އައްޑޫ ސިޓީ އަށް ދާއިމީ ގޮތެއްގައި ޕެރިޝަބުލް ކާގޯ ގެންދެވޭނެ ގޮތް ހަމަ ޖެއްސާ އިއްޔެ އެކަނިވެސް 150 ޓަނުގެ ތަރުކާރީ އާއި މޭވާ ގެންގޮސްފިއެވެ.
އައްޑޫ ސިޓީ ގެ ރައްޔިތުންނަށް ބޭނުންވާ ޕެރިޝަބުލް ކާގޯ ދާއިމީ ގޮތެއްގައި ގެންދެވޭނެ ގޮތް ހަމަ ޖެއްސުމަށް، އެމްޕީއެލް އާއި ހިތަދޫ ރީޖެނަލް ޕޯޓުން ކުރި މަސައްކަތް ވަނީ ކާމިޔާބުވެފައެވެ.
އެ ޚިދުމަތް ދިނުމަށް ހަމަޖެހިފައި ވަނީ، ރާއްޖޭ އަށް އެންމެ ގިނައިން ޕެރިޝަބުލް ކާގޯ ގެންނަ އިންޑިޔާގެ ފައިނެސް ގުރޫޕް މެދުވެރި ކޮށެވެ.
މީގެ ކުރިން އެ ޚިދުމަތް ދެވެމުން އަންނަނީ ލަކުޑި ބޯޓު ފަހަރުން ކަމަށް ވާތީ، ޚިދުމަތް ދެވެނީ، އަހަރު ތެރޭގައި ވަކި ދުވަސް ތަކެއް ގައެވެ. އެހެން ކަމުން އަހަރު ތެރޭ ގިނަ ދުވަސްތަކެއް ގައި، އެ ސިޓީ އަށް ބޭނުންވާ، މި މުދާ ގެންނަން ޖެހެނީ މާލެ އިންނެވެ.
1 ޖުލައި ން ފެށިގެން އެ ޚިދުމަތް ދެވޭނީ ދަގަނޑު ބޯޓު ފަހަރުން ކަމަށްވާތީ، މުޅި އަހަރު ތެރޭ ހުރިހާ ދުވަސް ތަކެއްގައިވެސް މެދު ކެޑުމެއްނެތި، އެ ޚިދުމަތް ލިބެމުން ދާނެ ކަމަށް މޯލްޑިވްސް ޕޯޓްސް ލިމިޓެޑް (އެމްޕީއެލް)ގެ ސީއީއޯ މުހަމަދު ވަޖީހު ވަނީ މީގެ ކުރިން ވިދާޅުވެފައެވެ.
“އާއްމު ގޮތެއްގައި މި ބޯޓު ފަހަރުން ގެންދާނީ، ބިސް، ފިޔާ، އަލުވި، ތަރުކާރީ ގެ އެހެން ބާވަތް ތަކާއި، މޭވާގެ ބާވަތްތައް. މީގެ އިތުރުން އައްޑޫ ސިޓީ ގެ ރައްޔިތުން، އިންޑިއާ އިން ގެންދަން ބޭނުން ވާ، ކާބޯތަކެތީގެ އެހެނިހެން ބާވަތްތަކާއި، ޖެނެރަލް ކާގޯ ގެ ބާވަތްތައް ހިމެނޭނެ.” ވަޖީހު
ދަތުރުތައް ރާ ވަމުން ދަނީ ކޮންމެ 10 ދުވަހަކާ، 15 ދުވަހާ ދޭތެރޭ ކާގޯ ބޯޓެއް އައްޑޫ ސިޓީ އަށް ދާ ގޮތަށް ކަމަށްވެސް ވަޖީހު ވިދާޅުވިއެވެ.
އައްޑޫ އަށް ދާއިމީ ގޮތެއްގައި ޕެރިޝަބުލް ކާގޯ ގެންދެވޭނެ ގޮތް ހަމަ ޖެހިގެން ދިއުމުން އެމްޕީއެލްއިން ފާހަގަކޮށްފައިވަނީ މުދާގެންދަން ފެށުމުން އަމާޒަކީ އަވަސް ހިދުމަތެއް ވިޔަފާރިވެރިންނަށް ފޯރުކޮށް ދިނުން ކަމަށެވެ.