މޯލްޑިވްސް ޕޯޓްސް ލިމިޓެޑް (އެމްޕީއެލް) ގެ ކާގޯ އޮޕަރޭޝަން ހަލުވި ކުރުމަށް މަސައްކަތުގައި ހުރި ދަތިތައް ދެނެގަންނަން މެނޭޖްމަންޓް އިން ޕޯޓުގެ ކާގޯ އޮޕަރޭޝަންސްގައި އަމަލީ ގޮތުން ބައިވެރިވެވަޑައިގެންފިއެވެ.
މިއަދު މާލޭ ވިޔަފާރި ބަނދަރަށް ވަޑައިގަތް، ޕޯޓުގެ ކާގޯ އޮޕަރޭޝަންސްތަކުގެ އެކި މަސައްކަތުގައި އެމް.ޕީ.އެލްގެ ސީ.އީ.އޯ މުޙައްމަދު ވަޖީހް އިބްރާހިމާއި ކުންފުނީގެ ހުރިހާ ޑިޕާޓްމަންޓްތަކުގެ އިސްވެރިން ވަނީ އަމަލީ ގޮތުން ބައިވެރިވެވަޑައިގެންފައެވެ.
މި ރަސްމިއްޔާތުގައި ވާހަކަފުޅު ދައްކަވަމުން އެމް.ޕީ.އެލްގެ ސީ.އީ.އޯ ވަޖީހް ވިދާޅުވީ، މިއަދު ކުންފުނީގެ އިސްވެރިންނާއެކު ފެއްޓެވި މި ޕްރޮގްރާމުން ކުންފުނީގެ ހުރިހާ ވެރިންނަށް ޕޯޓް އޮޕަރޭޝަންސްގެ މަސައްކަތުގެ މާހައުލުގައި ހުރި އުނދަގޫތައް ފެނި، އެ މައްސަލަތަކަށް ހައްލުކުރާނެ ގޮތްތައް ހޯދުމަށް ފަސޭހަވެގެންދާނެ ކަމަށެވެ.
އަދި މުވައްޒަފަކު ބަލިވެގެން ޗުއްޓީ ނެގުމާއި ސަލާމް ބުނުމާއި ގުޅިގެން ކާގޯ އޮޕަރޭޝަންސްގެ މުވައްޒަފުން މަދުވާ ހާލަތެއްގައި އެހެން ދިމަ ދިމާތަކުން މުވައްޒަފުން ގެނެސް އެ މަސައްކަތެއް ހަވާލު ކުރެވޭނެ ގޮތެއް ހޯދުމަކީވެސް މިފަދަ ޕްރޮގްރާމެއްގެ އެއް ބޭނުން ކަމަށް ވަޖީހު ވިދާޅުވިއެވެ.
"އަޅުގަނޑު މި ބަލަނީ 2 ހަފްތާ ތެރޭގައި މިކަން ނިންމާލެވޭނެ ކަމަށް. އަޅުގަނޑުމެންގެ ޓާގެޓަކީ ކުންފުނީގެ ހުރިހާ ވެރިންނާއި މުވައްޒަފުންނަށް އެނގެންޖެހޭނެ، މަސައްކަތުގެ ހުރި މުހިންމުކަން. މިކަން ނިމުމުން ކުންފުނީގެ މި މަސައްކަތުގައި ހުރި ދަތިތަކަށް ހޭލުންތެރިވާނެ. އޭހާ ހިސާބުން ކުންފުނީގެ އޮޕަރޭޝަން މިހާރަށް ވުރެ ބޮޑަށް އަވަސް ވެގެންދާނެ " ވަޖީހު ވިދާޅުވިއެވެ.
ވަޖީހު އިތުރަށް ވިދާޅުވީ އެމް.ޕީ.އެލްގެ އެންމެ މުހިންމު މަސައްކަތް ކަމަށްވާ ކާގޯ އޮޕަރޭޝަންސްގެ މަސައްކަތްތަކުގެ އަމަލީ ތަޖުރިބާ ކުންފުނީގެ ހުރިހާ މުވައްޒަފުންވެސް ހޯދަން ޖެހޭ ކަމަށް ޤަބޫލްފުޅުކުރައްވާ ކަމަށެވެ. އަދި ކުންފުނީގެ ހުރިހާ މުވައްޒަފުންވެސް ކާގޯ އޮޕަރޭޝަންސްގެ އަމަލީ ތަޖުރިބާ ހޯދާ ޕްރޮގްރާމް ވަރަށް އަވަހަށް ފަށާނެ ކަމަށްވެސް ވަނީ ވިދާޅުވެފައެވެ.