އެންމެ ފަހުގެ ޗެމްޕިއަން އިޓަލީން ވަނީ ރޭ 1-1 އިން ކްރޮއޭޝިއާއާ އެއްވަރުކޮށް، މި ފަހަރުގެ ޔޫރޯ ފުޓްބޯޅަ މުބާރާތުގެ ގަދަ 16 އިން ޖާގަ ހޯދައިފައެވެ.
ގްރޫޕް ސްޓޭޖުގެ ފަހު މެޗުގައި މި ދެ ޓީމު ބައްދަލުކުރި މެޗުގެ އެންމެ ފަހު މިނެޓާ ހަމަ އަށްދިޔަ އިރު ބަލިވެފައި އޮތް އިޓަލީން ކްރޮއޭޝިއާ ޓީމު ރޮއްވާލީ އިތުރު ވަގުތުގެ އަށް މިނެޓުގެ ތެރެއިން ފަހު މިނެޓުގެ ވެސް ފަހު ވަގުތުގައެވެ.
ގްރޫޕް ބީގެ އެއް ވަނަ ޓީމުގެ ގޮތުގައި ނޮކައުޓަށް ދިޔައީ ތިން މެޗުން މޮޅުވެ، ނުވަ ޕޮއިންޓް ހޯދި ސްޕެއިން އެވެ. އިޓަލީ ދެ ވަނަ ހޯދީ ތިން މެޗުން ހަތަރު ޕޮއިންޓާ އެކު އެވެ.
ކްރޮއޭޝިއާ އަށް ދެން ކުރިއަށްދިއުމުގެ ފުރުސަތެއް އޮންނާނީ އެންމެ ރަނގަޅު ނަތީޖާ ނެރޭ ތިން ވަނަ ޓީމުތަކުގެ ތެރޭގައި ހިމެނިގެންނެވެ. ތިން ވަނައިގައި ނިންމި ކްރޮއޭޝިއާ އަށް ދެ ޕޮއިންޓް ލިބިފައިވާއިރު، އެ ޓީމަށް ނޮކައުޓް ބުރުގެ ފުރުސަތު ލިބޭކަން އެނގޭނީ ގްރޫޕް ސްޓޭޖުގެ ކުޅުން ނިމޭއިރު، އެ ޓީމަށް އެންމެ ރަނގަޅު ނަތީޖާ ނެރުނު ތިން ވަނަ ޓީމުތަކުގެ ތެރެއިން ގަދަ ހަތަރެއްގައި ހިމެނޭނަމަ އެވެ. ޔޫރޯގެ ހަ ގްރޫޕްގެ ތިން ވަނަ ޓީމުތަކުގެ ރޭންކިންގެ ތެރެއިން ގަދަ ހަތަރަކަށް ވެސް ނޮކައުޓުން ފުރުސަތު ލިބޭނެ އެވެ.
މި ގްރޫޕްގެ ފުލަށް ދިޔަ އަލްބޭނިއާ އަށް ލިބުނީ އެންމެ ޕޮއިންޓެކެވެ.
ކްރޮއޭޝިއާ އަށް ނޮކައުޓަށް ދިއުމުގެ ފުރުސަތު ވަރަށް ބޮޑަށް ހަނިވެފައިވާއިރު އެ ޓީމަކީ ދުނިޔޭގެ ތައްޓަށް ކުޅޭ ފީފާ ވޯލްޑް ކަޕުގައި މިފަހަކަށް އައިސް ރަނގަޅު ނަތީޖާތަކެއް ނެރެފައިވާ ޓީމެކެވެ. 2018 ވަނަ އަހަރުގެ ވޯލްޑް ކަޕުގެ ފައިނަލުގައި ކުޅެ އަދި 2022 ވަނަ އަހަރުގެ ވޯލްޑް ކަޕުގެ ސެމީގައި ކްރޮއޭޝިއާ އިން ވާދަކުރިއިރު މި ފަހަރުގެ ޔޫރޯގައި ވެސް ރަނގަޅު ހިސާބަކަށް އެ ގައުމު ދާނެ ކަމަށް ގިނަ ބަޔަކު ގަބޫލުކުރިއެވެ. ނަމަވެސް މިހާ ހިސާބަށް ކަންދިމާވަމުން އަންނަނީ އެންމެން ހީކުރިގޮތާ ހިލާފަށެވެ. ކުޑަ ގައުމަކާ އަޅާ ބަލާއިރު ވޯލްޑް ކަޕުގައި އެ ގައުމުން ނެރެމުން އަންނަ ނަތީޖާތަައް ޔޫރޯގައި ނުދެއްކެ އެވެ. ގްރޫޕު ސްޓޭޖުގައި ތިން މެޗު ކުޅުނުއިރު މެޗަކުން މޮޅެއް ނުވެއެވެ.
ފްރާންސްގެ ތަރި ކީލިއަން އެމްބާއްޕޭ ވަނީ ދާދި ފަހުން ވޯލްޑް ކަޕަށްވުރެ ޔޫރޯގައި ކާމިޔާބީ ހޯދަން އުނދަގޫ ކަމަށް ބުނެފައެވެ. އެމްބާއްޕޭ އަކީ ވޯލްޑް ކަޕުގެ ފައިނަލުގައި ދެ ފަހަރު ކުޅެ، އެއް ފަަހަރު ތަށި ހޯދައި، މުޅިއެކު 12 ގޯލު މުބާރާތުގައި ޖަހާފައިވާ ކުޅުންތެރިއެކެވެ. ވޯލްޑް ކަޕުގައި އާދަޔާ ހިލާފަށް މޮޅަށް ކުޅޭ އެމްބާއްޕޭ އަށް ޔޫރޯގައި އަދި އެ ފެންވަރެއް ނުދެއްކެ އެވެ. ޔޫރޯގައި އެމްބާއްޕޭ އަށް އަދި ގޯލެއް ޖެހިފައިނުވާއިރު އޭނާ ބުނަނީ ވޯލްޑް ކަޕާ ހިލާފަށް ޔޫރޯގައި ވާދަކުރާ ހުރިހާ ޓީމަކީ ވެސް މޮޅެތި ވަރުގަދަ ޓީމުތައް ކަމަށާއި އެހެންކަމުން ޔޫރޯގައި ކުރިއަށް ދިއުމަށް ފަސޭހަ ނުވާ ކަމަށެވެ.
އެމްބާއްޕޭގެ މި ބަސްތަކާ ހެދި ގިނަ ބަޔަކު އޭނާ އަށް ފާޑުކިޔާފައިވާ ދަނޑިވަޅެއްގައި ކްރޮއޭޝިއާ ކަހަލަ ވޯލްޑް ކަޕުގައި ނަތީޖާ ނެރޭ ޓީމެއް ޔޫރޯގައި ފްލޮޕް ވަމުން ދާތީ ބައެއް މީހުން ދަނީ އެމްބާއްޕޭ ބުނި ވާހަކައިގައި ބުރަދަނެއް ހުރި ކަމަށް މިހާރު ބުނަމުންނެވެ. އެގޮތުން ހަގީގަތުގައިވެސް ވޯލްޑް ކަޕަށްވުރެ ޔޫރޯގައި ކުރިއަށް ދިއުމަށް އުނދަގޫ ކަމަށާއި، ވޯލްޑް ކަޕުގައި އޭޝިއާ އަދި އެފްރިކާގެ ގައުމުތައް ކުޅޭތީ އެ މުބާރާތުގެ ފެންވަރު ޔޫރޯ އަށްވުރެ ދަށް ކަމަށް ބުނެ ގިނަ ބަޔަކު ދަނީ ސޯޝަލް މީޑިއާގައި ހިޔާލު ފާޅުކުރަމުންނެވެ.
ކޮންމެއަކަށް އެމްބާއްޕޭގެ ބަހާ އެއްބަސްވާ މީހުންނާ ދެބަސްވާ މީހުން އެބަތިއްބެވެ. ވޯލްޑް ކަޕުގައި އޭޝިއާ އަދި އެފްރިކާ ޓީމުތަކުން ޔޫރަޕުގެ ގަދަ ބާރުތައް ސައިޒު ކޮށްފައިވެސް އެބަހުއްޓެވެ. މި ބަހުސަށް ދެކޮޅަށް ވެސް ވާހަކަ ދެއްކެން އެބަހުއްޓެވެ.