ތައިލެންޑުގެ ބޭސް ކުންފުންޏަކުން އުފައްދާފައިވާ 15 ވައްތަރެއްގެ ބޭސް ބޭނުން ކުރުމުގައި ސަމާލުވުމަށް މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އިން އެދިއްޖެއެވެ.
މިއަދު އެމްއެފްޑިއޭ އިން ނެރުނު ބަޔާނެއްގައި ބުނީ ތައިލެންޑުގެ ބޭސް ކުންފުންޏެއް ކަމަށްވާ ސެވެން ސްޓަރ ފާމަސޫޓިކަލް ސީއޯ، އެލްޓީޑީ އިން ބޭސް އުފެއްދުމުގައި ބޭނުންކޮށްފައިވާ ސޯބިޓޯލް އެކްސްޕީޑިއެއްޓެއްގައި ނުރައްކާތެރި ކެމިކަލްގެ މާއްދާއެއް އެކުލެވިފައިވާކަން ފާހަގަކުރެވިފައިވާ ކަމަށެވެ.
އެގޮތުން ތައިލެންޑުގެ ބޭސް ރެގިއުލޭޓުކުރާ އޮތޯރިޓީން 15 ބާވަތެއްގެ ބޭސް ރިކޯލްކޮށް އެކަން އެ އޮތޯރިޓީއަށް އަންގާފައިވާ ކަމަށްވެސް ބުނެފައިވެއެވެ.
އެގޮތުން އެ އޮތޯރިޓީން ފާހަގަކޮށްފައިވާ ބޭސްތަކަކީ
ޑޮމްޕާސްޓަރ ސަސްޕެންޝަން
ޕެރެސްޓަރ ސަސްޕެންޝަން
ސްޓަރޓެކް ސިރަޕް
ކާރބޮސޯލް ސިރަޕް
ފޭޓެކް ސިރަޕް
ސެޓަފެން ސިރަޕް
ކޯ- ޓްރިމެކްޒޯލް މިކްސްޗަރ
ކްރެސްބުފެން ސަސްޕެންޝަން
ކްރެސްޓްރިމް ސަސްޕެންޝަން
ކްރެސްކޯލެޓް ސިރަޕް
ކްރެސްޓެކް ސިރަޕް
ކްރެސްބްރޮކްޒޯލް ސިރަޕް
ސްޓަރޓިފިން ސިރަޕް
އިބުސްޓަރ ސަސްޕެންޝަން
ޑޮމްޕާކްރެސް ސިރަޕް
ތައިލެންޑަކީ ދިވެހިން ބޭސްފަރުވާއަށް ގޮސް އުޅޭ ގައުމަކަށްވުމުން، ބައެއް ހާލަތްތަކުގައި އަމިއްލަ ބޭނުމަށް ތައިލެންޑުން ބޭސް އެތެރެކުރާތީ މިކަމަށް ސަމާލުވުމަށްވެސް އެ އޮތޯރިޓީން ވަނީ އިލްތިމާސްކޮށްފައެވެ.
އެހެންކަމުން ރައްކާތެރިކަމުގެ ފިޔަވަޅެއްގެ ގޮތުން، ބޭސް ސިޓީ އަށް ބޭސް އެތެރެކުރާއިރު، ހާއްސަ ސަމާލުކަމެއް ދީގެން ޕޯޓުތަކުގައި ބަލައި ފާސްކުރަމުން ގެންދާނެ ކަމަށްވެސް އެ އޮތޯރިޓީން ވަނީ ބުނެފައެވެ.