ބަންގްލަދޭޝްގައި ކުރަމުންދާ މުޒާހަރާގައި ހަމަނުޖެހުން ބޮޑުވެ ކާފިއު އިއުލާންކޮށް، ސިފައިން މަގުތަކަށް ނުކުމެއްޖެ އެވެ.
ބަންގްލަދޭޝްގެ ބޮޑުވަޒީރު ޝެއިހް ހަސީނާގެ ޕްރެސް ސެކްރެޓަރީއާ ހަވާލާދީ ބީބީސީ ބަންގްލާ އިން ބުނީ ބަންގްލަދޭޝް ސަރުކާރުން މުޅި ގައުމުގައި ކާފިއު އިއުލާނުކޮށް އަސްކަރިއްޔާ އިން މަގުތަކަށް ނުކުންނަން ނިންމާފައިވާ ކަމަށެވެ.
ބޮޑުވަޒީރުގެ ޕްރެސް ސެކްރެޓަރީ ނައީމުލް އިސްލާމް ހާން ވިދާޅުވީ ކާފިއުއާ ގުޅޭ ރަސްމީ ނިންމުމެއް ވަރަށް އަވަހަށް ނެރޭނެ ކަމަށެވެ.
ބަންގްލަދޭޝްގައި ޓެލެކޮމިއުނިކޭޝަނަށް ބުރޫ އަރައި، ޓީވީ ޗެނަލްތައް ވެސް ވަނީ ހުއްޓާލައިފަ އެވެ. ހަމަނުޖެހުންތައް ކޮންޓްރޯލް ކުރުމަށް ކަމާބެހޭ ފަރާތްތަކުން ވަނީ އޭގެ ކުރީ ދުވަހު މޯބައިލް ފޯނުގެ ބައެއް ހިދުމަތް ކަނޑާލާފަ އެވެ.
ބެންގާލީ ނޫހެއް ކަމަށްވާ ޕްރޮތޯމް އަލޯ އިން ރިޕޯޓްކޮށްފައިވާ ގޮތުގައި މުޒާހަރާގެ ބައިވެރިން މަގުތައް ބަންދުކޮށް ސަލާމަތީ އޮފިޝަލުންނާ ދިމާލަށް ގާ އުކަމުން ދިއުމާ ގުޅިގެން މުޅި ގައުމުގައި ރޭލު ދަތުރުތައް މެދުކަނޑާލާފައިވާ ކަމަށެވެ.
މިދިޔަ ބުރާސްފަތި ދުވަހުން ފެށިގެން ބަންގްލަދޭޝްގެ 64 ޑިސްޓްރިކްޓްގެ ތެރެއިން 47 ޑިސްޓްރިކްޓެއްގައި ހިނގަމުންދާ ހަމަނުޖެހުންތަކުގައި 27 މީހުން މަރުވެ، 1500 މީހުން ޒަހަމްވެފައި ވާކަމަށް ރިޕޯޓްތައް ބުނެ އެވެ.