ހުޅުމާލެއިން ދޫކޮށްފައިވާ ގޯތިތަކުގައި އިމާރާތް ކުރަން ފެށުމުގެ ކުރިން ހައުސިން ޑިވިލޮޕްމެންޓް ކޯޕަރޭޝަން (އެޗްޑީސީ)ގެ ހުއްދަ ހޯދަން އެކޯޕަރޭޝަނުން އެދިއްޖެއެވެ.
އެޗްޑިސީން ނެރުނު ބަޔާނެއްގައިބުނީ މިހާރަކަށް އައިސް ހުޅުމާލެއިން ވިއްކާފައިވާ ނުވަތަ ކުއްޔަށް ދޫކޮށްފައިވާ ބިންތައް ބޭނުން ކުރުމުގައި ހުއްދަނުނަގާ ގޯތިތަކުގެ މަސައްކަތް ކުރަމުންދާ ކަންފހަގަކުރެވެމުންދާ ކަމަށެވެ. އަދި ކުށްޔަށްދީފައިވާ ނުވަތަ އިޖްތިމާއީ ބޯހިޔާވަހިކަމުގެ ތެރެއިން ދޫކޮށްފައިވާ ގޯއްޗެއްގައި އިމާރާތްކުރާއިރު އެކޯޕަރޭޝަނުން ހަދާފައިވާ ގަވާއިދުތަކާއި އުސޫލުތަކަށް ބެލުމެއްނެތި އަމަލުކުރަމުންދާކަންވެސް ފާހަގަކުރެވިފައިވާ ކަމަށް ބުނެފައިވެއެވެ.
މިކަންކަން ތަކުރާރު ވަމުންދާ ކަމަށާއި، ގޯތިތަކުގެ ވެރިފަރާތުން މިކަންކަން ހުއްޓާލުމަށްވެސް ވަނީ އިލްތިމާސް ކޮށްފައެވެ. އެގޮތުން މީގެ ފަހުން ހުޅުމާލެއިން ދޫކޮށްފައިވާ ގޯތިތައް އިމާރާތެއް ހަދަންފެށުމުގެ ކުރިން އިމާރާތް ކުރާނެ ގޮތުގެ ކުރެހުމެއް ވެސް އެކޯޕަރޭޝަނަށް ހުށައަޅަންޖެހޭ ކަމަށް ވަނީ ބުނެފައެވެ. އަދި އިމާރާތްކުރުމާއި ގުޅޭ އެހެނިހެން ހުއްދަތައް ވެސް ނަގަން ޖެހޭނެ ކަމަށް އެކޯޕަރޭޝަނުން ބުނެއެވެ.
މިހެން މިކަން އޮއްވާ އެއްވެސް ފަރާތަކުން އެ ކޯޕަރޭޝަނުން އަންގާފައިވާ ގޮތަށް އަމަލުނުކޮށް ކުރިއަށްގޮސްފިނަމަ އެކަމުގައި ފިޔަވަޅު އަޅާނެ ކަމަށާއި، ކަނޑައެޅިފައިވާ އުސޫލުގެ ތެރެއިން އަމަލުކުރުމުމަށް ވެސް ވަނީ އަންގާފައެވެ.