މާލެ ސަރަަހައްދުގެ މަގުތަކުގެ ރައްކާތެރިކަމާއި އަމާންކަމަށް، “މާލެ ފަހި” ޕްރޮގްރާމް އިފްތިތާހު ކޮށްފިއެވެ.
މި ޕްރޮގްރާމް އިފްތިތާހުކޮށް ދެއްވީ އެކަމަށް ހާއްސަކޮށްގެން މިރޭ ބޭއްވި ރަސްމިއްޔާތެއްގައި ރައީސް، ޑރ.މުޙައްމަދު މުޢިއްޒު އެވެ.
މާލެ ފަހި ޕްރޮގްރާމަކީ ގްރޭޓަރ މާލެ ސަރަޙައްދުގެ މަގުމަތީގައި ދުއްވާ އުޅަނދުތައް ގިނަވުމުގެ ސަބަބުން ދިމާވެފައިވާ ތޮއްޖެހުމުގެ މައްސަލައަށް ހައްލެއް ހޯދުމަށް ސަރުކާރުން ފަށާ ހާއްސަ ޕްރޮގްރާމެކެވެ.
މި ޕްރޮގްރާމް ރާވައި ތަންފީޒްކުރާނީ މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަނުން ރާވައި ހިންގާ މި ޕްރޮގްރާމުގައި ހިމެނޭ ގިނަ ކަންކަމަކީ ކަމާ ގުޅުންހުރި އިދާރާތައް ހިމެނޭހެން އެކުލަވާލި “އަރބަން ޓްރ ފިކް ޑީ-ކޮންޖެސްޝަން މެނޭޖްމަންޓް ކޮމިޓީ”ގެ ލަފަޔާއި މަޝްވަރާ އާއެކު އެކުލަވާލި ޕްލޭނުގައިވާ ޙަރަކާތްތަކެކެވެ.
އެކޮމީޓީގައި ހިމެނޭ ދާއިރާތަކުގެ ތެރޭގައި ޓްރާންސްޕޯޓް މިނިސްޓްރީ، ސިފައިން، ފުލުހުން އަދި ކަސްޓަމްސްގެ އޮފިސަރުން ހިމެނެއެވެ.
މާލެ ފަހި ޕްރޮގްރާމް ބެހިފައިވަނީ މައިގަނޑު 3 ބަޔަކަށް. އެ ބައިތަކަކީ؛
➢ ޤާނޫނާއި ގަވާއިދުގެ ތެރެއިން ވެހިކަލް ރަޖިސްޓްރީކުރުމާއި އުޅަނދުގެ ޢަދަދު ކޮންޓްރޯލްކުރުން
➢ ޕަބްލިކް ޓްރާންސްޕޯޓްގެ ވަޞީލަތްތައް އިތުރަށް ހަރުދަނާކޮށް ތަރައްޤީކުރުން
➢ މަގުތަކަކީ ދަތުރުފަތުރާއި ހިނގައި ބިނގާވެއުޅެން ރައްކާތެރި އަދި ފަސޭހަ އަމާން ތަންތަނަށްހެދުން.
މި ޕްރޮގްރާމްގެ ދަށުން މާލޭ ސިޓީ ކައުންސިލުން ވަނީ އެއްގަމު އުޅަނދު ރަޖިސްޓްރީކޮށްދޭނެ އަދަދާއި، އުޅަނދު ބޭނުން ކުރެވޭނެ މުއްދަތު ކަނޑައެޅުމުގެ މަސައްކަތް ފަށާފައެވެ. މީގެ އިތުރުން ވެސް ތޮއްޖެހުމުގެ މައްސަލަ ހައްލު ކުރުމަށް ގަރާޖުގެ ވެރިފަރާތަށް ނޭނގެ ވެހިކަލް ރަޖިސްޓްރީ ކުރުމާއި އެހެނިހެން ވިޔަފާރި ކުރުމަށް ގަރާޖް ރަޖިސްޓްރީ ކުރުން ނިމުމަކަށް ގެނައުން ހިމެނެއެވެ.
މާލޭ ސަރަހައްދު ތޮއްޖެހިފައި އޮންނަ މައްސަލައަކީ ވަރަށް ބޮޑު މައްސަލައެކެވެ. މާލޭގައި ދުއްވާ ވެހިކަލްތައް ގިނަވެ، މާލޭގެ ގިނަ މަގުތައް ފުރެންދެން ވެހިކަލް ޕާކުކޮށްފައި އޮތުމަކީ ދިވެހިން އަބަދު ވެސް ޝަކުވާ ކުރަމުން އަންނަ މައްސަލައެކެވެ. ނަމަވެސް ފާއިތުވި އެއްވެސް ސަރުކާރެއްގައި މާލޭ ތޮއްޖެހުމުގެ މައްސަލައަށް ހައްލެއް ހޯއްދައިދެވިފައެއް ނުވެއެވެ.
ޤާނޫނާއި ގަވާއިދުގައި ބަޔާންކޮށްފައިވާ އިޖުރާއަތްތައް ފުރިހަމަނުކޮށް ރަޖިސްޓްރީކޮށްދިނުމުގެ ސަބަބުން، އާދަޔާ ޚިލާފަށް މާލޭގެ ސަރަހައްދަށް އުޅަނދުތައް ގިނަވެ، ގްރޭޓަރ މާލެ ސަރަހައްދުގެ މަގުތަކުގެ ހާލަތު އާންމު ދިރިއުޅުމަށް ދަތިވާ ހާލަތަކަށްވަނީ ގޮސްފައެވެ.
މި މައްސަލަ ހައްލުކުރުމުގެ ގޮތުން ރަޖިސްޓްރޭޝަން އަށް ހުށައަޅާ އަޅަނދުތަކުގެ ރަޖިސްޓްރޭޝަން ޕްރޮސެސްކުރުމުގެ ކުރިން ޤާނޫނުގައިވާ ގޮތުގެ މަތިން ގަރާޖުގެ ޞައްހަކަމާއި އަދި ކޮންސެންޓް ވެރިފިކޭޝަން ފުރިހަމަ ކުރަން 2024 ޖަނަވަރީގައި ވަނީ ފަށާފައެވެ.
މި ބަދަލުތައް ގެނެވުނު ހިސާބުން މާލެ ސަރަހައްދަށް ރަޖިސްޓަރކުރެވެމުން ދިޔަ އުޅަނދުތަކުގެ އަދަދުވަނީ ބޮޑުތަނުން ކުޑަވެފެއެވެ.
2021 ވަނަ އަހަރުން ފެށިގެން މާލެ ސަރަހައްދަށް ކާރު ރަޖިސްޓަރކުރަމުން ދިޔަ އަދަދު ވަނީ އަހަރުން އަހަރަށް އިތުރުވަމުންނެވެ. 2023 ވަނަ އަހަރު މަހެއްގެ މައްޗަށް 122 ކާރު މާލެ ސަރަހައްދަށް ރެޖިސްޓަރކުރެވިފައިވާއިރު، މި އަދަދު %76 ދަށްކޮށް 2024 ވަނަ އަހަރުގެ ޖޫންމަހުގެ ނިޔަލަށް ރެޖިސްޓަރކުރެވިފައިވަނީ މަހަކު 30 ކާރެވެ.