1445 ވަނަ އަހަރުގެ އަޟުޙާ އީދުގެ މުނާސަބާގައި ރާއްޖޭގެ އެކި ހިސާބުތަކުގައި ކުރިއަށް ގެންދާ ހާއްސަ އީދުގެ ހަރަކާތްތަކަށް ބަލާލާއިިރު މިއީ ރާއްޖޭގައި ވޭތުވެދިޔަ އަހަރުތަކުގައި އެންމެ ކުލަގަދަކޮށް އަދި އެންމެ ފޯރީގައި ކުރިއަށްދާ އީދެއްކަމާމެދު އެއްވެސް ޝައްކެއް ނެތެވެ.
އިއްޔެ ހެނދުނު ފެށި އަޟުހާ އީދުގެ އެކިއެކި ހަރަކާތްތައް ބަހާލައިގެން އަންނަ ހުކުރު ދުވަހާ ހަމައަށް ކުރިއަށްދާ ގޮތަށް ވަނީ ރާވާފައެވެ.
އަޟްހާ ޢީދުގެ ކުޅިވަރުތައް ގިނަ ރަށްރަށުގައި އީދުވުމާއެކު، އީދުވިލޭރޭ ފަށާފައިވަނީ ޢީދަށް ގޮވުމާއި ޢީދު ހުޅުރޯކުރުމުންނެވެ. އެކި ރަށްރަށުގައި މި ހަރަކާތަށް ތަފާތު ނަން ވެސް ވަނީ ދީފައެެވެ.
މި ހަރަކާތަށް ބައެއް ރަށްރަށުގައި ޢީދު ހުޅުޖެހުމޭ ވެސް ކިޔައި އުޅެއެވެ. މި ހަރާކާތަށްފަހު އަންހެނުންނާއި ފިރިހެނުންގެ ސަގާފީ ކުޅިވަރުތައް ރޭ ވަނީ ބާއްވާފައެވެ.
ޢީދުގެ ރަސްމީ ހަރާކާތްތައް ފަށާފައިވަނީ މިއަދު ހެނދުނު 07:00 ގައި ކުރި ޢީދު ނަމާދަށްފަހު އެެވެ. މާލޭގައި ބޮޑު ޖަމާއަތުގައި ޢީދު ނަމާދު ކުރީ މާފަންނު ސްޓޭޑިއަމްގައެވެ. މި ޖަމާއަތުގައި ރައީސް މުޢިއްޒު ބައިވެރިވެވަޑައިގަތެެވެ. އީދު ނަމާދުގެ ބޮޑު ޖަމާޢަތުގައި ބައިވެރިވެ ވަޑައިގެން ޢީދު ނަމާދު ކުރެއްވުމަށް ފަހު ރައީސް ވަނީ ނަމާދަށް ގޮސް ތިބި ބައެއް މީހުންނާ ސަލާމް ކުރައްވައިފަ އެވެ.
މާލެސިޓީގައި އީދު ކުޅިވަރުތަކުގެ ތެރެއިން އިއްޔެ ހަވީރު ކުރިއަށް ގެންދިޔަ ހަރަކާތެއް
މާލެސިޓީގައި އީދު ކުޅިވަރުތަކުގެ ތެރެއިން އިއްޔެ ހަވީރު ކުރިއަށް ގެންދިޔަ ހަރަކާތެއް
މާލޭސަރަހައްދުގެ ހުރިހާ އަވަށްތަކުން ފެށިގެން މާލެ އަތޮޅުގެ ހުރިހާ ރަށެއްގައި ވެސް އަދި އަތޮޅުތެރޭގެ އެކިއެކި ރަށްރަށުގައިވެސް މި އަޟުހާ އީދުގެ ހަރަކާތްތައް ކުރިއަށް ގެންދަން ހަމަޖައްސާފައި ވަނީ ފިސާރި ފޯރިއާއި ޖޯޝާއެކީގައެވެ.
މުޅި ރާއްޖޭގައި އީދު ފާހަގަކުރަމުންދާއިރު، އަންނަ ހުކުރު ދުވަހާ ހަމަޔަށް ދިގުދެމިގެންދާ ހަރަކާތްތައް ގްރޭޓާ މާލޭގެ ތިން އަވަށްކަމަށްވާ، މާލެ، ހުޅުމާލެ އަދި ވިލިމާލޭގައި ބާއްވާ ގޮތަށް ބަލާލާއިރު؛
އީދު ހަރަކާތްތައް ރޭވިފައިވާ ގޮތް
ވިލިމާލެ
- މިރޭ 8:30 ގައި އީދު ބަޑި އަދި އީދު ބޮޑުބެރު ޝޯ އެއް
- މާދަން ހެނދުނު 8:30 ގައި އީދު ސައި، 10:30 ގައި އީދު ކުޅިވަރު
- ހަވީރު 4:30 ގައި ކޯޑި ނެރުން
- އަންނަ ހޯމަ ދުވަހު ސަގާފީ ކުޅިވަރު
- އަންގާރަ ދުވަހު ކުޑަކުދިންގެ ހަވީރެއް
- ބުދަ ދުވަހު ބޮޑު ބެރު ޝޯއަކާއި ދަފިނެގުން
- ބުރާސްފަތި ދުވަހުގެ ރޭގަނޑު ބޮޑުމަސް ނެރޭނެ އަދި މާލި ޕެރޭޑެއް
- ހުކުރު ދުވަހު އީދު ޝޯއާއި އެކު ހަވާ އަރުވާނެ
މާލެ
- މާދަމާ ހަވީރު 4 އިން 6 އަކަށް އާޓިފިޝަލް ބީޗުގައި އީދު މަޖާ އޮންނާނެ
- ރޭގަނޑު ސޯޝަލް ސެންޓަރުގައި އީދު ޝޯއެއް
ހުޅުމާލެ
- މިރޭ ވެެދުމަށް ދިއުމާއި އިތުރު ހަރަކާތްތައް އޮންނާނެ
- މާދަމާ ކުޑަކުދިންގެ ހަވީރެއް އޮންނާނެ؛ އަދި ރޭގަނޑު ބޮޑު މަސް ބޭނުމާއި ހަވާ އެރުވުން އޮންނާނެ
- އަންނަ ހޯމަ ދުވަހު ކޯޑި ކެނޑުމާއި ކުޑަކުދިންގެ ހަވީރެއްގެ އިތުރުން ދިރާގު އީދު ޝޯއެއް އޮންނާނެ
ފާފު ބިލެތްދޫ އީދުހަރަކާތުގެ ތެރެއިން ކުޑަކުދިންގެ ހަވީރު
ރާއްޖޭގެ އެކި ހިސާބުތަކުގައި އީދު ކުޅިވަރުތައް ކުރިއަށް ގެންގޮސްފައިވާ ގޮތަށް ބަލާލާއިރު ވަކި އަތޮޅަކަށް ދޫކުރާނެ އަނެއް އަތޮޅެއް ނެތެވެ. މިވެނި ރަށަކަށް ވުރެ އަނެއް ރަށެއްގެ ކުޅިވަރުތަކާއި ހަރަކާތްތައް މާފޯރި ގަދައޭ ބުނާނެ ޖާގައެއް ނެތެވެ. ކޮންމެ ރަށެއްގައިވެސް އީދު ހަރަކާތްތައް ކުރިއަށް ގެންގޮސްފައި ވަނީ ދުރާލާ ރާވައިގެން މުޅި ރަށާއި ރަށު ކައުންސިލު އެއްބައިވެގެން ނުހަނު ފޯރިއާއި ޖޯޝާއެކުގައެވެ.
އަތޮޅުތަކުގެ ރަށްރަށުގެ އީދު ހަރަކާތްތަކަށް އަވަސްކަޅިއަކުން
ފައިނުގައި އީދު ހަރަކާތްތަކުގެ ފޯރި އޮތީ ނުހަނު ގަދަކޮށް ކަމަށް އެރަށުން މައުލޫމާތު ދީފައިވެއެވެ. ފައިނުގައިވެސް ވަނީ އަޟުހާ އީދަށްޓަކައި ހާއްސަ ކުޅިވަރުތަކާއި ހަރަކާތްތައް ކުރިއަށް ގެންގޮސްފައެވެ. ރަށުގެ ކުދިބޮޑު އެންމެންވެސް އެކުވެގެން އީދުގެ ކުޅިވަރުތަކާއި ހަރަކާތްތައް ކުރިއަށް އޮތް ދުވަސްތަކާއެކު ވަނީ ރާވާފައެވެ.
ސިޓީތަކުގެ ތެރެއިން އައްޑޫސިޓީ
އައްޑޫސިޓީގެ އީދިސަމާ1445، މިއީ ބަސްހުއްޓޭހާ ފުރިހަމަ ކަމެއް، އެއްބައިވަންތަކަމާއި އެކުވެރިކަމުގެ މުޅިން އައުފަންތިއެއްގައި އީދުގެ ހަރަކާތްތައް ކުރިއަށް ގެންދިޔަ މަންޒަރު ވަނީ ފެނިގެން ގޮސްފައެވެ. އީދަށް އުޟުހިޔާ ކަތިލައި މުޅި އަތޮޅަށް ބަހާލާފައިވާއިރު ކުޅިވަރާއި ކާންދިނުމުގެ ކަންކަންވެސް ގެންގޮސްފައިވާލެއް ހައުދަހައިވާ ފުރިހަމައެވެ.
ނޫނޭވާ! އައްޑޫސިޓީގެ ދަރިންނަށް ހަމަ އައްސަރިބަހާއި ސާބަހެވެ.
"މި އީދަކީ ހަނދާނުގައި ފޮރުވޭނެ ފުރިހަމަ ތަސްވީރުތަކަކަށް ހަދައިދިނުމުގައި އައްޑޫސިޓީގެ ރައްޔިތުން ވަރެއް ހަމަނެތޭ ބުނެވޭނީ، މިވެނި ކަމެއް ނެތީއޭ ސަޅި ނޫން، ހަމަ ކޮންމެ ކަމެއްވެސް ތަލިން ކުޅު ހިކޭހައި ފުރިހަމަ، މިފަހަރު މިކޮޅަށް ނައިސް މާލޭގައި ހުރުމަކީ ކުރި މޮޔަކަމެއް އިނގޭ!" މިއީ ގާތް އެކުވެރިއަކު ރަށާއި އަތޮޅުގެ ވާހަކަ ކިޔައިދިން ގޮޮތެވެ.
"މިސިޓީގައި އެހެން ފަހަރުތަކުގައިވެސް އީދު ފާހަގަކުރޭ، އެކަމަކު މިއީ ހަމަ ބެސްޓް، އަދި މި ހަފުތާގައި ކުރިއަށް އޮތީ ކަންކަން،" އައްޑޫސިޓީގައި އީދުގެ ކަންކަން ކުރިއަަށް ގެންދަނީ ދުރާލާ ރޭވިގެންކަމަށް މަރަދޫ އިން ވާހަކަދެއްކި ފަރާތަކުން ބުންޏެވެ.
ރ ފައިނުގެ އީދު ކުޅިވަރުގެ ތެރެއިން….
ދަގެނތި
ދަނގެއްޗަކީވެސް އީދުގެ ހަރަކާތްތައް ފޯރީގައި ގެންދާ ރަށެކެވެ. އެހެންކަމާއެކުވެސް އެރަށުގެ އަންހެނަކު ބުނި ގޮތުގައި މިއީދަކީ ހަނދާނުން ފިލާނުދާނެ ފަދަ އީދެކެވެ. އެންމެންގެ އެއްބައިވަންތަކަމާއެކު، ހަމަޖެހިގެން އުފާވެރި މާހައުލެއްގައި އަޟުހާ ޢީދުގެ ހަރަކާތްތައް ފަށާފައިވަނީ ބޮޑު ޖަމާޢަތުގައި ކުރެވުނު ޢީދު ނަމާދުންނެވެ. އެއަށްފަހު، އުޟުހިޔާ ކަތިލުން ކުރިއަށް ގެންގޮސްފައިވާއިރު، މި ހަރަކާތް ބަލާލުމަށް ކުދި ބޮޑު އެތައް ބަޔަކު އެ ރަށު އޯޕަން ސްޓޭޖް ސަރަހައްދަށް އެއްވިއެވެ. ހަރަކާތްތަކުގެ ތެރެއިން ދޫކޮށްލާ އެތައް އިނާމްތަކުގެ ތެރެއިން އާއިލީ ހަވީރާއި އިސް ރަށްވެހިންގެ ހަވީރުގެ ތެރެއިން އެ ހަވީރުގައި ބައިވެރިވާ ހުރިހާ ބައިވެރިންގެ މެދުގައި ގުރުލައިގެން ހޮވޭ ނަސީބުވެރި ފަރާތަށް ދޫކޮށްލާ ބޮޑު ހަދިޔާއަކީ އެންމެ ހާއްސަކޮށް ފާހަގަކޮށްލެވޭ އީދުހަރަކާތެވެ.
ދަނގެތީ އީދުހަރަކާތްތަކުގެ ތެރެއިން އުޟުހިޔާ ކަތިލުން….
ލާމު މާވަށް، އިސްދޫ، މާމެންދޫ، ގަން
މިއީ ކޮންމެ އީދެއްވެސް ފިސާރި ފޯރީގައި ފާހަގަކުރާ ހިސާބެކެވެ. ލާމު އަތޮޅުގެ ބައެއް ރަށްރަށުގެ ނަން ހިމަނާފައި އޮތް ކަމުގައިވިޔަސް އަލިއަޅުވާލާފައި މިވަނީ ޖުމްލަ ގޮތެއްގައި މުޅި އަތޮޅުގެ ހުރިހާ ދިމާއަކަށެވެ. ލާމަކީ ބޮޑު އަތޮޅެކެވެ. ބައެއް ރަށްރަށުގައި އީދުގެ ފޯރި ހައްޖު ދުވަހުގެ މެންދުރު ފަހުން ފެށީގެންނެވެ. އަނެެއްބައި ރަށްރަށުގައި ހައްޖު ދުވަހުގެ ރޭ ބާރަ ޖަހައި އީދު ވަނުމާއެކު އީދު ކުޅިވަރުތަައް ވަނީ ފަށާފައެވެ. އެގޮތުން އީދުގެ ހަރަކާތްތައް ފަށާފައި ވަނީ އީދުވިލޭރޭ ފަށާފައިވަނީ ޢީދަށް ގޮވުމާއި ޢީދު ހުޅުރޯކުރުމުންނެވެ.
އަދި އީދު ދުވަހުގެ ހެނދުނު އީދު ނަމާދަށް ފަހު އީދު ސައި ކުރިއަށް ގެންގޮސްފައިވަނީ ހުރިހާ އެންމެންވެސް ބައިވެރިވެވޭނެ ފަދަ ގޮތަަކަށެވެ.
ލާމު އިސްދޫ އީދު ހަރަކާތުގެ ތެރެއިން….އިސްދޫ އީދުއުފާ
ލާމު މާމެންދޫ އީދު ހަރަކާތުގެ ތެރެއިން، އީދު ސައި
ލާމު މާވަށުގައި އީދު ހަރަކާތުގެ ތެރެއިން މާލިއެރުން
ފ ދަރަނބޫދޫ
ފ އަތޮޅު ދަރަނބޫދޫ ވެސް ވެގެން މި ދިޔައީ އެހެން ރަށްރަށަށްވުރެ ތަންފުކެއްވެސް ދޫޫނުކޮށް އީދުގެ ހަރަކާތްތަކުގައި ކުރިއަށްޖައްސާފައިވާ ރަށެއްގެ ގޮތުގައެވެ. ދަރަނބޫދޫގައި ތަފާތު އެކިއެކި ހަރަކާތްތައް އީދުގެ މުނާސަބާގައި އީދު ފާހަގަ ކުރުމަށް ކުރިއަށް ގެންދިއުމަށް ވަނީ ރާވާފައެވެ. ޢީދު ފާހަގަ ކުރުމުގެ ހަރަކާތްތައް ކުރިޔަށް ގެންދިޔުމުގެ ތެރޭގައި، ބަންގާޅަ ދިޔުން، މަގުމަތީ ކުޅިވަރު. ފެންކުޅި، ދަފި ނެގުން، މާލި ނެށުން، ކޯޑި ނެރުން ފަދަ ކުޅިވަރުތައް ހިމެނެއެވެ. މިރަށުގައިވެސް އީދުމަޅި ރޯކުރުމާއި ޒަމާނާ އެއްގޮތަށް އެކިކުލަކުލައިގެ ބޮކިތަކުން އީދުމުބާރަކް މޫދުތެރޭގައި ދިއްލިއެވެ.
ދަރަނބޫދޫގައި އަޟުހާ ޢީދު ފާހަގަކުރުމުގެ ގޮތުން އަށްޑު އަސުރަށް ބީރުއެރުވުމުގެ ހަރަކާތްކުރިޔަށް ގެންދިޔުން
ފާފުދަރަނބޫދޫގައި އަޟުހާ ޢީދު ފާހަގަކުރުމުގެ ގޮތުން އަށްޑު އަސުރަށް ބީރުއެރުވުމުގެ ހަރަކާތްކުރިޔަށް ގެންދިޔުން
"މިރަށުގައި މިފަހަރު ކުޅިވަރުގެ ރޫހު ވަރަށް ގަދަކޮށް މިއޮތީ، ވަކިވަކިން ނަން ހާމަ ކުރަންޏާ މުޅި ރަށުގެ އެންމެންގެ ނަންވެސް ހިމަނަން ޖެހޭނެ. ކުދިބޮޑު އެންމެން އެކުގައި މި ހުރިހާ ކަމެއްގައިވެސް ހަރަކާތްތެރިވެ ބައިވެރިވޭ، ވަރަށް އުފާވެރި މަންޒަރެއް، ނިކަން ހިތްހަމަޖެހޭ،" ދަރަނބޫދޫ މީހަކު ހުވަދޫނޫހަށް މައުލޫމާތު ދެމުން ކިޔައިދިނެވެ.
ކޮންމެއަކަސް މިހާތަނަށް ކުރިއަށްދިޔަ ހަރަކާތްތައް ބަލާލުމުންވެސް މިފަހަރު ދަރަނބޫދޫ ރައްޔިތުންގެ ޖޯޝާއި ހިތްވަރު ފެނިއެނގި ހާމަ ވެގެން ދެއެވެ.
ދަރަނބޫދޫގައި އަޟުހާ ޢީދު ފާހަގަކުރުމުގެ ގޮތުން އަށްޑު އަސުރަށް ބީރުއެރުވުމުގެ ހަރަކާތްކުރިޔަށް ގެންދިޔުން
ދަރަނބޫދޫގައި އަޟުހާ ޢީދު ފާހަގަކުރުމުގެ ގޮތުންކުޑަކުދިންގެ ކުޅިވަރުތައް
ދަރަނބޫދޫގައި އަޟުހާ ޢީދު ފާހަގަކުރުމުގެ ގޮތުންކުޑަކުދިންގެ ކުޅިވަރުތައް
ނ އަތޮޅު ވެލިދޫ އަކީ ވެސް މިފަހަރުގެ އީދުގައި ވަރަށް ފުރިހަމަ މަންޒަރެއް ދައްކުވައިދީފައިވާ ރަށެކޭ ދެންނެވުމަކީ އެހެން ރަށްރަަށަށް ކުރެވޭ ނާއިންސާފަކަށް ނުވާނެކަން ގައިމެވެ.ސަބަބަކީ ރާއްޖޭގެ ހުރިހާ ކަންކޮޅުތަކުންވެސް މި އީދަށް ވަނީ ވަރަށް ބޮޑެތި ތައްޔާރީތައް ވެފައެވެ. ވެލިދޫގައި ވެސް 15 ޖޫން އިން ފެށިގެން ކުރިއަށް ގެންދަން ހަމަޖައްސާފައިވާ ހަރަކާތްތަކުގެ ތެރޭގައި، ފުރަތަމަ ދުވަސް ކަމަށްވާ ހައްޖުދުވަހު 15 ޖޫން ގައި އީދުމަޅި، ރަންފޮށި އުފުލުން، ދެވަނަ ދުވަސް އާދެ އީދުގެ ފުރަތަމަ 16 ޖޫން ގައި އީދު ނެރުން، އީދުނަމާދު، އީދު ސައި، ފައިގަތަޅާ މުބާރާތް، މާލިބައްތެލި، ހަވާއެރުވުން، ވާދެމުން، ސްޓޭޖު ކުޅިވަރު، ހިމެނެއެވެ. އަދި ވަޅުއީދު ދުވަހު، 17 ޖޫން އިން 20 ޖޫން އާ ހަމައަށް ތަފާތު އެކިއެކި ހަރަކާތްތައް ވަނީ ރޭވިފައެވެ. ވެލިދޫގެ އީދު ހަރަކާތްތައް ނިންމާލުމަށް އޮތީ 20 ޖޫން ގައި އީދު ފުރުވާލުމުންނެވެ.
އީދު ޝެޑިއުލް ނޫނު ވެލިދޫ
ނޫނު ވެލިދޫ އީދުއުފާ، ކުލަރަން
ވެލިދޫ އީދުކުޅިވަރު، ވާދެމުމުގެ ހަރަކާތުގެ ތެރެއިން
އދ ދިއްދޫ، ޢީދު ބަޑި ރޯކުރުން
އުތުރުގެ ރަށްރަށުގައިވެސް އީދުގެ ފޯރި ހަމައެންމެ ތަންފުކެއްވެސް ކުޑައެއް ނޫނެވެ. ދިއްދޫގައި އީދު ހަރަކާތްތައް ގެންގޮސްފައިވަނީ ނިހާޔަތަށް ޝޯހު ކުރުވާހާ ފުރިހަމަކޮށެވެ.
އީދުގެ ކުޅިވަރުތަކާއި ތަފާތު ހަރަކާތްތައް ކުރިއަށް ގެންދަން ހަމަޖެހިފައިވަނީ ނުހަނު ފުރިހަމައަށް ރޭވުންތެރިކަމާއެކުގައެވެ. ރަށުގެ ކުދިބޮޑު އެންމެންވެސް ވަނީ ހިނިތުންވެފައެވެ.
އއ މަތިވެރި އީދު ކުޅިވަރުތަކުގެ ތެރެއިން
އއ މަތިވެރީގެ ހަރަކާތްތައްވެސް އެހާ ފުރިހަމައެވެ. ރަށުތެރެ އީދުގެއެއްހެން ހައްދާލާފައިވާއިރު، ރައްޔިތުންވެސް ވަނީ އެހާވަރަށް ތައްޔާރުވެފައެވެ. ކުދިބޮޑު އެންމެން ދަނީ އީދު ކުޅިވަރުތަކުގައި ބައިވެރިވަމުންނެވެ.
ކެނދިކުޅުދޫ އީދު ކުޅިވަރުތައް
ކެނދިކުޅުދޫ އަށް ނަޒަރު ހިންގާލާއިރު މިރަށުގައި އީދު ހަރަކާތްތައް 19 ޖޫން އާ ހަމައާށް އީދު ކުޅިވަރުތައް ގެންދަން ވަނީ ހަމަޖައްސާފައެވެ. ކެނދިކުޅުދޫ ޒުވާނަކު ހުވަދޫ ނޫހަށް ބުނި ގޮތުގައި ކެނދިކުޅުދޫގެ ތާރީހުގައިވެސް މިއީ އެންމެ ފުރިހަައަށް އީދު ފާހަގަކުރާ ފަހަރެވެ.
ފާފު ބިލެތްދޫ އިދު ހަރަކާތުގެ ތެރެއިން
ފ ބިލެތްދޫޫގައި ބޭއްވި ކުޑަކުދިންގެ ހަވީރަކީ ތުބަށް އިނގިލި އަރާހާ ފުރިހަމަ
ފާފު ބިލެތްދޫ އީދުހަރަކާތުގެ ތެރެއިން
ކުޅުދުއްފުށިސިޓީގެ އީދު ކުޅިވަރުތަކުގެ ތެރެއިން….
ހުވަދުއަތޮޅަކީ ބޮޑު އަތޮޅެކެވެ. އެއަތޮޅުގެ އެކި ރަށްރަށުގައި އީދު ހަރަކާތްތައް ގެންގޮސްފައިވާލެއްވެސް ނުހަނު ފުރިހަމައެވެ. އެކިކަހަލަ ކުޅިވަރުތަކާއި އީދުގެ ސަގާދީ ހަރަކާތްތަކާއި ޒަމާނާ ގުޅޭ ކަންތައްތަކާއި އިދުޝޯވތައް ވެސް ކުރިއަށް ގެންދިއުމަށް ވަނީ ނިންމާފައެވެ. އެގޮތުން ވާދޫ ޒުވާނުންގެ ބޮޑުބެރު ހާއްސަކޮށް ފާހަގަކޮށްލެވެއެެވެ.
ގދ ވާދޫ އީދު ކުޅިވަރު ހަރަކާތުގެ ތެރެއިން
ގއ ވިލިނގިލީ އީދުހަރަކާތްތަކުގެ ތެރެއިން
ތިނަދޫސިޓީގެ އީދު ހަރަކާތްތަކުގެ ތެރެއިން
ސިޓީތަކުގެ ތެރެއިން ތިނަދޫ ސިޓީގެ އީދު ހަރަކާތްތަކަށް ކަޅިއެއް
ތިނަދޫ ސިޓީގައި އީދު ހަރަކާތްތައް ފެށުމުގެ ކުރިން އެންމެ ފުރަތަމަވެސް ފާހަގަކޮށްލެވުނީ އެސިޓީގެ މަލަމަތި ރީތިކޮށްލަދިން، އެސިޓީގެ މައިދޮރާށިން ފެނުނު މަންޒަރެވެ. ތިނަދޫ ސިޓީގެ ބަނދަރުމަތީގައި މާތް الله ގެ އިސްމުފުޅާއި މާތް ރަސޫލާ محمد ﷺ ގެ ނަންފުޅު ބޭނުންކޮށްގެން މޮނިއުމެންޓެއް ގާއިމްކޮށްފައިވާ އެ ޗާލު މޮނިއުމެންޓުތައް ބަހައްޓާފައިވަނީ ތިނަދޫ ސިޓީގެ ބަނދަރު ސަރަހައްދު ރަސްމީ ޖެޓީ ކުރިމަތީގައި އެވެ. އެ މޮނިއުމެންޓު ރަސްމީކޮށް އާންމުކޮށްފައިވަނީ އީދު ވިލޭރޭ އެސިޓީގައި ބޭއްވި ޚާއްސަ ރަސްމިއްޔާތެއްގައި އެވެ.
ތިނަދޫ ސިޓީގެ މޭޔަރު ސައުދު އަލީގެ ވިސްނުންފުޅާއި އެކު ގާއިމްކުރި އެ ދެ މޮނިއުމެންޓު ރަސްމީ އާންމުންނަށް ހުޅުވާލީ އަޟްހާ އީދުގެ ހަރަކާތްތައް ތިނަދޫ ސިޓީގައި ފެށުމަށްޓަކައި ތިނަދޫ ސިޓީ ކައުންސިލުން ކުރިޔަށް ގެންދިޔަ ޚާއްސަ ރަސްމިއްޔާތެއްގައި އެވެ. މިއީ ސީދާ ސިޓީ ކައުންސިލްގެ ބަޖެޓުން ހަރަދުކޮށްގެން ގާއިމްކުރި ދެ މޮނިއުމެންޓެއްކަމަށް ތިނަދޫ ސިޓީ ކައުންސިލުން ވަނީ ހާމަކޮށްފައެވެ.
ތިނަދޫސިޓީގެ އީދު ހަރަކާތްތަކުގެ ތެރެއިން
އީދުހަރަކާތްތައް ރަށްރަށުގައި ކުރިއަށް ގެންގޮސްފައިވަނީ ފަހުގެ ތާރީހެއްގައި ނުފެންނަހާ ފުރިހަމަކޮށް
މުޅި ރާއްޖެވަނީ 1445ގެ އަޟުހާ އީދަށް ދިއްލާއަޅާފައޭ ބުނަނީ ހަމަފިސާރިތެދެއްކަން މިއީދުގައި މުޅި ރާއްޖޭގެހުރިހާ ދިމާއަކުންވެސް ހާމަކޮށްދީފި
މޮޅަދޫބަނދަރުމަތިން ފެންނަ ވެލާލައިފްސައިކަލް ދައްކުވައިދޭ މޮނިއުމަންޓް
އީދުގެ ހަރަކާތްތައް ފެށުމުގެ ގޮތުން ބައެއް ރަށްރަށުގައި ބެހެއްޓި މޮނިއުމަންޓްތަކުގެ ވާހަކަ ހިމަނާނުލައި އީދުގެ ވާހަކަ ނިންމާލެވޭކަށް ނެތެވެ. މިއީދުގައި އެންމެ ހާއްސަ ދެމޮނިއުމަންޓަކަށް މުޅި ސޯޝަލްމީޑިޔާގައިވެސް ފާހަގަކޮށްފައި ވަނީ ތިނަދޫސިޓީގެ ބަނދަރުމަތިން ފެންނަ ﷲތައާލާއާއި ނަބިއްޔާ ޞައްލަﷲ އަލައިހި ވަސައްލަމަގެ ނަންފުޅު ރަމްޒުކޮށްދޭ ދެ މޮނިއުމަންޓެވެ، އަދިދެން މޮޅަދޫ ބަނދަރުމަތިން ފެންނަ ވެލާ ލައިފްސައިކަލް ދައްކުވައިދޭ މޮނިއުމަންޓެވެ.
ދިވެހިރާއްޖޭގައި ޒަމާނުއްސުރެ އީދުގެ ހަރަކާތްތައް ކުރިއަށް ގެންގޮސްފައިވަނީ އެބައެއްގެ ގައިގައި ހުރި ފެންވަރަކުން އެންމެ ފުރިހަމައަށްކަން ތާރީހު ހެކިދެއެވެ. ދެއީދު އަންނައިރު ދެއީދުވެސް އީދުހަރަކާތްތަކުން ފަޅުފިލުވާލައެވެ. އެހެންކަމުގައިވިޔަސް އާންމުގޮތެއްގައިވެސް ބޮޑުކޮށް ފާހަގަކުރަނީ އަޟުޙާއީދެވެ. އަދި މި 1445 ވަނައަަހަރުގެ އަޟުޙާ އީދު ވެގެންމިދަނީ ތާރީހުގައި ގަދަދެއްޔަކުން ފަވާލެވޭފަދަ ފުރިހަމަ އީދަކަށެވެ.
އީދުގެ ފޯރި ނުނަގާ ރަށެއް ނެތެވެ. އީދުގެ ކުލައިން ކުލަ ނުޖެހޭ ކުޑަކުއްޖެއް ބޮޑު މީހެއް ނެތެވެ. އީދުގެ ރަހައިން ރަހަ ނުލިބޭ ހަމައެކަކުވެސް ނެތޭ ބުނާވަރު ވެއެވެ. ޔަގީނުންވެސް މުޅި ރާއްޖެވަނީ 1445ގެ އަޟުހާ އީދަށް ދިއްލާއަޅާފައޭ ބުނަނީ ހަމަފިސާރިތެދެއްކަން މިއީދުގައި މުޅި ރާއްޖޭގެހުރިހާ ދިމާއަކުންވެސް ހާމަކޮށްދީފިއެވެ. އަދި މި ހަފުތާގެ ހުރިހާ ދުވަހަކީ އީދުގެފޯރީގައި އުފާފާޅު ކުރަން ލިބިފައިވާ ފުރުސަތާއެކު އެއްވެސް ފިކުރެއް ނެތި އީދު ފުރުވާލުމާ ހަމައަށް އީދު ފާހަގަ ކުރަންވީއެވެ.