"މިފަހަރު ނުދެވުނީތާ، ދެން ފަހަރަކު ޔަގީނުންވެސް ދާނަން،"
"އެހެރަ ފަރިކަމެއް، ނޫނޭވާ ފަތްމިިނި ކިޔަނީ ހަމަ އަސްލަށްވެސް ނަލަވީމަ، މިހާރުއްސުރެ ތައްޔާރު، އެންމެ އަވަހަށް އަންނަ އީދެއްގައި އެދިމާއަށް،"
"ހަމަަ ފިސާރި ތެދެއް، ކަމަދޫ ވަރެއް ނެތް،"
އީދުގެ ކުޅިވަރުތައް ފެށުމަށްފަހު މާގިނައިރުތަކެއް ނުވެ ސޯޝަލްމީޑިޔާގައާއި ނޫސްތަކުގެ ސުރުހީތަކުން އެރަށުގެ ނަން ތަކުރާރުވާން ފެށި ނަމަވެސް މުޅި ރާއްޖޭގައި އެެރަށް އެވަރަށް މަޝްހޫރުވެ މަގުބޫލު ވެދާނެ ކަމަށް ހީކުރެވިފައެއްވެސް ނެތެވެ. އާދެ، މިއަހަރުގެ އަޟުހާ އީދުގެ ނަމާ ގުޅިފައިވާ ބ އަތޮޅު ކަމަދޫ މުޅި ރާއްޖެއަށް އެއްވަނައިގެ ނެށުންތެރިން ތިބި އަދި އެންމެ ރީތި ޗާލު އަންހެންކުދިންވެސް ތިބީ އެރަށުގައި ކަމަށް ގިނަ ދިވެހިން އިއްތިފާގުވެ އެވާހަކަ ސޯޝަލް މީޑިޔާގައި ދަނީ ހިއްސާކުރަމުންނެވެ.
ކަމަދޫގެ އީދުހަރަކާތްތަކުގެ ތެރެއިން….ފޮޓޯ: އަހުނަފު
ކަމަދޫ އަކީ އަބަދުވެސް އީދުގައި ފޯރި ނަގާ ރަށެކެވެ. އެހެންނަމަވެސް މިފަހަރުގެ އީދު މިވެގެން ދިޔައީ ތަފާތު އީދަކަށެވެ. ދުރާލާ ގިނަ ކަަންކަން ރޭވިގެން ކުރިއަށް ގެންދިޔަ ހަރަކާތްތައް މިރެއަށް ނިންމާލާއިރު ޔަގީނުންވެސް ކަމަދޫ މިވަނީ ރާއްޖޭގައި ވިދާލި ފިސާރި ކަނބަލުން ތިބި ރަށެއްގެ ގޮތުގައި މަޝްހޫރުވެގެން ގޮސްފައެވެ.
މިވަގުތުވެސް ކޯޑި ނެރުމުގެ ހަރަކާތްތައް ކުރިއަށްދާ ކަމަށާއި ކުޅިވަރުތައް ނިންމާލަނީ މިރޭގެ ސްޓޭޖް ޝޯވ އިން ކަމަށް ކަމަދޫ ކައުންސިލް ރައީސް ވިދާޅުވިއެވެ.
"ކަމަދޫގެ މި ކާމިޔާބީއަކީ ކަމަދޫގެ ހުރިހާ ރައްޔިތުންގެ އެކުވެރިކަމާއި އެއްބައިވަންތަކަމުގެ ހެއްކެއް، މިކަމަށް ކުދި ބޮޑު ހުރިހާ ރައްޔިތުން އެއްބާލުދުންދޭ، ކަމަދޫ ހުރިހާ ރައްޔިތުންނަށް އަޅުގަނޑު ޝުކުރު އަދާ ކުރަން، މިއީ ހުރިހާ މުވައްސަސާތަކާއި ކައުންސިލް މެންބަރު އަދި އީދު ކޮމިޓީގެ ވަރަށް ބުރަ މަސައްކަތެއް މީ،" ކަމަދޫ ކައުންސިލް ރައީސް، ހަސަން ޒަރީރު ވިދާޅުވިިއެވެ.
ކަމަދޫގެ އީދުހަރަކާތްތަކުގެ ތެރެއިން…..ފޮޓޯ: ނެނީ ފާތިހު
މިހާތަނަށް އައިިއިރު ކަމަދޫއަށް ޒިޔާރަތް ކުރި މީހުންގެ ފަރާތުން ލިބިގެން ދިޔަ ތަރުހީބާ އެއްވަރަށް ނުވަތަ އެއަށްވުރެވެސް ބޮޑަށް ސޯޝަލްމީޑިޔާއިން ކަމަދޫގެ އީދު ކުޅިވަރު ބަލަމުންދާ މީހުން ގިނައެވެ. މިފަހަރުގެ އީދަށް ކަމަދޫއަށް ނުދެވުނީމަ ދެރަވެ ކަރު އެލިފައި ތިބި ފަރާތްތައް ދެން އޮތް އެންމެ އަވަސް މުނާސަބާއެއްގައި އެރަށަށް ދިއުމަށް ދަތުރުހަދައި މިހާރުއްސުރެ އެތިބީ ތައްޔާރަށެވެ.
ކަމަދޫގެ އީދުހަރަކާތްތަކުގެ ތެރެއިން…..ފޮޓޯ: ނެނީ ފާތިހު
"ކުރިން ހީނުކުރަން މިރަށުގައި މިހާ ޗާލު ހަރަކާތްތަކެއް ގެންނަން އެނގޭ ފަންނާނުންތަކެއް ތިބިކަމަކަށް، މިރަށަށް އީދަށް އައީވެސް ފޫހިވެފައި ހުރެގެން، އެކަމަކު މިހާރު ހިތަށްއެބަ އަރާ މިއޭ އީދަށް އަންނަންވީ ރަށަކީ، މިރަށުގެ ޒުވާނުން ހާދަ މޮޅީއޭ، ފިރިހެނުންނެކޭ އެއްވަރަށް އަންހެންކުދިންގެ ހަރަކާތްތައްވެސް އެހާ ފުރިހަމަ، މިހާރު ދެން މި އިންތިޒާރު ކުރަނީ މިރޭގެ ޝޯވއަށް، ވަދާއީ ޝޯވ ވީމަަ،" ކަމަދޫއަށް އީދުދަތުރު ގޮސް ހުރި ޒުވާނަކު ކިޔައިދިނެވެ.
ކަމަދޫގެ އީދުހަރަކާތްތަކުގެ ތެރެއިން….ފޮޓޯ: ޝައްމޫނު
ކޮންމެއަކަސް 1445 އަޟުހާ އީދުގެ ކުޅިވަރުތަކުގެ ތެރެއިން ވެދުމާ ދިއުންފަދަ ސަގާފީ ކުޅިވަރުތަކާއި ބޮޑުބެރާއި، ކޯޑި ނެރުމާއި، ނެށުމުގެ ފަރި ހަރަކާތްތަކުން ކަމަދޫ އަންހެންކަނބަލުންގެ މޮޅެތި އަދާތަކުގެ ޖާދޫގައި ޖެހި ހިތްތައް ކަމަދޫއާ ދިމާލަށް ލަންބާލައިފިއެވެ.
މިހާރުދެން އެރަށަށް ވީހާވެސް އަވަސް ފުރުސަތެއްގައި ދެވޭނެ ގޮތެއް ވޭތޯ މިއުޅެނީ، ޗުއްޓީއަކަށް ނުދެެވެންޏާ އެރަށުގައި ދިރިއުޅެވޭނެ ގޮތެއް ހަދައިގެން ނަމަވެސް ކަމަދޫ އަށް ދާން ބޭނުންވެ، އެ އަޒުމު ކަނޑައެޅި މީހުންވެސް މަދެއްނޫނެވެ. އަދި މިހާރުވެސް އީދުގެ ފަހު ހަރަކާތްތަކަށް އެރަށަށް ދަތުރު ކުރި ކަމަށް މައުލޫމާތު ވަނީ ލިބިިފައެވެ. އެރަށުގައި އީދު ކުޅިވަރުތައް ބަލާލުމަށް ރަށުން ބޭރުން ގިނަ ބަޔަކު ވަނީ ޒިޔާރަތްކޮށްފައެވެ.
ކަމަދޫގެ އީދުހަރަކާތްތަކުގެ ތެރެއިން…..ފޮޓޯ: ޝައްމޫނު
ދެޖިންސުގެ ޒުވާނުންނާއި މެދުއުމުރުގެ މީހުންވެސް ބައިވެރިވެގެން ކުރިއަށް ގެންދިޔަ ކަމަދޫ ޢީދު ކުޅިވަރުތަކުގެ ހުރިހާ ޙަރަކާތްތަކެއްގައިވެސް އަންހެނުންގެ ބައިވެރިވުން އެއްވަނައަކަށް ފުރިހަމައެވެ. ކޮންމެއަކަސް މިރޭގެ ޝޯވ އަށް ކެތްމަދުވެފައި ތިބި ފަރާތްތަކަށް ހިތްފުރޭފަދަ އީދުޝޯވއަކަށް ވާނެ ކަމަށް ކަމަދޫގެ ޒުވާނުން ޔަގީންކުރެއެވެ. ކަމަދޫއަށް ދިޔައިރު ހުސްހިތަކާއެކު ދިޔަ ފަރާތްތަކުގެ ތެރެއިން ހިތުގައި އެރަށުގެ ލޯތްބާއި ހަނދާންތައް ފޮރުވައިގެން ބަޔަކު އަންނައިރު، ހިތް އެރަށަށް ދީފައި އަންނާނީ ކިތައް މީހުންކަމެއް ނޭނގެއެވެ. އެހެނީ މިއީދުގައި ރާއްޖޭގެ މީހުންނަށް ކަމަދޫގައި ފަތްމިނިން އުޅޭކަމުގެ ޔަގީންކަން ސާބިތުކޮށްދީފައި ވާތީއެވެ.