މާލޭގައި ގަވާއިދާ ހިލާފަށް މަސައްކަތްކުރާ ބިދޭސީން އަތުލައިގަންނަން ފުލުހުންނާއި އިމިގްރޭޝަނުން ފަށާފައިވާ އޮޕަރޭޝަނުގައި ލޯކަލް މާރުކޭޓުގެ ގޮޅިތަކަކުން ރޭ ވެސް ބިދޭސީންތަކެއް އަތުލައިގެންފި އެވެ.
މިދިޔަ މަހުގެ 29ގައި ފުޅާކޮށް ހިންގަން ފެށި އޮޕަރޭޝަނުގައި މިހާތަނަށް ގިނަ ބަޔަކު ވަނީ ހައްޔަރުކޮށްފަ އެވެ.
މި އޮޕަރޭޝަނުގައި މަޖީދީ މަގު، ވިލާ މާޓް ކައިރީގައި ހިންގާ މާރުކޭޓާއި އަމީނީ މަގު، މާރުކޭޓުގައި ތިބި ހުރިހާ ބިދޭސީން މިދިޔަ ހަފުތާގައި އިމިގްރޭޝަންގެ ބެލުމުގެ ދަށަށް ގެންދިޔަ އެވެ. ހިންގާނެ ބަޔަކު ނެތިގެން ހަމަ އެ ރޭ ދެ މާރުކޭޓުގެ ގޮޅިތައް ވެސް ބަންދުކުރަން ޖެހުނެވެ.
އިމިގްރޭޝަނާއި ފުލުހުންނާއި ގުޅިގެން ހިންގަމުންދާ އޮޕަރޭޝަންތަކުގައި ބިދޭސީންތަކެއް ހައްޔަރަށް ގެންދަނީ/ފޮޓޯ: އިމިގްރޭޝަން
އިމިގްރޭޝަނުން ބުނީ ގަވާއިދާ ހިލާފަށް ބިދޭސީން ހިންގަމުންދާ ކުދި އަދި މެދުފަންތީގެ ވިޔަފާރިތަކަށް ހާއްސަކޮށް ކުރިއަށްގެންދާ ރެއިޑް އޮޕަރޭޝަންތަކުގެ ތެރެއިން ރޭ (07 ޖުލައި 2024) ގައި ވަނީ މާލެ ސަރަހައްދުގައި ހިންގަމުންދާ ދެ މާރުކޭޓެއް ބަލައި ފާސްކޮށްފައިވާ ކަމަށެވެ.
އަދި އެ އޮޕަރޭޝަންގައި 04 ބިދޭސީ ފިރިހެނަކާއި 02 ބިދޭސީ އަންހެނަކު ވަނީ އިމިގްރޭޝަންގެ ބެލުމުގެ ދަށަށް ގެނެވިފައިވާ ކަމަށާއި، އޮޕަރޭޝަންތައް ކުރިއަށް އޮތްތަނުގައި ވެސް ހުއްޓުމެއްނެތި ކުރިއަށް ގެންދިއުމަށް ވަނީ ހަމަޖެހިފައިވާ ކަމަށެވެ.
ހޯމް މިނިސްޓަރު އަލީ އިހުސާން ވިދާޅުވީ ގަވާއިދާ ހިލާފަށް ވިޔަފާރިކުރާ ބިދޭސީން ހޯދަން ފެށި އޮޕަރޭޝަނާ އެކު، ރާއްޖޭގެ ގާނޫނުތައް ނެގެހެއްޓުމަކީ ޗޮއިސްއެއްގެ ގޮތަށް އޮތް އޮތުން ނިމުމަކަށް އައީ ކަމަށެވެ.
އިމިގްރޭޝަނާއި ފުލުހުންނާއި ގުޅިގެން ހިންގަމުންދާ އޮޕަރޭޝަންތަކުގައި ބިދޭސީންތަކެއް ހައްޔަރަށް ގެންދަނީ/ފޮޓޯ: އިމިގްރޭޝަން
ރާއްޖޭގައި ގަވާއިދާ ހިލާފަށް ވިޔަފާރިކުރާ ބިދޭސީން ހުއްޓުވައި ފިޔަވަޅު އަޅަން ހިންގާ އޮޕަރޭޝަނުގައި، މާލެ ތެރޭގައި ހިންގާ މާރުކޭޓުތަކުން އެކަނި މިހާތަނަށް 50 މީހަކު އިމިގްރޭޝަންގެ ބެލުމުގެ ދަށަށް ވަނީ ގެންގޮސްފަ އެވެ. އެ މީހުން ރާއްޖެ އިން ޑީޕޯޓްކުރަން، އިދާރީ މަސައްކަތްތައް ނިމެންދެން އަދިވެސް ތިބީ އިމިގްރޭޝަންގެ ބެލުމުގެ ދަށުގަ އެވެ.