އާރްޓީއައި، ނުވަތަ މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ ދަށުން، ރައީސް އޮފީހުން މައުލޫމާތު ނުދީގެން ޖިނާއީ ދައުވާ ކޮށްދެއްވުން އެދި އިންފޮމޭޝަން ކޮމިޝަނަރުގެ ފަރާތުން ޕްރޮސެކިއުޓާ ޖެނެރަލްގެ އޮފީހަށް ހުށަހަޅުއްވާފަައިވާ މައްސަލައަކީ މި ސަރުކާރާ ގުޅުން ހުރި މައްސަލައެއް ނޫން ކަމަށް ރައީސް އޮފީހުން ވިދާޅުވެއްޖެއެވެ.
ރައީސް އޮފީހުގެ ޗީފް ސްޕޯޓްކްސްޕާސަން، ހީނާ ވަލީދު އެކްސްގައި ކުރެއްވި ޕޯސްޓެއްގައި ވިދާޅުވީ، އިންފޮމޭޝަން ކޮމިޝަނަރުގެ ފަރާތުން، ރައީސް އޮފީހުން އާރްޓީއައި ގެ ދަށުން ވެސް މައުލޫމާތު ނުދިންކަމަށް ބުނެ ޕީޖީއަށް ހުށަހަޅުއްވާފައިވާ މައްސަލައަކީ، މި ސަރުކާރު ފެށުމުގެ ކުރީގެ މައްސަލައެއް ކަމަށެވެ. އެމައްސަލައަކީ އެއީ ކޮވިޑް ވެކްސިންގެ މައުލޫމާތުތަކެއް ސާފުކުރަން 2022 ވަނަ އަހަރު ހުށަހަޅައި އޭރު މައުލޫމާތު ނުދީ އޮތް މައްސަލައެއް ކަމަށް ހީނާ ވަނީ ވިދާޅުވެފައެވެ.
ޕީޖީ އޮފީހުން މިއަދު ވިދާޅުވީ، އިންފޮމޭޝަން ކޮމިޝަނަރުގެ އޮފީހުގެ ޝިފާން އަހުމަދު ވ. ރައީސުލްޖުމްހޫރިއްޔާގެ އޮފީސް މައްސަލައާ ގުޅިގެން އިންފޮމޭޝަން ކޮމިޝަނަރުގެ ނިންމެވުން އިސްތިއުނާފު ނުކުރައްވައި އަދި އެ ނިންމުމަށް އަމަލު ވެސް ނުކުރައްވައި 45 ދުވަސް ފާއިތުވެފައިވާތީ، މައުލޫމާތުގެ ހޯދައި ލިބިގަތުމުގެ ހައްގުގެ ގާނޫނުގެ ދަށުން އައިކޮމް އިން ޕީޖީ އޮފީހަށް މައްސަލަ ހުށަހަޅާފައިވާ ކަމަށެވެ.
ޕީޖީ އޮފީހުން ބުނީ، ޖިނާއީ ކޮންމެ މައްސަލައެއް ވެސް ހުށަހެޅޭނީ އެކަށީގެންވާ މިންވަރަށް ތަހުގީގުކުރުމަށް ފަހުގައި ކަމަށްވާތީ، އެ މައްސަލާގައި ޖިނާއީ ކުށުގެ އަމަލެއް ހިމެނޭތޯ ބެލުމަށް އެ މައްސަލަ ތަހުގީގު ކުރުމަށް ފުލުހުންގެ އިދާރާއަށް ފޮނުވާފައިވާ ކަމަށެވެ.