ރާއްޖެ އާއި އެމެރިކާގެ ގުޅުން ފުޅާކުރުމުގެ މުހިންމު މަޝްވަރާތަކަކަށް ފޮރިން މިނިސްޓަރު މޫސާ ޒަމީރު އެމެރިކާ އަށް ރޭ ފުރާވަޑައިގެންފި އެވެ.
ފޮރިން މިނިސްޓްރީން ބުނީ، އަންނަ ބުރާސްފަތި ދުވަހުގެ ނިޔަލަށް ޒަމީރު ކުރައްވާ ރަސްމީ ދަތުރުގައި އެމެރިކާގެ ސެކްރެޓަރީ އޮފް ސްޓޭޓް އެތަނީ ބްލިންކެންގެ އިތުރުން އެ ގައުމުގެ ސަރުކާރުގެ އިސް އޮފިޝަލުންނާ ބައްދަލު ކުރެއްވުމަށް ހަމަޖެހިފައިވާ ކަމަށެވެ.
އެމެރިކާ ސަރުކާރުގެ އެހީ ދޭ ޖަމިއްޔާ، ޔޫއެސް އެޖެންސީ ފޯ އިންޓަނޭޝަނަލް ޑިވެލޮޕްމަންޓް އެޑްމިނިސްޓްރޭޓަރު ސަމަންތާ ޕަވާސްއާ ވެސް ވޮޝިންގްޓަންގައި ބައްދަލު ކުރައްވާނެ ކަމަށް މިނިސްޓްރީން ބުންޏެވެ.
ވޮޝިންގްޓަންގެ ދަތުރުގެ ތެރެއިން، ފޮރިން މިނިސްޓްރީން ބުނި ގޮތުގައި ކައުންސިލް އޮފް ފޮރިން ރިލޭޝަންސްގެ މަޝްވަރާ ބައްދަލުވުމެއްގެ އިތުރުން، އެ ސިޓީގައި ދިރިއުޅޭ ދިވެހިންނާ ޒަމީރު ބައްދަލު ކުރައްވާނެ އެވެ.
ޒަމީރު ނިއު ޔޯކަށް ވަޑައިގެން އދ. ގެ ސެކްރެޓަރީ ޖެނެރަލް އެންޓޯނިއޯ ގުޓެރެސް އާއި އެ ޖަމިއްޔާގެ ބައެއް އިސް ވެރިންނާ ބައްދަލުކުރެއްވުމަށް ވަނީ ހަމަޖެހިފަ އެވެ.
ނިއު ޔޯކަށް ކުރައްވާ ދަތުރުގެ ތެރެއިން، ރާއްޖޭގެ ޓޫރިޒަމް ފުޅާކުރުމާ ގުޅޭގޮތުން އެ ސިޓީގެ އިސް ޓުއާ އޮޕަރޭޓަރުންނާއި ޓްރެވަލް އެޑްވައިޒަރުންނާ މިނިސްޓަރު ބައްދަލުކުރައްވާނެ ކަމަށް މިނިސްޓްރީން ބުންޏެވެ. ހަތަރު ދުވަހުގެ މި ދަތުރު ނިންމަވައިލެއްވުމުގެ ކުރިން ނިއު ޔޯކްގައި ދިރިއުޅޭ ދިވެހިންނާ ވެސް ޒަމީރު ބައްދަލު ކުރައްވާނެ އެވެ.
ރައީސް ޑރ. މުހައްމަދު މުއިއްޒު ވެރިކަމާ ހަވާލުވެވަޑައިގެންނެވި ފަހުން ރާއްޖެ އާއި އެމެރިކާ އާ އޮންނަ ގުޅުން ވަނީ ވަރަށް ބޮޑަށް ބަދަހިވެފަ އެވެ. މިދިޔަ ހަތް މަސް ދުވަހުގެ ތެރޭގައި އެމެރިކާ ސަރުކާރާއި ދިފާއީ ބާރުގެ އިސް ވެރިން ވަނީ ރާއްޖެ އަށް ޒިޔާރަތް ކުރައްވައިފަ އެވެ.
އޭގެ ތެރޭގައި، އެމެރިކާގެ އެސިސްޓެންޓް ސެކްރެޓަރީ އޮފް ސްޓޭޓް ފޮ ސައުތު އެންޑް ސެންޓްރަލް އޭޝިއަން އެފެއާޒް ޑޮނަލްޑް ލޫ އާއި ޑެޕިޔުޓީ ސްޓޭޓް ސެކްރެޓަރީ ރިޗަޑް ވަރްމާ ވެސް ހިމެނެ އެވެ.
އެ ދަތުރުތަކުގެ ތެރެއިން ރާއްޖޭގެ ކަނޑުގެ ސަރަހައްދު ބެލެހެއްޓުމަށް އުޅަނދުތަކެއް ހަދިޔާ ކުރުމުގެ އިތުރުން އެމެރިކާގެ ފެޑެރަލް ސަރުކާރުގެ ދަށުން ހިންގާ ޑިވެލޮޕްމަންޓް ފައިނޭންސް ކޯޕަރޭޝަނުން ރާއްޖޭގައި އިންވެސްޓު ކުރުމުގެ މަޝްވަރާތައް ދިވެހި ސަރުކާރާ އެކު ކުރަމުން އަންނަ ކަން ވަނީ ހާމަކުރައްވައިފަ އެވެ.