މައްޗަންގޮޅި މެދު ދާއިރާގެ ކައުންސިލަރު ހޮވުމަށް މާލެ ސިޓީ ކައުންސިލްގެ ލޯކަލް ކައުންސިލްގެ ބައި އިލެކްޝަންގައި ރައީސުލްޖުމްހޫރިއްޔާގެ އަނބިކަނބަލުން، ފަސްޓްލޭޑީ މެޑަމް ސާޖިދާ ވޯޓުލައްވައިފިއެވެ.
މެޑަމް ސާޖިދާގެ ދާއިރާގެ ވޯޓު ލާ މަރުކަޒުގައި ވޯޓުލުން ކުރިއަށް ގެންގޮސްފައި ވަނީ ޖަމާލުއްދީން ސްކޫލްގައެވެ.
މިއަދު ކުރިއަށް ދާ މާލެ ސިޓީ ކައުންސިލާއެކު އިތުރު ތިން ރަށެއްގެ ކައުންސިލްގެ ހުސްވެފައިވާ މެމްބަރުކަމަށް އިންތިހާބުކުރުމަށްޓަކައި ބާއްވާ ބައި އިލެކްޝަންގެ ވޯޓުލުން ފެށީ ހެނދުނު 8 ގައެވެ. ވޯޓުލުން ނިންމާލާނީ ހަވީރު 4 ގަ އެވެ.
މެޑަމް ސާޖިދާ ބައިއިލެކްޝަންގައި ވޯޓުލައްވަނީ،….ފޮޓޯ: ރައީސްއޮފީސް އެކްސް
މާލޭ ސިޓީ ކައުންސިލްގެ ހުސްވެފައިވާ ދާއިރާތަކަށް ކުރިމަތިލާފައިވާ ކެންޑިޑޭޓުންނަކީ:
- ހެންވޭރު ހުޅަނގު ދާއިރާ: ޕީއެންސީގެ ފަރާތުން ފާތިމަތު ޝައުފާ ސަލީމް، އެމްޑީޕީގެ ފަރާތުން މުހައްމަދު އަލީ ޖިނާދު
- މައްޗަންގޮޅި މެދު ދާއިރާ: ޕީއެންސީގެ ފަރާތުން ފާތިމަތު އިޝާން އަލީ، އެމްޑީޕީގެ ފަރާތުން ހައްވާ ޝިފާނާ
- ހުޅުމާލެ ދާއިރާ: ޕީއެންސީގެ ފަރާތުން އަލީ އައިމަން، އެމްޑީޕީގެ ފަރާތުން އަހުމަދު ރަޝީދު (ތުތީ)
އެ ކައުންސިލްގެ މަގާމުތައް ހުސްވީ، އެ ދާއިރާތަކުގައި ތިއްބެވި މެމްބަރުން މިދިޔަ މަޖިލީސް އިންތިހާބުގައި ވާދަކޮށް ގޮނޑި ކާމިޔާބު ކުރެއްވުމުންނެވެ. މާލެ ސިޓީ ކައުންސިލްގެ ބައި އިލެކްޝަންގެ އިތުރުން ތިން ރަށެއްގެ ކައުންސިލަށް ވެސް މެމްބަރުން އިންތިހާބުކުރުމަށްޓަކައި މިއަދު ބައި އިލެކްޝަން ކުރިއަށްއެބަދެ އެވެ. އެއީ ހދ. ކުޅުދުއްފުށީ ކައުންސިލާއި، ރަސްމާދޫ ކައުންސިލްގެ އަންހެން މެމްބަރުގެ އިތުރުން ފ. ބިލެތްދޫ ކައުންސިލަށް ރައީސެއް ހޮވުމަށްބާއްވާ ބައި އިލެކްޝަންތަކެކެވެ.
ހދ. ކުޅުދުއްފުށީ، ރަސްމާދޫ، އަދި ފ. ބިލެތްދޫ އިންތިހާބުތަކުގައިި މިފަހަރު ވާދަ ކުރަނީ:
- ހދ. ކުޅުދުއްފުށީ ކައުންސިލް (އުތުރު ދާއިރާ): ޕީއެންސީގެ ފަރާތުން އިބްރާހީމް އަހުމަދު، އެމްޑީޕީގެ ފަރާތުން ޝަމްނޫޒް މުހައްމަދު ނައީމް
- ރ. ރަސްމާދޫ ކައުންސިލްގެ އަންހެން މެމްބަރު: ޕީއެންސީގެ ފަރާތުން ޝަމްލާ ވާފިރު، އަމިއްލަ ގޮތުން އާއިޝާތު ޝަރަފިއްޔާ
- ފ. ބިލެތްދޫ ކައުންސިލްގެ ރައީސް: ޕީއެންސީގެ ފަރާތުން އަރީޙް އިސްމާއީލް، އެމްޑީޕީގެ ފަރާތުން ޝާއިލް މާހިރު