ހަނިމާދޫ އެއާޕޯޓްގައި ހަތިޔާރު ބޭނުންކޮށްގެން މާރާމާރީ ހިންގި މައްސަލައިގައި ހައްޔަރަށް ގެންދިޔަ މީހާގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން 15 ދުވަސް ޖަހައިފިއެވެ.
ހަނިމާދޫ އެއާޕޯޓްގައި މާރާމޭރީ ހިންގާފައިވަނީ ހުކުރު ދުވަހުއެވެ.
އޭރު ފުލުހުން ބުނީ އެ މާރާމާރީގެ މައްސަލަ އެ ދުވަހު 8:00 ގައި ރިޕޯޓް ކޮށްފައިވާ ކަމަށެވެ. މާރާމާރީ ހިންގީ އެއާޕޯޓުގައި މަސައްކަތަށް ކުރަމުންދާ ދެ ބިދޭސީން ކަމަށް ވެސް ފުލުހުން ބުންޏެވެ. ފުލުހުން ބުނީ އެމީހުން މާރާމާރީ ހިންގާފައިވަނީ ތޫނު ހަތިޔާރު ބޭނުންކޮށްގެން ކަމަށެވެ. ނަމަވެސް ބޭނުން ކުރީ ކޮންކަހަލަ ހަތިޔާރެއް ކަމެއް ބުނެފައެއް ނުވެއެވެ.
އެ މާރާމާރީގައި އަނިޔާވި މިހާއަށް ހަނިމާދޫ ހެލްތް ސެންޓަރުގައި ފަރުވާ ދީފައިވާ ކަމަށްވެސް ފުލުހުން ބުންޏެވެ. މީގެ އިތުރުން ފުލުހުން ބުނީ އެ މައްސަލަ ތަހުގީގް ކުރަމުންދާ ކަމަށެވެ. އެގޮތުން އެކަކު ފުލުހުންގެ ބެލުމުގެ ދަށަށް ގެންދެވުނު ކަމަށާއި، އެއީ 37 އަހަރުގެ އިންޑިއާ ފިރިހެނެއް ކަމަށްވެސް ފުލުހުން ވަނީ ބުނެފައެވެ. މި ހާދިސާގައި އަނިޔާވީ 39 އަހަރުގެ އިންޑިއާ މީހަކަށް ކަމަށްވެސް ފުލުހުން ބުނެއެވެ.
މިހާރު 37 އަހަރުގެ މީހާ އަށް ވަނީ ކްރިމިނަލް ކޯޓަށް ހާޒިރުކުރުމުން 15 ދުވަހަށް ބަންދު ކުރަން ނިންމާފައި ކަމަށްވެސް ފުލުުހުން ބުނެއެވެ.
މާރާމާރީގެ މައްސަލަތައް ހުއްޓުވުމަށް ފުލުހުން ގިނަ މަސައްކަތްތައް ކުރެއެވެ. ނަމަވެސް މާރާމާރީގެ މައްސަލަތައް ދުވަހެއް ދުވަހެއް އިތުރުވެގެންދާކަން ފާހަގަ ކުރެވެއެވެ. މި ފަދަ މާރާމާރީތަކުގައި މީހުން މަރުވެފަވެސް އެބަހުއްޓެވެ.