ކަރަންޓު ބިލުތައް ބޮޑުވާން ފެށީ ނިމިދިޔަ ފަސް އަހަރުގެ ތެރޭގައި ކަމަށާއި ބިލުތައް ބޮޑުވާން ފަށާފައި ވަނީ ޑިޖިޓަލް މީޓަރުތަކަށް ބަދަލުކުރި ފަހުން ކަމަށް ފޭދޫ ދެކުނު ދާއިރާގެ މެންބަރު އިބްރާހިމް ދީދީ (އައިބީ) ވިދާޅުވެއްޖެއެވެ.
ރައްޔިތުންގެ މަޖިލީހުގެ މިއަދުގެ ޖަލްސާއަށް ގަލޮޅު އުތުރު ދާއިރާގެ މެންބަރު މުހައްމަދު އިބްރާހިމް ހުށަހެޅުއްވި ކުއްލި މައްސަލައަށް ބަހުސް ކުރައްވަމުން އިބްރާހިމް ދީދީ ވިދާޅުވީ، މިދިޔަ ފަސްއަހަރު ތެރޭގައި ޑިޖިޓަލް މީޓަރުތައް ތައާރަފް ކުރިފަހުން ކަރަންޓު ބިލްތައް އަންނަނީ ބޮޑުވަމުން ކަމަށާއި އޭރުވެސް ރައްޔިތުން ދިޔައީ ކެނޑިނޭޅި އެކަމާ ކަންބޮޑުވުން ފާޅުކުރަމުން ކަމަށެވެ.
“މިދިޔަ ސަރުކާރުގައި އެކަން ކުރަން ފެށީމާ ރައްޔިތުން ނުކުމެ ހަޅޭއް ވެސް ލި، އެކަމަކު އެ މީޓަރު އޭރުގެ ފެނަކައިން ބުނަނީ މައްސަލައެއް ނެތޭ. މިދިޔަ ފަސް އަހަރުތެރޭގައި ހަމަ މި ކަރަންޓަށް މި ބަދަލު އައިސްސި، ހަމަ މީހުން މަގުމައްޗަށް ނުކުމެ މުޒާހަރާ ވެސް ކުރި.” އިބްރާހިމް ދީދީ ވިދާޅުވިއެވެ.
އިބްރާހިމް ދީދީ ވިދާޅުވި، ގޮތުގައި އޭރުގެ ސަރުކާރުން ވެސް ބުނަމުން ދިޔައީ ހޫނުގަދަވުމުން ކަރަންޓު ބިލްތައް ބޮޑުވަނީ ކަމަށެވެ.
ނަމަވެސް ރައްޔިތުން ކަންބޮޑުވުން ފާޅުކުރަމުން ދަންޏާ އެކަން ހިނގަމުންދާ ގޮތް ސަރުކާރުން ބަލަން ޖެހޭ ކަމަށާއި ކުރީ ސަރުކާރުން އެކަން ހައްލުކުރުމަށް އެއްވެސް ފިޔަވަޅެއް އަޅާފައިނުވާ ކަމަށް އިބްރާހިމް ދީދީ ވިދާޅުވިއެވެ.