ދެވަނަ ކާގޯ ބޯޓު ހޯމަ ދުވަހު އައްޑޫސިޓީއަށް ދަތުރުކުރާނެ ކަމަށާއި މި ހިދުމަތް އިތުރަށް ފުޅާކޮށް ފުވައްމުލަކު ސިޓީ ރައްޔިތުންނަށް ވެސް މުދާ ގެނެވޭނެ ގޮތް ހެދުމުގެ މަސައްކަތް ކުރައްވަމުން ގެންދަވާ ކަމަށް މޯލްޑިވްސް ޕޯޓްސް ލިމިޓެޑް (އެމްޕީއެލް) ގެ ސީއީއޯ މުހައްމަދު ވަޖީހު ވިދާޅުވެއްޖެއެވެ.
އެމްޕީއެލް ގެ ސީއީއޯ މިފަދައިން ވިދާޅުވީ މީސްމީޑިއާގައި ކުރި ޕޯސްޓެއްގައެވެ. އެ ޕޯސްޓުގައި ވިދާޅުވެފައިވަނީ އިންޑިޔާގެ ޓިއުޓް ކޮރިން އިން ޑައިރެކްޓް ކޮށް އައްޑޫ ސިޓީ އަށް މުދާ ގެން ދިއުން މެދު ކެޑުމެއްނެތި ކުރިޔަށް އެބަ ގެންދާ ކަމަށާއި އެގޮތުން އިތުރު ބޯޓެއް އައްޑޫ ސިޓީ އަށް ދަތުރު ކުރަމުން ގެންދާ ކަމަށެވެ. އަދި ޝެޑިއުލް ކުރެވިފައިވާ ގޮތުން އަންނަ ހޯމަ ދުވަހު މިބޯޓު ހިތަދޫ ޕޯޓަށް ބަދަރުކުރާނެ ކަމަށް ވެސް ވަޖީހު ވިދާޅުވިއެވެ.
އޭގެ އިތުރުން ވަޖީހު ވިދާޅުވީ މިބޯޓުން ގިނަ އަދަދަކަށް ފިޔާ، ބިސް، އަލުވި އަދި ތަރުކާރީގެ އިތުރު ބާވަތްތަކާއި މޭވާގެ ބާވަތްތަކުގެ އިތުރުން ޖެނެރަލް ކާގޯގެ ބާވަތްތައް ގެންދާނެ ކަމަށާއި އަދި މިހާރު ފުވައްމުލަލު ސިޓީގެ ރައްޔިތުންނަށް ވެސް ދާއިމީ ކޮށް މިޚިދުމަތް ފޯރުކޮށްދިނުމަށް މަސައްކަތް ކުރަމުން ދާ ކަމަށެވެ.
އެމްޕީއެލުން އައްޑޫ ސިޓީ އަށް މި ހިދުމަތް ފަށާފައިވަނީ ދާދިފަހުންނެވެ. އެގޮތުން މި ހިދުމަތް ފެށިތާ މަދު ދުވަހުގެ ތެރޭގައި 150 ޓަނުގެ ތަރުކާރީ އާއި މޭވާ އެސިޓީގެ ޕޯޓަށް ހުސްކޮށްފައިވެއެވެ.
އައްޑޫގައި މި ހިދުމަތް ފެށުމާއި ގުޅިގެން އެމްޕީއެލުން ބުނެފައިވަނީ ޑިމާންޑް ބޮޑުވެ އިތުރު ބޯޓެއް މިމަހު އެޅުމަށް ނިންމައި ފުރުސަތު ހުޅުވާލީ ކަމަށާއި އެހެން ކަމުން ހުރިހާ ވިޔަފާރިވެރިންނަށް މުދާގެނައުމުގެ ފުރުސަތު ހުޅުވާލާފައިވާ ކަމަށް ވެސް ވިދާޅުވިއެވެ.