މިސަރުކާރުން ކުންފުންޏާ ހަވާލުވި އިރު ގިނަ ލިޔެކިޔުންތައް އެއްގޮތަކަށްވެސް ބަލަހައްޓާފައިނުވޭ، މިހާތަނަށް 837 މިލިއަން ރުފިޔާގެ ދަރަނި އެބަހުރި: އާރުޑީސީ

މި ސަރުކާރުން ކުންފުންޏާ ހަވާލުވި އިރު ގިނަ ލިޔެކިޔުންތައް އެއްގޮތަކަށްވެސް ބަލަހައްޓާފައި ނުވާ ކަމަށާއި މިހާތަނަށް 837 މިލިއަން ރުފިޔާގެ ދަރަނި ހުރި ކަމަށް އަދި އެއްވެސް ބާރުދޭ ލިޔެކިޔުމެއް ނެތި، އެކި ފަރާތްތަކަށް 161 މިލިއަން ރުފިޔާ ދެ އަހަރުގެ މުއްދަތެއްގެ ތެރޭގައި ދޫކޮށްފައިވާ ކަމަށް ރޯޑް ޑިވެލޮޕްމަންޓް ކޯޕަރޭޝަން (އާރުޑީސީ) މިއަދު ހާމަކޮށްފި އެވެ.

އާރްޑީސީ އިން މިހެން ބުނެފައިވަނީ، ކުންފުނިތަކުގެ ކުރީގެ މެނޭޖްމަންޓުން ހިންގާފައިވާ ކޮރަޕްޝަންތަކާއި އެފަދަ ކަންތައް ތަކުރާރުވިޔަ ނުދިނުމަށް އަޅާފައިވާ ފިޔަވަޅުތަކާ ބެހޭ މައުލޫމާތު ސާފުކުރުމަށް މިއަދު ރައްޔިތުންގެ މަޖިލީހުގެ ސްޓޭޓް އޯންޑް އެންޓަޕްރައިޒަސް (އެސްއޯއީ) ކޮމިޓީއަށް އާރުޑީސީގެ އިސް ވެރިން ހާޒިރުކޮށް ކުރި ސުވާލުތަކަށް ޖަވާބު ދެއްވަމުންނެވެ.

އާރްޑީސީގެ ޑެޕިއުޓީ މެނޭޖިން ޑިރެކްޓަރު މުހައްމަދު އަސްބާހު އަލީ ނަސީރު ވިދާޅުވީ އެ ކުންފުނިން 2022 ވަނަ އަހަރު 66 މިލިއަން ރުފިޔާ އާއި 2023 ވަނަ އަހަރު 95 މިލިއަން ރުފިޔާ އެއްވެސް ލިޔެކިޔުމެއް ނެތި އެކި ފަރާތްތަކަށް ފޮނުވާފައިވާ ކަމަށާއި އެ ފައިސާ ފޮނުވާފައި ހުރީ އިންޓަނެޓް ބޭންކިން މެދުވެރިކޮށް ޓްރާންސްފާ ކޮށްގެން ކަމަށާއި އެކަމާ ގުޅޭ އެއްވެސް ތަފްސީލެއް ކުންފުނީގައި ނުވަތަ އިންވޮއިސްއެއް ކުންފުނީގައި ނެތް ކަމަށެވެ.

އާރުޑީސީގެ ފައިސާއަށް އެ ކުންފުނީގެ މުވައްޒަފުންތަކެއް ހިޔާނާތްވެފައިވާ ކަމަށް ތުހުމަތުކުރެވި، އެ މައްސަލަ ބަލަން ފަށާފައިވަނީ މިދިޔަ ސެޕްޓެމްބަރު މަހު އެވެ. އެ މައްސަލަ ތަހުގީގު ކުރަމުން ދަނީ ފުލުހުންނާއި އެންޓި-ކޮރަޕްޝަން ކޮމިޝަން (އޭސީސީ) ގުޅިގެންނެވެ.

ހަމައެހެންމެ މި ސުވާލުތަކުގެ ޖަވާބުގައި އާރުޑީސީގެ މެނޭޖިން ޑިރެކްޓަރު އަލީ ޒުހައިރު ވިދާޅުވީ، މިހާތަނަށް ބެލި ބެލުމުން އެއްވެސް ބާރުދޭ ލިޔެކިޔުމެއް ނެތި އާރުޑީސީން ގިނަ އަދަދެއްގެ ފައިސާ ދޫކޮށްފައިވާކަން ފާހަގަކުރެވިފައިވާ ކަމަށެވެ.

“އެއްވެސް ޑޮކިއުމަންޓެއް އަޅުގަނޑުމެންނަށް މިއުޅެނީ މިހާތަނަށް ނުފެނިގެން،” އޭނާ ވިދާޅުވި އެވެ.

ލިޔެކިޔުން ނެތި ގިނަ އަދަދެއްގެ ފައިސާ ދޫކޮށްފައިވާ މައްސަލައިގެ އިތުރުން ވެސް، މިދިޔަ ސަރުކާރުގެ ފަހުކޮޅު އާރުޑީސީގެ ބަޖެޓުން ފާހަގަކޮށްލެވޭ ބޮޑު ހޭދައެއް ކޮށްފައިވާކަން ވެސް މިއަދުގެ ކޮމިޓީގައި ޒުހައިރު ފާހަގަކުރެއްވި އެވެ. މިދިޔަ ނޮވެމްބަރު މަހުގެ ކުރީކޮޅު ބެންކު މެދުވެރިކޮށް ފިނޭންސް މިނިސްޓްރީން އާރުޑީސީގެ އެކައުންޓަށް 90 މިލިއަން ރުފިޔާ ޖަމާކޮށްފައިވާކަން ފެންނަން އޮތް ކަމަށްވެސް ޒުހެއިރު ވަނީ ވިދާޅުވެފައެވެ.

“އެކަމަކު އަޅުގަނޑުމެން އެތަނާ ހަވާލުވި އިރު ބާކީ އެކައުންޓުގައި އިނީ 4 މިލިއަން ރުފިޔާ،” ޒުހައިރު ވިދާޅުވި އެވެ.

ޖުމްލަ 90 މިލިއަން ރުފިޔާ އަކީ ވަރަށް ބޮޑު އަދަދެއްކަން ފާހަގަކުރައްވައި އަސްބާހް ވިދާޅުވީ، ކުންފުންޏާ ހަވާލުވި ދުވަހުން ފެށިގެން މިހާތަނަށް އާރުޑީސީ ކޮޅަށް ޖަހަން ކުރި މަސައްކަތުން ވެސް 90 މިލިއަން ރުފިޔާ ބިލް ކުރެވިފައި ނުވާ ކަމަށެވެ.

އަސްބާހް ވިދާޅުވީ މިއީ ނިޒާމުގެ ތެރެއިން ވަކި ކުންފުނިތަކަކަށް ފައިސާ ދޭން ކޮށްފައި އޮތް ކަމެއް ކަމަށާއި މިކަމުގައި ކެޓަގަރިކަލީ މިހެން ބުނެވިދާނެ ކަމަށެވެ.

“އަޅުގަނޑުމެންނަށް މިކަމާ ގުޅޭ ގޮތުން ބާރުދޭ ޑޮކިޔުމަންޓެއް ފެންނަން ނެތް ކަމަކު، ފެންނަން ހުރި ސްޓޭޓްމަންޓްތަކަށް ބަލާލާއިރު، ދެން ވުޖޫދުގައި ނެތް އިތުރަށް އެމީހުންނަށް ދޭން ޖެހޭ ފައިސާއެއް. ވަކި ކުންފުނިތަކަކަށް ވަކި ބަޔަކަށް ދޫކޮށްފަ މިހުރީ. އަޅުގަނޑު ހަވާލުވި އިރު ބާކީ އެކައުންޓުގައި އިނީ އެންމެ ހަތަރު މިލިއަން ރުފިޔާ. އެއާ ގުޅޭ އެއްވެސް ސްޓޭޓްމަންޓެއް ފެންނާން ނެތް،”