ޔޫރޯ 2020 ވަނަ އަހަރު ޑެންމާކު ކުޅުނު މެޗެއްގައި އެ ޓީމުގެ ތަރި ކްރިސްޓިއަން އެރިކްސަން އަށް ދިމާވި ހިތް ހުއްޓުމުގެ ހާދިސާ އަށް 1100 ދުވަސް ފުރުނު ދުވަހަކީ މިއަދެވެ. ކަންދިމާކުރި ގޮތުން މިފަހަރުގެ ޔޫރޯ ގައި ޑެންމާކުގެ ފުރަތަމަ ގޯލް ޖެހުމުގެ ޝަރަފު ލިބުނީ އެރިކްސަން އަށެވެ.
މިވަގުތު ސްލޮވީނިއާއާ ދެކޮޅަށް ޑެންމާކު ކުޅެމުންދާއިރު އެރިކްސަން ޖެހި ގޯލުން ލީޑު ކުރަމުންދަނީ ޑެންމާކެވެ. ގޯލުގެ ތިރީ ކަނަށް ބޯޅަ ވައްދާލައި ގޯލު ޖެހުމަށްފަހު އުފާފާޅު ކުރި އެރިކްސަންގެ މޫނުމަތިން އުފާވެރިކަން ފެނިގެންދިޔައިރު މީގެ ހަތަރު އަހަރު ކުރިން ޔޫރޯ ގައި އޭނާ އަށް ދިމާވި ހާދިސާ ފުޓްބޯޅަ އާއިލާގެ ހަނދާނަށް އައިހެން ހީވި ކަހަލައެވެ.
އެ ފަހަރުގެ ޔޫރޯގައި ޑެންމާކުން ފިންލެންޑް އަތުން 1-0 ގެ ނަތީޖާ އަކުން ބަލިވި މެޗުގެ ފުރަތަމަ ހާފުގައި އެރިކްސަން އަށް ކާޑިއޭކް އެެރެސްޓް އެއް ޖެހި (ހިތްހުއްޓިގެން) ދަނޑުމަތީގައި ފަރުވާދީފައިވެ އެވެ. ދަނޑުމަތީގައި އެދުވަހު އެރިކްސަން އަށް ފަރުވާދިން އިރު އެ ޓީމުގެ ކުޅުންތެރިން ތިބީ އޭނާ ވަށާލައިގެންނެވެ. ދެ ޓީމުގެ ކުޅުންތެރިންނާއި އޮފިޝަލުންގެ މޫނު މަތިން ވެސް އެދުވަހު ހިތާމައާއި ބިރު ފެނިގެންދިޔައިރު އެ ހާދިސާވީ މުޅި ފުޓްބޯޅަ އާއިލާ ބިރުގަންނަވާލި އަދި ދެރަކޮށްލި ކަމަކަށެވެ.
ހިތުގެ މައްސަލައާ ގުޅިގެން، އެރިކްސަން ވަނީ ހިތަށް އިމްޕްލާންޓަބަލް ކާޑިއޮވާޓާ ޑެފިބްރިލޭޓާ (އައިސީޑީ) ލައްވައިފަ އެވެ. އެ ހާދިސާއާ ގުޅިގެން އެރިކްސަން ކުޅުމާ ދުރުގައި ނުވަ މަސް ހޭދަކުރަން ޖެހުނެވެ. އެކަމަކު، އޭގެ ފަހުން 2022 ވަނަ އަހަރު ގަތަރުގައި ކުރިއަށްދިޔަ ވޯލްޑް ކަޕުގައި އެރިކްސަން ވަނީ ކުޅެފަ އެވެ. އަދި އެ މުބާރާތުގައި އެރިކްސަންގެ ފަރާތުން މޮޅު ކުޅުމެއް ވެސް ފެނިގެންދިޔަ އެވެ.
ޔޫރޯގެ މެޗެއްގެ ތެރެއިން މަރުގެ އެތިފަހަރަކުން ސަލާމަތްވި އެރިކްސަން ވަނީ އަނެއްކާވެސް ޔޫރޯގައި ޑެންމާކު ސަޕޯޓަރުން ހެއްވާލާފައެވެ. މިރޭ އެރިކްސަން ޖެހި ގޯލަކީ ހަމަގައިމުވެސް އެ ގައުމުގެ ސަޕޯޓަރުންގެ ހިތްތަކަށް ހިތްހަމަޖެހުން ގެނުވާނެ ގޯލެކެވެ.