ހއ. މާރަންދޫގައި ކުޅުނު ފުޓުބޯޅަ މެޗެެއްގެ ތެރެއިން ހާލު ސީރިއަސްވެގެން، އެ ރަށު ކައުންސިލްގެ ނައިބު ރައީސް އަހުމަދު ރަމީޒު އަވަހާރަވެއްޖެ އެވެ.
އިއްޔެ ހަވީރު މާރަންދޫ އާއި ހދ. ނެއްލައިދޫ ޒުވާނުންގެ މެދުގައި ކުޅުނު އެކުވެރިކަމުގެ ފުޓުބޯޅަ މެޗެއްގެ ފަހު ހާފުގައި ކުޅުއްވަން ހުންނެވި ރަމީޒު މެޗުގެ ހިސާބަކުން ދަނޑުން ފައިބާވަޑައިގެންނެވީ މާބޮޑަށް ވަރުބަލިވާތީއެވެ. ދަނޑުން ފައިބާ ވަޑައިގެން ރަމީޒު އިންނެވީ ބެންޗުގައެވެ.
ރަމީޒު ބެންޗުގައި އިންނެވި އިރުވެސް ހާލު ރަނގަޅު ނޫންކަމަށާއި ހޮނޑުލެއްވި ކަމަށްވެސް އެރަށުން ވަނީ މައުލޫމާތު ލިބިފައެވެ. އަދި މާބޮޑަށް ހާލު ސީރިއަސް ވެގެން ރަށުގެ ސިއްހީ މަރުކަޒަށް ގެންދިޔައީ ކަމަށްވެއެވެ.
ހާލު މާބޮޑަށް ގޯސްވެގެން ހޮސްޕިޓަލަށް ގެންގޮސް ފަރުވާދޭން ފަށާފައިވާ ކަމަށާއި، ރަމީޒު އަވަހާރަވީ ދިއްދޫ ހޮސްޕިޓަލަށް ގެންގޮސް، ފަރުވާދެމުން ދަނިކޮށް ރޭގެ ވަގުތެއްގައި ކަމަށް ވެއެވެ.
އުމުރުފުޅުން ގާތްގަނޑަކަށް ސާޅީސް އަހަރުފުޅުގެ ރަމީޒު އަވަހާރަވި އިރު އަނބިކަނބަލަކާއި ތިން ކުދިން ދުނިޔޭގައި އެބަތިއްބެވިއެވެ.