޕޯސްޓެއްގައި ބުނީ، ސަދާ ނިޔާވި ހާދިސާ އާއި ގުޅިގެން ފުވައްމުލަކު ހޮސްޕިޓަލް އާއި ދެކޮޅަށް ކުރާ ދައުވާގެ ފުރަތަމަ އަޑުއެހުން މާދަމާ 11:00 އޮންނާނެ ކަމަށެވެ. ސަދާގެ ބައްޕަ ބުނީ މި މަސައްކަތް ފެށީ ދިވެހި ދައުލަތުގެ ހޮސްޕިޓަލް ތަކުން ފަރުވާ ކުޑަވުމުގެ ސަބަބުންނާއި ބަލިމީހުންނާއި މެދުވާ އިހުމާލު ތަކުގެ ސަބަބުން ލިބޭ އަނިޔާ ތަކަށް ހައްލެއް ލިބޭނޭ ކަމުގެ ފުރިހަމަ އުއްމީދުގައި ކަމަށެވެ.