އިންޑިއާގެ ނެއިބަރހުޑް ފަސްޓް ސިޔާސަތުގެ ދަށުން ރާއްޖެއަށް އެތެރެކުރާ ކާބޯތަކެތީގެ ތެރޭގައި ހިމެނޭ ފިޔާ، އަލުވި، ބިސް ހިމެނޭހެން އަދި އިމާރާތްކުރާ ސާމާނުތަކަށް ކޯޓާ އިތުރުކުރުމަށް އިންޑިއާއިން ނިންމައިފިއެވެ.
ރާއްޖޭގައި ބޭނުންކުރާ އިމާރާތްކިރުމުގެ ދާއިރާއަށް ބޭނުންވާ ހިލަ ހިލަވެލި އަދި ދަގަނޑު ފަދަ ސާމާނު އެންމެ ގިނައަދަދަކަށް އެތެރެ ކުރަމުންދަނީ އަވަށްޓެރި އިންޑިއާއިންނެވެ.
ރާއްޖެއަށް ބޭނުންވާ އަސާސީ ކާބޯތަކެއްޗާއި ކޮންސްޓްރަކްޝަން ދާއިރާއަށް ބޭނުންވާ ސާމާނުގެ ކޯޓާ އިންޑިއާއިން މިދިޔަ އޭޕްރީލް މަހު ވަނީ އެއް އަހަރަށް އިތުރުކޮށްދީފައެވެ.
މިއީ ރާއްޖެ އާއި އިންޑިއާއާ ދެމެދު 1981 ވަނަ އަހަރު ހަދާފައިވާ “އެގްރީމެންޓް އޮން ޓްރޭޑް ކޯޕަރޭޝަން”ގެ ދަށުން އެޕްރޫވްކޮށްފައިވާ އެންމެ ބޮޑު ކޯޓާއެވެ.
އެގޮތުން ރާއްޖޭގައި ކުރިއަރަމުން އަންނަ ކޮންސްޓްރަކްޝަން އިންޑަސްޓްރީއަށް މުހިންމު ތަކެތި ކަމަށްވާ ހިލަ އާއި ހިލަވެލީގެ ކޯޓާ 1،000،000 މެޓްރިކް ޓަނަށް ވަނީ އިތުރުކޮށްފައެވެ. މީގެ އިތުރުން ބިސް، އަލުވި، ފިޔާ، ހަކުރު، ހަނޑޫ، ގޮދަން ފުށް އަދި މުގުގެ ކޯޓާ ވެސް ފަސް އިންސައްތަ ވަނީ އިތުރުކޮށްފައެވެ.
މީގެ އިތުރުން ރާއްޖެ އާއި އިންޑިއާއާ ދެމެދު ގާއިމުކޮށްފައިވާ ވިޔަފާރިއާ ގުޅޭ އެއްބަސްވުމެއްގެ ދަށުން، ކާޑުގެ ބާވަތްތަކާއި އަސާސީ މުދާ ރާއްޖެއަށް ގެނައުމަށް ބޭނުން ކުރެވޭ ބަނދަރުތަކުގެ ލިސްޓަށް އިތުރު ދެ ބަނދަރެއް ހަމަޖައްސައި އިންޑިއާ ސަރުކާރުން އެކަން ރޭ ވަނީ އިއުލާންކޮށްފައެވެ.
އިންޑިއާގެ ޑިރެކްޓާ ޖެނެރަލް އޮފް ފޮރިން ޓްރޭޑުން ނެރުނު ލިސްޓުގައި، ރާއްޖެއަށް އަސާސީ މުދާ ބޭރުކުރަން ހަތަރު ބަނދަރެއް ކަނޑައަޅާފައިވެއެވެ. އެއީ އެއީ ޓުޓިކޯރިން ޕޯޓާއި މުންދްރާ ޕޯޓާއި ނަވަ ޝޭވާ ޕޯޓުގެ އިތުރުން ތަގްލުކަބާދު ޕޯޓެވެ. އެ ލިސްޓުގައި އަލަށް ހިމެނީ ކަންޑްލާ އާއި ވިޝާކަޕަޓްނަމް ޕޯޓެވެ.