ކ. ގުރައިދޫގައި ހުންނަ ޚާއްސަ އެހީއަށް ބޭނުންވާ މީހުންގެ މަޒުކަޒުގައި ފަރުވާ ހޯދަމުން އަންނަ ފަރާތްތައް، މަރުކަޒުން ބޭރަށް ނެރެ، އުފާވެރި ވަގުތުކޮޅެއް ހޭދަކޮށްލުމަށް މަރުކަޒުގެ ފަރާތުން ޕިކްނިކް ދަތުރެއް ކުރިއަށް ގެންގޮސްފިއެވެ.
އެ ޕިކްނިކުގައި މަރުކަޒުން ފަރުވާ ހޯދަމުންދާ 11 އަންހެނުންނާއި، 12 ފިރިހެނުންނާއެކު ޖުމްލަ 23 މީހުން ވަނީ ބައިވެރިވެފަ އެވެ. އެ ދަތުރުގައި އެ ފަރާތްތަކާއެކު ކެއާ ވޯކަރުންނާއި މަރުކަޒުގެ މުވައްޒަފުން ވެސް ބައިވެރިވެފައިވެއެވެ.
ގުރައިދޫގައި ގާއިމްކުރެވިފައިވާ ޚާއްސަ އެހީއަށް ބޭނުންވާ ފަރާތްތަކުގެ މަރުކަޒުން އެފަދަ ހަރަކާތްތައް ހިންގުމުގެ އެންމެ ބޮޑު ބޭނުމަކީ، މަރުކަޒުން ފަރުވާ ފުރިހަމަ ކުރުމަށްފަހު އަނބުރާ މުޖުތަމައަށް ނިކުތުމަށް ބާރުއެޅުމާއި، މުޖުތަމައުގައި އުޅޭނެ ގޮތްތައް ދަސްކޮށްދިނުމުގެ އިތުރުން އުފާވެރި ވަގުތުކޮޅެއް މަރުކަޒުން ބޭރުގައި ހޭދަކޮށްލުމުގެ ފުރުސަތު ފަހިކޮށްދިނުމެވެ.
މަރުކަޒުން ކުރިއަށްގެންދިޔަ އެ ދަތުރުގައި ސަގާފީ ކެއުމާއި، ކުޅިވަރުގެ ގިނަ ހަރަކާތްތައް، އޭގެތެރޭގައި ވޮލީބޯޅަ، ފުޓްބޯޅަ، ލަވަކިޔުމުގައި މަޖާ ހަރަކާތްތަކެއް ވަނީ ކުރިއަށް ގެންގޮސްފަ އެވެ. އޭގެ އިތުރުން ދޯނި ދުއްވުމާއި، މަންތާ ބަލާލުން ވެސް ކުރިއަށް ގެންގޮސްފައިވެއެވެ.