އިލެކްޝަންސް ކޮމިޝަނުގެ ރައީސް ފުއާދު ތައުފީގުގެ (ޕްރޮފެޝަނަލް – ޕާސަނަލް) ރަސްމީ އަދި ޒާތީ ހަޔާތުގެ މައްޗަށް ތަފްސީލީ ނަޒަރިއްޔާތަކުން އަލިއަޅުވާލައި ތަޖުރިބާކާރު ނޫސްވެރިޔާ އަދި ލިޔުންތެރިޔާ އަހުމަދު ސާއިލް އަލީ ލިޔުއްވާފައިވާ، ތައުފީގުގެ ބަޔޯގްރަފީ "ގޮތުގައި" ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު ނެރުއްވައިދެއްވައިފިއެވެ.
މިއަދު ހެނދުނު ރައީސުލްޖުމްހޫރިއްޔާގެ އޮފީހުގައި މިފޮތް ހަދިޔާ ކުރުމަށް ބޭއްވި ހާއްސަ ރަސްމިއްޔާތެއްގައި، ރައީސް ޑރ މުއިއްޒު ވަނީ އެމަނިކުފާނުގެ އަތްޕުޅުން ޖުމްލަ 190 ސަފުހާގެ "ގޮތުގައި" މިފޮތް އިފްތިތާހުވެސް ކޮށްދެއްވާފައެވެ.
ގައުމީ ހިދުމަތްތެރިޔާ ފުއާދުގެ ޒާތީ ހަޔާތާއި، މަސައްކަތުގެ ހަޔާތުގެ ހުރިހާ ވާހަކަތަކެއް ތަފްސީލާއެކު ހިމެނިފައިވާ މި ފޮތުގައި ރާއްޖެއަށް އަލަށް ކޮމްޕިއުޓަރު ގެނެސް، އޭގެ ބޭނުން ކޮށްގެން ފުއާދު އިސްވެ ހުންނަވައި ބޯހިމެނުމުގެ މަސައްކަތް ކުރިއަށް ގެންދެވި ދުވަސްވަރުން ފެށިގެން ސާކް ޖަމިއްޔާގެ ސެކްރެޓްރިއޭޓުގައި ވަޒީފާ އަދާކުރެއްވި ދުވަސްވަރުގެ ވާހަކަތައްވެސް ހިމަނާފައިވެއެވެ.
އެންމެ ބޮޑަށް ދިވެހީންގެ އިހުތިރާމް ހޯއްދެއްވި މަސައްކަތް، އާދެ، ކެތްތެރިކަމާއި ޖެހިލުންކުޑަ އެހެނަސް ޒިންމާދާރުކަމުގެ ނިހާއީ ނަމޫނާއެއް ގޮތަށް ފުއާދު އަދާ ކުރެއްވި އަދިވެސް ކުރައްވަމުން ގެންދަވާ އީސީގެ މަސައްކަތްތަކާއި، އެ ދުވަސްވަރު ކުރެވުނު ތަޖުރިބާތައް މި ފޮތުގައި ހިމެނެއެވެ. ރާއްޖެއަށް ޑިމޮކްރަސީ ތައާރަފުވެ ދެފުށް ފެންނަ ގޮތަށް އިންތިހާބުތައް ބާއްވަން ގާނޫނު ލާޒިމްކުރުމުން، އެ މަސައްކަތް ފުރިހަމަކޮށް ގެންދެވުމުގައި ފުއާދު އަދާކުރެއްވި ދައުރު ވެސް މި ފޮތުގައި ހިމެނެއެވެ.
ފުއާދު ތައުފީގުގެ ބަޔޯގްރަފީ ނެރުމަށް ބޭއްވި ރަސްމިއްޔާތުގެ ތެރެއިން — ފޮޓޯ/ ރައީސް އޮފީސް
ފޮތުގެ ތައާރަފުގައިވާ ގޮތުން، ވެރީންނަށް ރައްޔިތުންގެ އިތުބާރު ކުޑަވެފައިވާ ޒަމާނެއްގައި ފުއާދަކީ ދިވެހީންނަށް ލިބުނު މުތެއް ކަމަށާއި ފުއާދަކީ ހިންގުމާއި ރޭވުމާއި ތަންފީޒުކުރެއްވުމުގައި ދެވަނައެއް ނެތް ފަސްމީރު ކުރި ރުކެއް ކަމަށެވެ.
"މި ފޮތަކީ އޭނާގެ ހަޔާތުނާމާއެވެ. އެންމެ ތުއްތުއިރުން ފެށިގެން މިއަދާ ހަމަޔަށް ހަޔާތުގައި ދިމާވި ހުރިހާ ކަމެއް ހިމެނެއެވެ. ހިތާމަތަކާއި، އުފާތަކެވެ. ތަޖުރިބާތަކާއި، ގޮންޖެހުންތަކެވެ. ކާމިޔާބާއި، ފިލާވަޅުތަކެވެ. ލޯތްބާއި، ބޭވަފާ ވެސް މެއެވެ،" ތައާރަފުގައިވެއެވެ.
މިއީ ސާއިލުގެ ތިން ވަނަ ފޮތް ކަމަށްވާއިރު، އޭނާ މީގެ ކުރިން ލިޔުއްވީ ނަފްސާނީ ބަލީގައި ތަހައްމަލުކުރެއްވި ތަޖުރިބާތަކާ ގުޅޭ ގޮތުން "އެ ދުވަސް ގެނެވޭނެ"، އަދި ރައީސުލްޖުމްހޫރިއްޔާގެ ކުރީގެ ނާއިބް އޮނަރަބަލް ފައިސަލް ނަސީމްގެ ބަޔޯގްރަފީ "ފައިސަލް ނަސީމް"އެވެ.
ސަން އޮންލައިންގެ މެނޭޖިން އެޑިޓަރުކަން ކުރައްވާ ސާއިލަކީ، ނޫސްވެރިކަމުގެ ދާއިރާގައި 12 އަހަރު ހޭދަކުރައްވާފައިވާ ބޭފުޅެކެވެ. އޭނާއަށް ވަނީ މޯލްޑިވްސް މީޑިއާ ކައުންސިލުން ދޭ އިޖުތިމާއީ ދާއިރާގެ އެންމެ މޮޅު ނޫސްވެރިޔާގެ އެވޯޑާއި، އެންމެ އުއްމީދީ ނޫސްވެރިޔާގެ އެވޯޑް ލިބިފައެވެ. އޭނާ ވަނީ މީގެ ކުރިން "މިހާރު"، "ވަން އޮންލައިން"، "އަދަދު" ގައި ވެސް މަސައްކަތްކުރައްވައިފައެވެ.
ވާހަކަ ލިޔުންތެރިން އޮންލައިންކޮށް ލިޔާ ވާހަކަ ލިޔުންތެރިން ގިނަ ދުވަސްވަރެއް ނަމަވެސް ފޮތް ނެރުން މަދު ދުވަސްވަރެއްގައި ސާއިލް ކުރައްވާ މި މަސައްކަތަށް ސާބަހާއި ތައުރީފް ހައްގެވެ. ހަމައެހެންމެ އާދައިގެ ލޯބީގެ ނުވަތަ ހިޔާލީ ވާހަކަތަކުގެ ބަދަލުގައި ސާއިލް ލިޔުއްވާ ތަފާތު ފޮތްތަކުގެ ސަބަބުން ސާއިލް ވެފައިވަަނީ ތަފާތު ލިޔުންތެރިއަކަށެވެ. އެހެނީ މިފަދަ ބައޮގްރަފީ ލިޔުމަކީ ހިޔާލީ ވާހަކަ ލިޔުންހާ ފަސޭހަ ކަމަކަށް ނުވާތީއެވެ. މިއީ މީހެއްގެ ހަޔާތުގެ ހަގީގީ ވާހަކަތައް ކަމަށްވުމާއެކު ލިޔުމުގައިވެސް ސަމާލުކަން ދޭން ޖެހޭ މިންވަރު ބޮޑު ކަމަށް ވާތީއެވެ.
ފުއާދު ތައުފީގުގެ ބަޔޯގްރަފީ ނެރުމަށް ބޭއްވި ރަސްމިއްޔާތުގެ ތެރެއިން — ފޮޓޯ/ ރައީސް އޮފީސް
މި ފޮތް ވިއްކުމަށް ހަމަޖެހިފައިވަނީ 200ރ. އަށެވެ. މި ފޮތް އުރީދޫގެ އީކޮމާސް ވެބްސައިޓް އިން ގަންނަން ލިބޭނެ އެވެ. އަދި 9185335 ނަމްބަރު ފޯނަށް ގުޅައި އޯޑަރުކުރުމުން މާލެ ސަރަހައްދުގެ ކޮންމެ ހިސާބަކަށް ވެސް ޑެލިވާކޮށްދޭނެއެވެ.
"ތަޅަމުދިގޭ މުޙައްމަދު ތައުފީޤާއި ހާޖަރޭގޭ ސިއްތިގެ ފުއާދު ތައުފީޤު ދިވެހީން ދަންނަން ފެށީ ތަފާސްހިސާބަށް ކުޅަދާނަ ބޭފުޅެއްގެ ގޮތުގައެވެ. ރާއްޖެއަށް އަލަށް ކޮންޕިއުޓަރު ގެނެސްގެން، އޭގެ ބޭނުން ކުރައްވައިގެން އޭނާ ބޯހިމެނުމުގެ މަސައްކަތް އެހެން ހަރުފަތަކަށް ގެންދެވިއެވެ. ސާކުގެ ސެކްރެޓިއޭޓުގައި ވެސް ވަޒީފާ އަދާކުރެއްވިއެވެ. ނަމަވެސް ދިވެހީންގެ އިހުތިރާމް އޭނާ އެންމެ ބޮޑަށް ހޯއްދެވީ އިލެކްޝަންސް ކޮމިޝަނުގައި ކުރެއްވި މަސައްކަތުންނެވެ. ރާއްޖެއަށް ޑިމޮކްރަސީ ތައާރަފުވެ ދެފުށް ފެންނަ ގޮތަށް އިންތިޚާބުތައް ބާއްވަން ގާނޫނު ލާޒިމްކުރުމުން، އެ މަސައްކަތް ފުރިހަމަކޮށް ގެންދެވުމުގައި ފުއާދު އަދާކުރެއްވި ދައުރު، ދިވެހި ތާރީޚުގައި ވަނީ ލިޔެވިފައެވެ. ސިޔާސީ ގޮންޖެހުންތަކާއި، ވާދަވެރިކަމުގައި ފިތި، އެކަށީގެންވާ ގޮތަށް މަސައްކަތްނުކުރެއްވޭ ހާލަތުގައި ވެސް އޭނާ ދެއްކެވި ހިތްވަރަށް ސާބަސް ހައްގުވެއެވެ. ވެރީންނަށް ރައްޔިތުންގެ އިތުބާރު ކުޑަވެފައިވާ ޒަމާނެއްގައި ފުއާދަކީ، ދިވެހީންނަށް ލިބުނު މުތެކެވެ. އެއީ ހިންގުމާއި، ރޭވުމާއި، ތަންފީޒުކުރެއްވުމުގައި އެފަދަ ދެވަނައެއް ނެތް ފަދަ ފަސްމީރުކުރި ރުކެކެވެ. މި ފޮތަކީ އޭނާގެ ހަޔާތުނާމާއެވެ. އެންމެ ތުއްތުއިރުން ފެށިގެން މިއަދާ ހަމަޔަށް ހަޔާތުގައި ދިމާވި ހުރިހާ ކަމެއް ހިމެނެއެވެ. ހިތާމަތަކާއި، އުފާތަކެވެ. ތަޖުރިބާތަކާއި، ގޮންޖެހުންތަކެވެ. ކާމިޔާބާއި، ފިލާވަޅުތަކެވެ. ލޯތްބާއި، ބޭވަފާ ވެސް މެ އެވެ،"