ނމިގެންދިޔަ އަޟުހާ އީދުގައި ކަމަދޫގެ ސަގާފީ ކުޅިވަރުތަކަށް ލިބުނު ސަމާލުކަން ފާހަގަކޮށް މަޝްހޫރު ވިޔަފާރިވެރިޔާ ޗަމްޕާ މުޙައްމަދު މޫސާ (އުއްޗު) ގެ ފަރާތުން ހާއްސަ ހަފްލާއެއް އޭނާގެ ރިސޯޓު، ކުރެއްދޫ ރިސޯޓުގައެވެ.
މި ހަފްލާގައި ވަނީ ކަމަދޫގައި ސަގާފީ ނެށުންތައް ގެނެސްދިނުމުގައި ހަރަކާތްތެރިވި ފަންނާނުން ބައިވެރިވެފައެވެ. މި ހަފުލާގައި އެ ގުރޫޕްގެ ފަރާތުން ނެށުންތަކެއް ވެސް ވަނީ ހުށަހަޅައިދީފައެވެ.
ލޯކަލް ގަވަރނަންސް މިނިސްޓަރު އާދަމް ޝަރީފް ޢުމަރު ބައިވެވަޑައިގެންނެވި މި ހަފްލާއާއި ގުޅުވައި އުއްޗުގެ ފަރާތުން ވަނީ ކަމަދޫ “ފަތްމިނި” ގުރޫޕަށް ހާއްސަކޮށް ލަވައެއް ވެސް ތައްޔާރު ކޮށްފައެވެ.
މިދިޔަ ބޮޑު އީދަކީ ސަރުކާރުން ވެސް ގައުމީ ފެންވަރުގައި އެކި ރަށްރަށުގައި އީދު ފާހަގަކުރި ފަހަރެކެވެ. ނަމަވެސް، އެންމެ ބޮޑު ސަމާލުކަމެއް އީދުގައި ހޯދީ ބ. ކަމަދޫގެ އީދު ކުޅިވަރުތަކެވެ.
“އަޅުގަނޑުމެން މި އިވެންޓަށް ދިޔައީ މިއީ ކަމަދޫއަށް ހާއްސަވި އިވެންޓަކަށް ވުމުން، ރަށުން ބޭރުގައި ނެށުން ޕްރޮފެޝަނަކަށް ހަދައިގެން އެގޮތަކަށް ނޫން،” ކަމަދޫ އިން މި އިވެންޓަށް ދިޔަ ފަރާތްތަކުގެ ތެރެއިން ބައެެއް ފަރާތްތަކުން ދީފައިވާ މި ޖަވާބުންވެސް މިއީ ރަށްދެކެ ލޯބިވާ ދަރިންތަކެއް ކަން ދޭހަވެއެވެ.
ކަމަދޫގެ ޖިންސުއްލަތީފުންނާ މެދު ކުށްހީ ކުރެވޭ ފަރާތްތަކަށްވެސް މިއީ ސީދާ ސާފު ޖަވާބެކެވެ. ކުރިންވެސް ކަމަދޫގެ ޒުވާން ޖިންސުއްލަތީފުން ސާފުކޮށް ބުނެ ހާމަކޮށްފައިވާ ވާހަކައަކަށް ވިޔަސް ހިކިހުއިތަކެއްގައި ހުޅުހިފާ އަލިފާންގަނޑެއް ފެތުރިގެންދާހެން ކަމަދޫގެ ޒުވާން އަންހެނުން ކަމެއް ކޮށްފިނަމަ އެކަމެއްގެ ވާހަކަ ސޯޝަލްމީޑިޔާގަައި ރަނގަޅުނޫން ގޮތްގޮތަށް ލިޔާ މަންޒަރު ވަރަށް ގިނައިން ފެނެއެވެ. އެހެންނަމަވެސް ކަމަދޫގެ އަންހެންޖިންސުއްލަތީފުން ބޭނުންވަނީ ރަށުގެ ކޮންމެ ކަމެއްގައިވެސް އިސްވެ ހަރަކާތްތެރިވެ ކަންކަމުގައި ކުރިއަށް ނުކުމެ ރަށުގެ ތަރައްގީއަށް އެހީވުމަށެވެ.