ދިރާގުން ކުރިއަށް ގެންދިޔަ "ވިން އަ ޓެސްލާ" ކާރުގެ ނަސީބުވެރިޔާ، އީދު ދުވަހު ހުޅުމާލޭގައި އެ ކުންފުނިން ބާއްވާ އީދު ޝޯގައި ހޮވާނެ ކަމަށް އެ ކުންފުނިން ބުނެފި އެވެ.
ދިރާގުގެ މެނޭޖަރު ޕަބްލިކް ރިލޭޝަންސް، ޖައިޝާން ހަމީދު ވިދާޅުވީ ގިނަ ބައެއްގެ ތަރުހީބު ލިބުނު "ވިން އަ ޓެސްލާ" ޕްރޮމޯޝަނުގެ ލަކީޑްރޯ އީދު ޝޯގައި ނަގާނެ ކަމަށެވެ. މި ލަކީޑްރޯއަށް ވަރަށް ގިނަ ބަޔަކު އިންތިޒާރު ކުރަމުން އަންނަ ކަން ވެސް އޭނާ ފާހަގަކުރެއްވި އެވެ.
މެދުކެނޑުމަކަށް ފަހު މި އީދުގައި އަލުން ފަށާ ދިރާގުގެ އީދު ޝޯ ކުރިއަށް ގެންދަން ނިންމާފައި ވަނީ ހުނަރުވެރި ގިނަ ދިވެހި ފަންނާނުންތަކާ އެކުގަ އެވެ. އޭގެ ތެރޭގައި ރެވިއޯ، ސްކައިރޮކް، އީކުއެޓިކް ވައިބް، ޓްރެފިކް ޖޭމް، ޑީޖޭ އަލީ އަދި ސިމްބޮލިކް ރެކޯޑްސް ހިމެނެ އެވެ.
ދިރާގު އީދު ޝޯ އޮންނާނީ އީދު ދުވަހުގެ ރޭގަނޑު 8:00 އިން ފެށިގެން ހުޅުމާލެ ސެންޓްރަލް ޕާކުގަ އެވެ. މި ހަރަކާތުގެ ހޯސްޓިން ޕާޓްނަރަކީ އެޗްޑީސީ އެވެ.