އަނެއްކާވެސް ޓިކްޓޮކްގައި މަރިޔަމް ސަމާ ކުރިއަށްގެންދާ "ހިތުން ހިތަށް" ފަންޑްރައިޒިންގ ޓިކްޓޮކް ލައިވް އެއްގަޑި އިރު ތެރޭގައި ކުޑަކުއްޖެއްގެ ހަޔާތުގެ އަލިކަން އިތުރުކޮށްދީފިއެވެ.
ލައްކައަކަށްވުރެ ގިނަ ރުފިޔާއާއި ފަސް ސަތޭކައަށްވުރެ ގިނަ ޑޮލަރު ހޯދައިދީގެން މިވަނީ ކުޑަކުޑަ ނޫހު ޝުއައިބްގެ ސާޖަރީއަށް ފަހި ރާސްތާއެއް ހޯދައިދީފައެވެ.
ތިން ހާހަށްވުރެ ގިނަ ވިއުވާސް އާއެކު ކުރިއަށްދިޔަ ފަންޑްރައިޒް އިވެންޓް ކުރިއަށްގެންދިޔައީ ރޭ 11:15 އިން 12:15 އަށެވެ. އެއް ގަޑިއިރުގެ ތެރޭގައި 107،879.51 ރުފިޔާ އަދި 568.19 ޑޮލަރު ވަނީ ހޯދާފައވެ. މި އިވެންޓުގެ އެންމެ ފުރަތަމަ 10 މިނެޓުގެ ތެރޭގައިވެސް ބައި ލައްކައެއްހާ ރުފިޔާ ލިބިގެންދިޔަކަން ފާހަގަކޮށްލެވެއެވެ.
ސަމާގެ ހިތުން ހިތަށް މިފަހަރުގެ އިވެންޓް ކުރިއަށް ގެންގޮސްފައި މިވަނީ ޓިކްޓޮކްގައި ސަމާއާ ދެކޮޅަށް ހަރަކާތްތަކެއް ހިންގަމުންދާ ދަނޑިވަޅެއްގައި ކަމަށްވުމުން މިއީ ސަމާ ކުރަމުންދާ ވަަރަށްވެސް ހާއްސަ އަދި ފުރިހަމަ މަސައްކަތެއްކަން މިވަނީ ހާމަވެ އެނގިގެން ގޮސްފައެވެ. ހަމައެހެންމެ ކޮންމެ ހުރަހަކާވެސް ކެރިހުރެ ކުރިމަތިލުމުގެ ހިތްވަރާއެކު އަނެކުންނަށް އެހީވުމަށް އުފެއްދި ހިތުންހިތަށް މިއީ ހަގީގަތުގައިވެސް މަދަދުގާރެއް ކަން ސަމާ މިވަނީ ސާބިތުކޮށްދީފައެވެ.
ދެކޮޅަށް ހިންގަމުންދާ ހަރަކާތްތަކަށް ސަމާލުކަމެއް ނުދީ އެތަކެއް އިލްޒާމުތަކެއް އޮތުމާއެކުވެސް ފަހަތަށް ޖެހުމެއް ނެތި ސަމާ ދެއްކި ހިތްވަރަށް ސާބަސް ހައްގެވެ،
ހިތުން ހިތަށް ރޭގެ އިވެންޓުވެސް ސަމާ ކުރިއަށް ގެންދިޔައީ މި ހަރަކާތުގައި ފަންޑު ހޯދައިދޭ ކުޑަ ކުއްޖާ އާއި މަންމަވެސް ކައިރީގައި ބައިންދައިގެން ބެލުންތެރިންނަށް ވެސް ފެންނާނޭ ފަދަ ގޮތަކަށް، ޓްރްންސްޕޭރެންޓް ގޮތަކަށެވެ. އެހެން ޓިކްޓޮކުން ގޮވާލަމުންދާ ދެފުށް ފެންނަ ފަދަ ގޮތަކަށެވެ. އަދި މިފަހަރުގެ އެކައުންޓަކީ ކުއްޖާގެ މަންމަގެ އެކައުންޓުކަން ވެސް ފާހަގަކޮށްލަމެވެ.
އުމުރުން ދެ އަހަރުގެ ނޫހް އަދްޔާން ޝުއައިބުގެ މަންމަމެނަށް ދަރިފުޅުގެ ސިއްހީ މައްސަލައެއް ހުރިކަން އެނގުނީ ދަރިފުޅު ލިބިގެން، ގެއަށްވެސް ދޫކޮށްލި ފަހުން ކުއްޖާގެ ގައިން ރީނދޫކަން ނުފިލުމުންނެވެ. ސިއްހީ އެތަކެއް ފަރުވާތަކަކަށްފަހު 2022 ގެ އޭޕްރީލްގައި ކުރި އޮޕަރޭޝަނަކުން ނޫހްގެ ލިވަރ ގެ ޓިޝޫ ހަލާކުވެ، ލިވަރ ބޮޑުވެފައިވާ ކަން އެނގުނެވެ. އަދި މިހާހިސާބުން މަސައްކަތް ކޮށް، ހިތްވަރާއެކު ހަމަ އެއަަހަރުގެ، 2022 ނޮވެމްބަރު މަހު ލިވަރ ޓްރާންސްޕްލާންޓް ވަނީ ހަދާފައެވެ. ނޫޙުގެ މަންމަ ފާތުމަތު ރަހުމާ ހަދިޔާ ކުރި ލިވަރ އަކުން ކުރި މި ސާޖަރީ ކާމިޔާބު ވީ ނަމަވެސް ނޫހުގެ މޭ ހެދި ބޮޑު ވުމަށް ފުރުސަތު ދިނުމަށް މަތިން ފަހާލާފައި ފޮނުވާލީ ފަހުން އިތުރު ސާޖަރީއެއް ކުރާ ގޮތަށެވެ.
މިފަންޑްރައިޒިންގ ގެ އެހީއާއެކު ނޫހު އާއި އޭނާގެ މަންމަ ރަހުމާ ސާޖަރީއަށް ފުރާނެއެވެ، ސަމާގެ ހިތުން ހިތަށް ފަންޑްރައިޒް އިވެންޓްގައި އެހީތެރިކަން އެ ހޯދައިދިނީ އެ ދަތުރަށެވެ.
ހުވަދޫ މީޑިޔާގެ ޓީމްގެ ދުއާއަކީ ނޫހް އަދްޔާން ޝުއައިބުގެ މި ސާޖަރީވެސް ކާމިޔާބުވެ ނޫހަށް ފަހި ފާގަތި އުފާވެރި ކުރިމަގެއް ލިބިގެންދިޔުމެވެ.
އަދިހަމައެހެންމެ އެތަކެއް ގޮންޖެހުމަކާއި އެތަކެއް ހުރަސްތަކަކާއެކުވެސް ސަމާ ކުރަމުންދާ ހިތްވަރަށް ސާބަސް ދިނުމާއެކު ޓިކްޓޮކް ހިތުންހިތަށް އުޖާލާ މުސްތަގުބަލަކަށް އަލިވިލިގެން ދިއުމަށް އެދެމެވެ. މިފަދަ ހިދުމަތްތަކަކީ ގައުމަށާއި ރައްޔިތުންނަށް ލިބިގެންދާ ނުހަނު ބޮޑު އެހީތެރިކަމެކެވެ. އަމިއްލަ ވަގުތު އެހެން އިންސާނެއްގެ ފައިދާއަކަށްޓަކައި ހުސްކުރުމަކީ ދަރުމައިން ފުރިގެންވާ ހެޔޮކަމެއްކަން ޔަގީނެވެ،