ދިވެހިން ފަހުރުވެރިވާނެ ވަރުގެ ފުރިހަމަ ސްޓޭޑިއަމެއް ރާއްޖޭގައި އަޅުއްވާނެކަމަށް ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު ވިދާޅުވެއްޖެއެވެ.
ވަޒީރު މިހެން ވިދާޅުވީ ޕީއެސްއެމްގެ ޕްރޮގްރާމެއްގައި ވާހަކަފުޅު ދައްކަވަމުންނެވެ.
މިނިސްޓަރ ވިދާޅުވީ ރަނގަޅު ފެންވަރުގެ ސްޓޭޑިއަމެއް ރާއްޖޭގައި އޮންނަންޖެހޭ ކަމަށާޢި، ކުރިންވެސް ހުޅުމާލޭގައި ސްޓޭޑިއަމެއް އަޅަން ބިމެއް ކަނޑައަޅާފައި އޮތްކަމަށެވެ. އަދި މި ސަރުކާރުން ހަވާލުވިއިރު އެ ބިން އޮތީ ކޮންސްޓްރަކްޝަން މިނިސްޓްރީގެ ބެލުމުގެ ދަށުގައި ކަމަށެވެ. އެހެންނަމަވެސް މިހާރު އެބިން އެމިނިސްޓްރީ އާއި ހަވާލުކޮށްފައިވާ ކަމަށް މިނިސްޓަރު ރާފިއު ވިދާޅުވިއެވެ.
“ކުރެހުން އެބަހުރި ކުރަހާފަވެސް ޑިޒައިންތަކާ އެއްޗެހިވެސް، ފައިސާ ލިބޭނެ ގޮތެއްގެ މަސައްކަތް މިހާރު އަޅުގަނޑުމެންނަށް ކުރެވެމުން މިދަނީ، ވީހާ އަވަހަކަށް އަޅުގަނޑުމެން މަސައްކަތް ފަށާނަން.”
ނިމިދިޔަ ސަރުކާރުން މާލޭގެ ރަސްމީ ފުޓްބޯޅަ ދަނޑުގައި މުޅިން އާ ސްޓޭޑިއަމެއް ތަރައްގީކުރުމަށް ކުރެހުންތައް ހަދައި ސޯޝަލް މީޑިއާގައި ވައިރަލްވެސް ކުރިއެވެ. އެހެން ނަމަވެސް ވެރިކަން ނިމުނު އިރުއިރުވެސް މަސައްކަތް ފެށިފައެއްނުވެއެވެ.
މިނިސްޓަރ ރާފިއު ވަޒީރުކަމާއި ކަމާއި ހަވާލުވިފަހުން ރާއްޖޭގައި ކުޅިވަރު ތަރައްގީ ކުރުމަށް ގިނަމަސައްކަތް ތަކެއް ކުރައްވަމުންގެންދަވައެވެ. ރާއްޖޭގެ ކުޅިވަރު ދަނޑުތައް އަމިއްލައަށް ގާތުން ބަލައި ރަނގަޅު ކުރަންޖެހޭކަންކަން މިހާރުވެސް ދަނީ ކުރައްވަމުންނެވެ.