އަނިޔާވެރި ގޮތަކަށް މަަރާލާފައިވާ ރ. މީދޫ، ފެންފިޔާޒުގެ މުހައްމަދު އަނަސްގެ މަރުވީ 7 އަހަރު ފާހަގަކުރުމުގެ ގޮތުން މިރޭ މީދޫގެ ހުރިހާ މަގުބައްތިތައް ނިއްވާލުމަށް އެރަށު ކައުންސިލުން ނިންމައިފިއެވެ.
އަނަސްގެ މަރުގެ ހިތާމަ އެ ރަށުގެ ރައްޔިތުންގެ ހިތްތަކާއި ސިކުނޑިތަކުން ފޮހެނުލެވެއެވެ. އެ އަނދިރިކަން އަދިވެސް ރަށަށް ވެރިވެފައިވާ ކަމަށެވެ.
"ރަށުގެ ރައްޔިތުން އެ އަނދިރިކަމުން އަރައިނުގަނެވޭކަން ދައްކުވައިދޭން ކުރާ ކަމެއް. އަސްލު އިވެންޓެއް ގޮތަށް ކުރިޔަށް ގެންދާ ކަމެއް ނޫން އެއީ. މިއަދަކީ އަނަސްގެ މަރަށް 7 އަހަރުވާ ދުވަސް. އަނަސް މަރާލި ވަގުތު 9:15 އިން 9:30 އާ ދޭތެރޭ ނިއްވާލަނީ." މީދޫ ކައުންސިލް ހަސަން ޝަރީފް ވިދާޅުވިއެވެ.
ހަމަމިއާއެކު މިރޭ 15 މިނެޓަށް ރަށް އަނދިރި ކޮށްލަން ނިންމީ ކަމަށް ކައުންސިލުން ވަނީ ހާމަކޮށްފައެވެ.
2017 ވަނަ އަހަރުގެ ޖުލައި މަހުގެ 31 ވަނަ ދުވަހުގެ ރޭގެ ވަގުތެއްގައި ތޫނު އެއްޗެހި ހިފައިގެން އައި ގްރޫޕަކަށް ފިލަން ވެގެން އޭނާ ލިޓަސް ސާވިސް ސެންޓަރު ތެރެއަށް ވަނުމުން އެތާ ތެރޭގައި އަނަސްއަށް ހަމަލާދީ މަރާލާފައެވެ.
އަނަސްގެ މަރަށް 7 އަހަރު ފުރޭ މިރޭ މީދޫގައި 15 މިނެޓް އަލިކަމަކާ ނުލައި އަނދރީގައި ކުރިއަށްގެންދަން ވަނީ ނިންމަފައި
އަނަސްގެ މަރުގެ މައްސަލައިގައި ދައުވާ ކުރީ:
- ދަފްތަރު ނަމްބަރު 1746 ސިމާހު މޫސާ
- ސ. ފޭދޫ ވެސްޓަންވިލާ ހަސަން މަހްފޫޒް
- ތ. ކިނބިދޫ ގުލްފާމުގޭ މުހައްމަދު ޝާޒް
- ލ. ގަން ތުނޑީ، ނަންނާރިގެ ޖުނައިހު އަބްދުﷲ
- މ. ދިމިޝްގު އުސްމާން ޝަރީފް
- ޅ. ކުރެންދޫ އަސުރުމާގޭ އަހުމަދު ޒަޔާް
- މ. ލޮނުމިދިލިގޭ އަފްރާހު އަބްދުލް ރައްޒާގު
މިދިޔަ ފެބްރުއަރީ މަހު 2 ވަނަ ދުވަހު މި ހަތް މީހުންގެ މައްޗަށް ކުށް ސާބިތު ނުވާ ކަމަށް ކްރިމިނަލް ކޯޓުން ހުކުމްކޮށް އެމީހުން ވަނީ މިނިވަންކޮށްފައެވެ.
"މިއަދަކީ އަނަސްގެ އަނިޔާވެރި މަރަށް 7 އަހަރު ފުރޭ ދުވަސް.
މިއީ، މުޅި މީދޫއަށް ކަޅު ދުވަހެއް.އަދިވެސް މީދޫގެ ރައްޔިތުން ތިބީ އެ އަނިޔާވެރި މަރަށް އިންސާފަށް އެދި އެދި.31 ޖުލައި 2017 ވަނަ ދުވަހުގެ ރޭ އެ އަނިޔާވެރި ޤަތުލު ހިނގާދިޔަ ވަގުތަކީ މުޅި މީދޫގެ ރައްޔިތުންނަށް އަނދިރި ވަގުތެއް.އެ އަނދިރި ވަގުތު ފާހަގަކުރުމަށް މިރޭ 9:15 އިން 9:30 އަށް މީދޫގެ ހުރިހާ މަގުބައްތި ތަކެއް ނިއްވާލާ ގޮތަށް ވަނީ ހަމަޖެހިފައި. އަދި އެވަގުތުގައި އިންސާފަށް އެދި ސޯޝަލް މީޑިއާގައި ވީހާވެސް ގިނަ ބޭފުޅުން ޝުއޫރުފާޅުކޮށްދެއްވުމަކީ ވަރަށް ބޮޑު އެދުމެއް."
އެ މައްސަލައިގައި މިހާތަނަށް ދައުވާ ކުރި މީހުންގެ ތެރެއިން ކުށް ސާބިތުވެފައިވަނީ 17 އަހަރުގެ ކުއްޖެއްގެ މައްޗަށެވެ. އެކުއްޖާގެ މައްޗަށް ހައިކޯޓުން ވަނީ މިދިޔަ އަހަރު 18 އަހަރުގެ ޖަލު ހުކުމެއް އިއްވާފައެވެ.