ހުޅުމާލެ ފަރުކޮޅުފުށީގައި ޤާއިމުކުރާ ޕެޓް ކެއާ ފެސިލިޓީގެ މަސައްކަތުގެ 70 އިން ސައްތަ ވަނީ ނިމިފައި ކަމަށް މާލެ ސިޓީގެ މޭޔަރު އާދަމް އާޒިމް ވިދާޅުވެއްޖެއެވެ.
ބުޅާތަކަށް ހާއްސަ ޝެލްޓާއެއް ގާއިމް ކުރުމަށް ފަސްހާސް އަކަފޫޓުގެ ބިމެއް ވަނީ ހަމަޖައްސާފައެވެ. ފަރުކޮޅުފުށިން ހަމަޖައްސާފައިވާ މި ބިމުގައި ބުޅާތަކަށް ގެދޮރު ނުވަތަ ހިޔާވައްސެެއްގެ ގޮތުން ބިނާ ކުރާ ފެސިލިޓީގެ އަމަލީ މަަސަައްކަތް ފަށައިގެން ދަނީ ކުރިއަށެވެ.
މާލެ ރައްޔިތުންނާ ބައްދަލު ކުރައްވައި. މާލެ މަގުމަތީގައި އުޅޭ ބުޅާތަކުގެ ސަބަބުން ރައްޔިތުންނަށް ކުރިމަތިވާ އުނދަގޫތައް ބޮޑުކަން ފާހަގަކުރެއްވުމާއެކު އާޒިމް ވިދާޅުވީ ހަމަ އެހެންމެ މަގުމަތީގައި އުޅޭ އެބުޅާތަކަށް ލިބޭ އަނިޔާވެސް އެހާ ގިނަ ކަމަށެވެ. ކަންމިހެން އޮތުމާއެކު މިކަމަށް ހައްލު ގެނައުމަށްޓަކައި ހަދަން ފެށި ބުޅާތަކަށް ހާއްސަ ކެޓްޝެލްޓާގެ ހަތްދިހައިން ސައްތައިގެ މަސައްކަތް ވަނީ ނިމިފައި ކަމަށްވެސް އާޒިމް ވަނީ ވިދާޅުވެފަައެވެ.
“އެހެންކަމުން މިކަމަށް ހައްލު ކުރުމަށްޓަކައި ހަދަން ފެށި ކެޓް ޝެލްޓާގެ %70ގެ މަސައްކަތް ﷲ އިރުާދަފުޅުން ނިމިފައި،”. އޭނާ ވިދާޅުވިއެވެ.
މި މަސައްކަތް ކުރެވެމުން ދަނީ ސަރުކާރުގެ ވަރަށް ބޮޑު އެހީތެރިކަމާއި އެކުގައި ކަމަަށްވެސް އާޒިމް ވިދާޅުވިއެވެ.
އެތަން ނިމޭއިރު ބުޅާތަކަށް ހާއްސަ ހޮޓަލަކާއި ޕާކެއްގެ އިތުރުން ފިހާރައެއް ހުންނާނެއެވެ. އަދި މާލެ ސަރަހައްދުގައި އުޅޭ ބުޅާތައް އެ ތަނަށް ބަދަލުކޮށް، ފަރުވާ ދެވޭނެ އިންތިޒާމު ވެސް ހުންނާނެއެވެ.
މާލޭގެ މަގުތަކުގައި ބުޅާތައް ގިނަވުމަކީ މާލޭގެ ރައްޔިތުން ކަންބޮޑުވާ ކަމެކެވެ. މިކަމަށް ހައްލު ހޯދުމަށް ޕެޓް ކެއާ ފެސިލިޓީއެއް ގާއިމު ކުރުމާ ގުޅޭ ގޮތުން ސިޓީތަކާއި އިދާރީ ދާއިރާތައް ހިންގުމާއި، އާންމު މަސައްކަތްތަކާ ބެހޭ މިނިސްޓްރީން ސޯޝަލް ކައުންސިލަށް ހުށަހެޅުމުން އެ މަސައްކަތް މިހާރު ވަނީ ސިޓީ ކައުންސިލާއި ހަވާލުކޮށްފައެވެ. އެ މަސައްކަތް ކުރިޔަށް ދާނީ ސިޓީ ކައުންސިލްގެ ބެލުމުގެ ދަށުންނެވެ.